Read Alladian ISAIAH 26 Bible Online

ISAIAH 26 - Alladian bible

ISAIAH 26

¹Delo longe delo sim miri sim Judah amolo ami kídíe luyé: Ngolu edíng runa doolung ko kadung. Doolung delokke líísak yapgo kídíem Shédíbí kaabomdung.

²Míngkesuna deenampe yéna, opín-buang daadie aadope, doolungke yapgo eyabem sitya langka.

³RUUTUM nome séko bulu míngke sududí, séko buluke aapí-aange edíírupe, delokke jonnamrupe gedudí; dekena kídílo no edíína aapí eetet em, ruulíkne.

⁴RUUTUM kíng agínpe míngke sulangka, kapeila RUUTUM bí turyarna Líírenge.

⁵Séko bulu kedín-kedonpe yédudí, bulume bí omapmone, angun-abérupe duuna doolungem, demulpe idokupe, bí amonglo olet mokune.

⁶Iréénam opan kídíke lepyoe, dekedem tujém bomkaku.

⁷E RUUTUM deena amike gípeko, bedangem atampe ibila, no buluke alem gípope gímodung.

⁸Aroe E RUUTUMA, nokke ayonlok, yédope nom ngolu toyadung. Nok amínem yidge-rínggenam dem ngoluke aapí-aange mííbomdung.

⁹Yoem ngok aapí tabung lok nome mííbomdung, tani among so edílo nokke kebangem baabiyéne, delo tani takame nokke, pénsam-raadangpe kebang lubinamem kaayin-kényinyé.

¹⁰Atímana ami kídí teyolo, nok ayangem lengkan lateng, bulu ainem kangkénmang. Jonnampe yésuna among yéta lokke ami kídíeteng atímangem idan tetedung. Delokke RUUTUM ke angun-abé em aipe mínggemang.

¹¹E RUUTUM, nok alage iréépe emla lengor lateng miru ami kídíe, kangkén sumang. Dekena ami keralo, nokke agí amisu legape ernamem lengkan sula, bulume annying molangka. Nokke miru kepe menam ememe bulume gunyok molangka.

¹²E RUUTUM, no ngolum aapí eetet em ruubito, depeila ngoluke ilanam agér takam si nokke ruutíng lokmin idune.

¹³E RUUTUM, ngoluke Shédía, nokke kékonlo abíd kídíeteng ngoluke teyolo ruutum bomto. Idola nom petom ngolu rínggedung.

¹⁴De ami kídar de supak siyinkai, delokke bulu turyi kumayé. Buluke aid kídíe gerep yimayé. No bulum itung-iréla kaimadope ito, depeila bulum sékote míípasu yimang.

¹⁵E RUUTUM, no agí opínem, arda mola parmola, nokke agíke angun-abéem pakyape edíng moto. No among rísuemte gooya moto.

¹⁶E RUUTUM, edílo no bulum itung-irétodí, bulu, adírlok nokkíng anggeto. Depe iduem bulum kumsunam emkom, dadapakpe ito.

¹⁷E RUUTUM, kapekísa mime okii kila, ankasula, kapge-ríngge dudí, dekepe ngolu nok keralo ito.

¹⁸Ngolu dekepe okii kinampe kibomsuto, idola ngolu atí olenmang. Tani among so ngolu turnamem bilamang, delokke tani legape aina agér atí ilamang.

¹⁹Idola nokke sinade turyéku, buluke amíle gerep yéku. Ago aralo ipna takame, gerep langkula ashélok miri luyéku. Asirna roh rokom tangare among sim eker mokunam kísape, kerapekai sineme RUUTUM bí turlat moyéku.

²⁰Ngokke ami kídía, noluke ekumlo aalangkula eyabem sittumsula, anyong moodí legape ruunyok gepo langka. Shédíke marname aikumang loope nolu depe ipolangka.

²¹Kapeila kaatola, paab legape tanime itung-iré kape emla teyong among lok RUUTUM bí tokdak. Kénmadope mokanam kídíke iyyiem kédénge lengkan biyéku, delokke sina kídíem amonge rumyimayé.