Read Alladian ISAIAH 27 Bible Online

ISAIAH 27 - Alladian bible

ISAIAH 27

¹Delo longe delo RUUTUM bí, bíkke ardaruna, reyubrunam yoksa delok, siyéng asi eerí kolo yéna kyogong-kyogosuna bíríbít Lebiathan me petyé.

²Delo longe delo RUUTUMbí agíke gairuna onggur ríkséng dem sipe emyé,

³“Ngo agínpe kaabomla, sim asi bitídung. Sékote língang lamadupe, longe-yohpe ngo dagbomdung.

⁴Ngo ríkséng dem marbom yimang. Delo arang delo tanyum-tatké esinge kamílomin ngo dekedem emelo rompak yéne.

⁵Idola ngok ami kídí lokke miru kídare ngokke mopítnam em mííyé mílo, ngokkíng bulu aapí eetet dope agom-aangem lubosupe aido. Arorupe, bulu aina agom-aanglok ngome lubosupe aido.”

⁶Angkupena longelo Jakob kelok lenna Israel opín-buange esing kísa appír-pírla, amí gela appun punla, tani among tabung so buluke ayé bííbomyé.

⁷RUUTUM bí miru kídílo kapekísa iré dudí, dekepe Israel teyolo iréémang, delokke miru amiem petnam kísa Israelem petmang.

⁸Bulume mibo mootenglo abílpe yémonam ségu delo RUUTUM nok aapíe míírí sulíkdung. Atímana sanggo asar mutkampe bíkke reyubpe buknam adudlok Israelem bukpakdung.

⁹Edílo Israel amie, Asherah mime uyuke líídung banggénem, uyuem kumkeng elíng runggu kídíem dírmík alongla, demulpe iyédí, delo Israelke paabem asampe mepakbiyé. Dekepe buluke ikunamde aikunana buluke ayé kídíe.

¹⁰Líísak yapgope gargoonam doolung de bénpakla dongkai. De kumruk-morukpe ikai. De simon-silike dota goola apéé péépompe ikai.

¹¹Edílo esing aag kídíde ere yédí, delo mime kídíe tírla esingpe natadung. Kapeila si ami kídar si atí pinnyo kamaneke. Depeila bulum pílen-ruulenna bí buluke teyolo atí ayang kamayé, delokke bulum kaasing-tatsing mayé.

¹²Delo longe delo, E Israel kídí, nolume RUUTUM bí Euphrates korong lok ila Ijipt lokke rísudadi loope, gehuem kabbínnam kísape, mitel-mitelpe laadum suyéku.

¹³Delo longe delo botterupe bikul tapungko mutyé. Delo Assirialo yéna kídíe lang Ijiptlo umnyokla yényokna kídí tabunge Jirusalem ke deena díítumlo píídum suyinla RUUTUM me tabunge kumsuyé.