Read Alladian ISAIAH 28 Bible Online

ISAIAH 28 - Alladian bible

ISAIAH 28

¹Ephraim bí loorímangkai. Ephraimke angun-abée, buluke tíngír sutína ruutum kídíke dumpolo ere lenna appun dumlup kísa ikai. Buluke míngkímsuna dumpong kídídem nampona téllok myolík sukítungai, idola bulu tíngir lok akor-siyor kaimang.

²Kaatola, RUUTUM kelo miga-miram runako kadung. Bí yagorupe gumla pedong-tapípe aabomyé. Bí puumu kísa aabomla, among tabung dem ijét bomyé.

³Ephraimke tíngír sula míngkím dem lepyo rumkílo tujétyé.

⁴Donam tapang ayé edílo minlen yédí, dekeme menape pukutla donam kísa, míngkím suna ruutum kídarke ruugana angun-abée kaimayé.

⁵Delo longe delo Ralyayalumna RUUTUM bí, turkína ami kídí legape angun-abéna appun dumlup kísape iyé.

⁶Bí kebang ruutum kídíem raadang-pénsampe agom-aangem lujimola, yapgo eyabem kaabomna kídílo miruem mimak iabomyém dakkang sula dope ralnamem ruulíkyé.

⁷Miri kídíe lang kaaluna miri kídíe yagorupe tíngírsula gíkén-gíyén yimape idung. Bulu apong emlang bierem agí tínggíla, akén-ayén yimape ila, kaarí kaanyo lengkannam emte kaalalsula miri kídílo lubidope tomyémte ai-siipe kebang lukén biyimang.

⁸Buluke tébul kídí dete abatpe bííyinla alop atel kokom deena kamang.

⁹Bulu ngom ludung, “Séko memda bí luyilpe idune? Séko kída bík ngiitomem pokandune? Anyunem tííyin pakna koo kídí legape bík agom-aang kídí de aidung.

¹⁰Bí ngolum akor-akorpe, ari-aripe, delokke leson-lesonpe poyilpe ikídung.”

¹¹Nolu agom-aangem tatbi marodem Shédíbí mibo-miyingke tatkén manam agom lok nolume lubiyé.

¹²Nolum takam bí eetet-monetpe adung-apéédope imotuai, idola nolu dekedem tatmato.

¹³Dekepe ila RUUTUM bí nolume akor-akorpe, ari-aripe, delokke leson-lesonpe luyil lenyé. Delo nolu lekor mipílo tubesula oletyé, delo nolu tarí-tape gela, edape nolum batjémla, abílpe umnyokyé.

¹⁴Depeila Jirusalem so ami kídí teyolo ruutum yégena mikép-sorép ami kídar nolu, RUUTUMke lunamem tattola.

¹⁵Sinamlo bonying ibosula, uyu amongem daapong ibosuto emla nolu míngkím sula; puumu-puyange enga bomdokom ngolum atí ilamang, kapeila menamlo ngolu míída sudung, delokke yadnamlo ngolu yépí suladung, emla nolu mííte sudung.

¹⁶Dekepeila sikepe Ralyayalumna RUUTUM bí podung, “Kaatola Jayonlo ngo tolna, delokke edííruna lííne-lííreng aane gaangko ulíkyé. Deme sékodí míngke suyéne, bí edílokom annying paamayé.

¹⁷Agínpe raadang-pénsam aange aane gaang delokke kínanape iyé, delokke yatkup-palatmape jonna aapíe aane gaang delokke runanape iyé. Noluke menam-yadnam teyolo míída subomnam dem tapí-asar gumname mutpakyé, delokke puumue noluke eetetpe rusi supom dem eelum bomyé.

¹⁸Sinamlo noluke bonying inam dem ibín yéku, delokke uyu among kíng noluke daapong ibosunam dem kamomayé. Edílo nolum tarone lang puumue aabomyédí, delo nolum ijét along bomyé.

¹⁹Dekede nolume longepe, yohpe engang aatí bomla yubomyé. Shédí kelok aatína tabungde noluke legape pesorían bomnam atí-atípe iyaryé.

²⁰Nolu sikena ngiitom lunam kísa iyé: Leyar-lakyarla ketpe, ketkede ande runako; badu poge penamde améngonako.

²¹Perajim Díítum lolang Gibeon yiibelo inam kísa RUUTUM bí mimak momín suyé. Kapeila bíkke irisinyo agérem, tanike kangkén manam agérem bí iperung emla mííbomnamem bí iyé, delokke ipíng ruyé.

²²“Nolu ngokke lutor sunam agom kídí sim ngilka mapeka. Depe imílo nolum ikoli yéébom nade tebegyayé. Among takam so nyokname pííyé emla Maglíngke RUUTUM bí ngome podung.

²³Ngokke agom-aang lunam tabungem aipakpe tatgap-kéngap gelangka.

²⁴Edílo arík ina kone amongem guryédí, bí gurtí ayar yénía? Bí kédéngem demmík míktíla iyar yénía?

²⁵Edílo bí among dem kampope imík todín, bí kumin amíem lang péérét em kuulík manía? Gehueme aari-aaripe lemanía? Ayagem lang abíd ali-ayé em moole-moolelo lemanía?

²⁶Bíkke agér itíngem bí kénsudung, kapeila Shédíbí bím poyildung.

²⁷Kumin amíem demangkom péérét amíem arem siidíng lok demkalmang, delok ayanpe etsang gamna banggén kolokmin demkaldune.

²⁸Bí gehuem meyimape yiktí kolok loorímang ipamang, delokke bí gehuem guré gaari kolok, ali deme loorímang ipang mape yiknamem kéndung.

²⁹Sikepe kénnam takam si míngkén manam luyilna, angun-abérupe kénna, Maglíngke RUUTUM kelok kalendung.”