Read Alladian ISAIAH 29 Bible Online

ISAIAH 29 - Alladian bible

ISAIAH 29

¹E Ariel, Ariel, Dabidke notko ilíkko doolunga! Toodí-toodíem nokke adeng-ape em, doman-tíímanem idan tete langka.

²Kaatola, nom ngo mimakpe aabomyé, delo no kapla-rííla pengé luyé, delokke ngok keralo no agínpe iyyi kana merom runggu kísape iyé.

³Nokke luyu-lamgélo ngokke notkuem igo líkla, nome ngo gargo bomla mimakpe línga bomyé.

⁴Delo nome kédélo oletdupe píktokla, demul aralok no agomem tatpang-kaapang madupe lulenyé. No kédéng aralok urom agom pokunam kísa nok adude manyé, delokke demul aralok no beiyope agomem lulenyé.

⁵Idola nokke miru maglíng kídíde, remina sulli kísa iyé, delokke ayang kamana miru kídíde asare mutbomnam pemukpe iyé. Menang asak yaari garpe,

⁶maglíngke RUUTUM bí, líídor loklang taronlok, delokke bottepe ngomnam lok, yatyamna gumnam asarlok, delokke gukutna eme meyope buluke teyolo aabomyé;

⁷delo Ariel nome mimak iana miru opín tabung deme, yoh eme immang maanam kísa nyokmoyéku.

⁸Dekede kenone apim dodope immang maanam kísa, edílo bí darngo suyékudí, bí keno tetedung; bí asi tíílídungem asi tíídope immange maayé, idola darngo suyékuem tíílíde yagodung. Deke kísape Jayon Díítum me mimak ianade iyéku.

⁹Míngkén-míyénmape ngenape itola. Atí kaapamana migmanape isutola. Apong tííma lateng tíngír sunape itola, delokke yépe-yélela yégotola.

¹⁰RUUTUM bí nolume eerína immiem bomang bikai. Bí noluke amigpe ina kaalu miri kídíem siilpe tupkapto, delokke noluke dumpoope ina kaana kídíem molkapto.

¹¹Noluke legape tídbumnam kitap aralo siil tupla ngotlíknam agom kísape kaarí kaanyo tabungsi iyé. No tídbumnam kitap sime pori kénna konlo bidola rikantoi emla ludokom, de amide, “Ngo sim pori lamang, kapeila si ngotkapla siil tupnamko,” emla luyé.

¹²Kénmana amikolo bomala rikandope nolu bimílo bí, “Ngo pori kénmang,” emla poyansuyé.

¹³RUUTUM bí podung, “Si ami kídar si ngome kumsukape aadung, idola buluke agom-aange are kamang. Bulu nappang petom lok yidgedung, delokke buluke aapí-aange ngokke lok mooteng dung. Buluke ngome kumsunamde abídmang, tanike idong-iyon ségu mílíeke.

¹⁴Depeila ngo buluke kénkí manam gyanlok bulume mamam tete sumoyé. Buluke kénna kídíke kénnamde nyokyé, delokke buluke akor-siyor kanarupe míísunamde kaimayé.”

¹⁵Séko buludí agíke mííbom nameme RUUTUM ke keralok rumnyokpe idune, buluke yénamlo pokén yimanam adírem paayé. Buluke budii rungkup-rulat namem ami kénmadope ila, sékote bulum kénmayé, delokke kaamayé emla míípoldung.

¹⁶Bulu ato takamem ikup-ilatla idung. Séko gaiyadun, kédéng peking pínadía, ma kédéngdía? Pílentonam ato besi pínadem, “Bí ngom pímang,” emlayén? Demangkom pekingde pínadem, “Bí atí kénmang,” emla lulayén?

¹⁷Moodí anyong aralo Lebanonke tapétna moonamem aríkpe, delokke aríkpe inamem moonampe imoyé, emla pogenam agomko kadung.

¹⁸Delo longe delo ruubéna amie kitap porinamem tatpaayé, delokke kaamape yétína migmane, buluke amige migdar langkula bulu kaayéku.

¹⁹Lekoda aapí remyakpe genelang opan arééne, RUUTUM Israelke deena Shédíke binam ashéngem paayéku.

²⁰Amiem ipusilééna, lupuléna, atímape amig gena takamem nyokmoyé.

²¹Séko bulu amiem lué-luléla paab imodudí, séko bulu kebanglo imemnem lupíla, jonnem ajéng gemola idudí, dekedem Shédí bí kaimadope nyokmoyé.

²²Depeila Abraham me mopítna RUUTUM bí Israel em sipe ludung: “Israelke migmo kídíe annying lok ikén geyimape iyimayé.

²³Edílo bulu ngok alag agér inamem buluke oo kídí aralo kaapayédí, delo ngokke deena amínem bulu bomgapyé. Bulu RUUTUM Israelke deena Shédíke deenamem kaapala, akén geyimape yidgeyé.

²⁴Delo, bopolpe yéna kídíe kénnamem paayéku, delokke ebín bíntína kídíde luyilnamem torík suyéku.”