Read Alladian ISAIAH 3 Bible Online

ISAIAH 3 - Alladian bible

ISAIAH 3

¹Kaatola supak RUUTUM bí, Ralyayalumna RUUTUMbí, Judah lokla Jirusalem lok mipil-miyongke yéda sukeng ato-siro tabungem laabíndak. Buluke donam-tíínam takamem laabíndak.

²Buluke miram kídíem lang sipaying kídíem, buluke kebang ruutum kídí emlang kaalu-kangorna kídíem, buluke rogyin kanggola, pomelna kídí emlang kénna-paana kídíem,

³buluke sipaying ruutum kídíem lang doolung ruutum kídíem, buluke poyil-luyilna kídí emlang, agér-anamlo ijiina kídíem, delokke buluke moya-montrong ina kídíem laabíndak.

⁴Ngo buluke ruutumpe koo aménem imoyé.

⁵Ami kídíe agí-agí arasulo ipusiléé bosuyé, delokke kumrí donggonge mirupe ibosuyé. Yaamé kooe abu-abíng mirolpe rollenyé, delokke bíírík-hamgo mana amiete, miro ami kídíem atí míngge yimayé.

⁶Amikone ali-atod bíro konem, bíkke ekum delo aala, “No lukdorko gekíyaadung, iname no ngoluke ruutumpe ila sikena ankí-kenona longem yébolangka,” emdí longe píídak.

⁷Idola delo longe delo bí, “Ngo ipít lamang, ngokkíng donamkua kadun, genam kua kadun, ngok ekumlo atí kamang, iname noluke ruutumpe ngome imapeka,” emla luyasuyé.

⁸Jirusalembí nyokdak. Judahbí oletdak. Kapeila buluke agom-aang, agér-anam kídarde RUUTUMke angun-abéem mepaksula mirolpe ilenkai.

⁹Buluke atuk migmo kídarde, buluke atímangem lengkan sudung. Buluke paabem rumnyokmape Sodom kísape lokan sudung. Ah! Edítko bulu adíryékun! Kapeila ankí-kenoem bulu agísue laangasukai.

¹⁰Deena kídíem polangka, bulu aipe yéyé, kapeila buluke aina agér lokke ayém bulu pílsi suyin yéku.

¹¹Atímana kídara, edítko adíryékun! Ankí-kenoe bulukíng píngkai. Buluke irem bulu paasuyéku.

¹²Ngok ami kídíem koo améne ipusiléé lenkai, delokke mimee ruutum bomkai. E ngok ami kídía, nolum yébone yékén bomangkai, bulu aina bedalok nolum gíbomape angukonlok gíbokai.

¹³RUUTUM bí kebang lupomlo dungangkai. Bí ami kídíem kebang baabompe gerepkai.

¹⁴RUUTUM bí agí ami kídíke miro kídíem íngkí-bengkípe laangangkai. Bí sikepe atímang luketdung: Nolu ngokke onggur rikséngem ipén-siyénla, opan amilok líínam atoe noluke ekumlo bíísét dung.

¹⁵Nolu ngokke amiem ijém-sipéla igíng kamang. Nolu aatí-opan teyolo dopu-tíípugíng kamang. Ralyayalumna RUUTUM Shédí ngo podung.

¹⁶RUUTUMbí sipe podung, “Jirusalem lokke mime kídíe yagorupe míngkím sudung. Bulu alíngem bodope ila nyobung kittíngpe matígoodung. Lekorem eetet-eetetpe kordula, lerum adude tatla yimadupe batkal goodung.

¹⁷Depeila ngo buluk teyolo atímangem ilíkyé. Buluke tukku kídílo tarí bukmola, dumídem ngíkutla tukkut moyé.”

¹⁸Longeko píídak, delo longedelo buluke míngkím subomnam kampona koopung kídíem, lerum kídíem, tukkulo ilík sunam kídíem, alínglo genam lunggu-tadok kídíem,

¹⁹nyorunglo genam kídíem, lakkitlo gin-genam kídíem, tuulum sunana kampona gasor kídíem.

²⁰Dumlup kídíem lakdulo asirpe ginlík sunam kídíem, ugílo morí kana lunggu ginlík sunam kídíem,

²¹koosi kídíem, nyopon kídíem;

²²buluke gasor kampona kídíem, tapétna gasor, delokke lukdor, delokke abal, delokke nampona sérang bomkeng gadum aména kídíem;

²³buluke asirna rumal ege, pitang, arsi delokke morí-mojokna ege pogenam daadi tabungem RUUTUM bí laabínyé.

²⁴Nampona ayanpe namnyine kayé. Aina uug ayanpe sotkya rímoe kayé. Kampope dumíd tublab sunam ayanpe, tuklokyé. Kampona ege-gasor ayanpe ankí gasorem polum suyé. Kampo ayanpe amíl-amoe kaanying-kaaso alooyé.

²⁵Noluke ami kídíe, miram kídíe midu-mimaklo nyokyinyé.

²⁶Jayonke doolung eyabde yagorupe kapla-rííla iyé. Doolung agísude yagorupe duk-adírla, bedalo mime duuna kísa iyé.