Read Alladian ISAIAH 30 Bible Online

ISAIAH 30 - Alladian bible

ISAIAH 30

¹RUUTUM bí polendung, “Séko bulu aapíe miképpe ila, ngokke míngkorpe agér anamem imape, ngokke aidlok bonyingem ibosumape, paab teyolo paabem mekumdudí, de ami kídarde reyubna adírem paayéku.

²Bulu ngokkíng lupo-manmo kamape, Pharaoh kíng igulem matala, Ijipt lokke ugyumlo dugang gedung.

³Idola Pharaohke igulde, noluke legape annying kupename, delokke Ijiptke ugyumde bursu along geku pename.

⁴Buluke migom kídíe, buluke Joan lolang Hanes doolunglo píídagakom,

⁵bulu atí igul lamayé, delok ayanpe annying gepenam petom em bulu bomayé. Depeila Judah ami kídíe burkang along sutíyéku.”

⁶Si Negeb lokke simon-sili legape Shédíke kaalunam agome: “Buluke maglíng kídarde peso-yirínam myomure, bíkíng bítpyore, delokke yopna bíne tabíe yéko bedang lok, buluke are kanarung ekurangem gado teyolo joolíkla enbom dagakom, dekepe ankípe ibom sulíkko opínde bulum atí igul lamang.

⁷Ijiptke igulde atí agér kamang. Depeila ngo bíme, ‘Atí imana bíríbít,’ emdung.”

⁸Supak gíla agínpe hakiipe duuyardope, delokke angkupena longe loteng kényar gedope sike takam sim kitap kolo atkum langka.

⁹Si ami kídar si RUUTUMke luyilem tatlí sényimana, mirolpe rolna, yatkup-palatlo yétíneke.

¹⁰Bulu kaaluna miri kídíem agom pomomape lutum tumtídung. Bulu sipe ludung, “Ngolume arona atíem lengkan yimapeka. Ngoluke erbomnam petom lok agom-aangem polangka, delokke poru-pogong agomem lulangka.

¹¹Ngoluke bedang lok gígéé langka, dakkap mapeka. Israelke Deena ke legang lok ngolume lutí mapeka.”

¹²Depeila sikepe Israelke Deena bí ludung, “Nolu itung-iréna amír-alaplo míídasula, menam-yadnamlo míngkesula, ngokke ngiitomem mepak kolo,

¹³nolu paab kakai. De paabde, kedonna, barna mílíe ila, menang asak olet letyamna líísak etor kísa noluke legape iyé.

¹⁴De kédéng pekinge omíksula, betna alop koteng mekolem laalen nadope, demangkom asi peking lok asi suknana kote, kaimadupe inam kísa noluke teyolo ojém bomyé.”

¹⁵Israel ke Deena Shédí, Ralyayalumna RUUTUM bí sikepe podung, “Aapí míílatsula asoope duunamde noluke turname, delokke aiyope ngom petom míngke sunamde noluke ralkenge. Idola anyong kokom nolu dekepe ikímang.

¹⁶Sok ayanpe nolu miru keralok dugdugna guré kídí loge dugnyok gepe míídung. Delokke dugnyok genam de noluke iperuname! Noluke guré kídar de dugdug runeke emla míídung, idola nolum monmín gena kídíde nolum pemílo menayayé.

¹⁷Edílo miru sipaying atel ko kaayédí, noluke éjar maglínge duggeyé, delokke sipaying pilngode nolum takam dugyin gemoyéku. Noluke maglíng notko delo atí kaimayé. Noluke jandi atel dem koorélo díítum teyong telo utupe kayé.

¹⁸Dekepe idagakom RUUTUM bí noluke teyolo ayang kupe emla míídungai. Kapeila RUUTUM bí raadang pénsam agom luna Shédíko. Bíkkíng míngkeng sunade gérne.”

¹⁹E Jirusalemlo duuna Jayon ami kídía; nolu kapla-rííla iyimayé. Noluke igul legape bíkkíng kapgu-rogu sula imílo, bí nolum ayang sukupena Shédíe, delokke noluke dekena adud-ayudem tatyékuem bí nolum tatbiyé.

²⁰RUUTUM bí noluke miruke apim em domola, kosana asiem tíímola idagakom, noluke keralok bí ruunyok geyimape nolum luyil-poyilyéku. Dekeme nolu agíke amige kaasuyé.

²¹Nolu bedangem gímemla lakbíkpe, demangkom lakképe gídagakom, “Simin bedange, sok gítola,” emna adudko noluke lamkulo tatsuyé.

²²Delo nolu uun loklang baldín lok pínam mimang kídíem laala, deemana egem elpaknam kísa elpak dola sikepe luyéku, “Kangkolo dojé-doyé yima.”

²³Noluke ali-ayé lelíknam teyolo, bí pedongem omola donam-tííname mirem aloodope bí imoyé. Delo longe delo noluke bomnam taro kídíe gairupe neyi-neyangem dogooyéku.

²⁴Nolume aal gurbina goorue lang gadoe, pakur, joboka lok kampope isar binam gai-gakona donamem doyé.

²⁵Ingkona longe lodí noluke miru kídíke líísak ekum kídíem bényéne, delo dííte miyonglok, delokke díítum takamlok koronge biilenyé.

²⁶Delo, pooloe doonyi kísa angunyé, delokke doonyi angune longe kíníd angunem lotellok ngunnam kísa, dekena kíníd angun kísa letel lok ngunyayé. Edílo RUUTUM bí, bíkke tarí moket tonam kídíem kampope arbínla egelok ngotbum yékudí, delo sikesi kayéku.

²⁷Kaatola mootenggam elo RUUTUMke angun-abé ralnamem lengkankai. Bíkke marlílok emela míkkíe doomugpe ilenkai. Bík agome meyope gulenkai.

²⁸Bíkke doyi-esare, telokkai enggona asi puumu kísa, opín-buang takamke atímape milí-hodongpe ruubo sunam ato kídíem kaimadupe yukut aloodung.

²⁹Idola nolu dan, adeng-ape yumeme írgang aloonam kísa, noluke aapí-aange ashéla, miri-bari luyé. Nolu Israelke Lííreng, RUUTUMke díítumlo saayém erappe ashéla saana ami kísa ashéruyé.

³⁰RUUTUM bí agíke angun-abéna agomem, bíkke yaaripe garna alagem, bíkke gumtíkna marnamem, líídor tapíem, delokke pedongem ami takame kaayin-tatyin dupe lengkan suyé.

³¹Edílo RUUTUM ke agom adudem tatla, itung-irénam ralnamem kaayédí, delo Assiria kídíe yiri-pedípe peso along geyé.

³²RUUTUM bí buluke teyolo itung-irénamem ikup-ilatla idung tetengem, bík ami kídíe dumdum lokla harp tapunglok miri adudem ríílík mínyé. Kapeila Shédí agísu Assiria kídíem mimak imín suyé.

³³Kerapekai Assiria rojem romdope, eme rompom botterunako irutung. De eerí aloodung, delokke bortak aloola, deddína esingem kumlík replíktung. Delo RUUTUMke nappalok eme lenla deme rílíkyé.