Read Alladian ISAIAH 33 Bible Online

ISAIAH 33 - Alladian bible

ISAIAH 33

¹E miru kídía, nolu reyubrupe adírem paayéku. Nolum yadla, lííla imalate, nolu amiem yattígola, líítígola itídung. Idola noluke dekepe inam longe nyokdak. Nolumteng yadla, lííla, rukupla ina kídíe, ikepe iyéku.

²E RUUTUM, ngolum ayalangka. Nome ngolu míítadung. Loodíkítpe ngoluke ralkengpe ilangka, delokke adírdueme ngolum ipítnape ilangka.

³Nokke gerepla ugbomyém, ami kídíe rego mipílo dugnyok gedung.

⁴Nokke mimak ila miru opínke ekuserang líínamem, pemír alem kísa ami kídíe uabomdung.

⁵RUUTUM bí botterunako, kapeila bí teyong telo duudung. Bí deenam loklang pénsam kebang lok Jayonem bíímodung.

⁶Bí opín-buangem edíng modung. Bí agínpe kaabomne, delokke gyan emla kénnamem agí amilo ruulíkne. RUUTUM me pesola yénamde, buluke botteruna ekurange.

⁷Miram ami kídíe igul legape gogdung. Aapí eetet legape agér iana kotoki kídíe agí kapgídung.

⁸Bene-bepong kídíe berompe ikai, kapeila delok ami gína kaimang. Bonying inamde loorí yimangkai, elík bosunam agom kídíde agér biyimang. Sékomete ai-kampope iigang kabo suyimang.

⁹Amongde ereela loorímangkai. Lebanon bí annyingla rukkai. Sharon amongde Arabah kísa yépolpe ikai. Bashan among lolang Karmel díítelo anne kídíe esing anelok oyin letdung.

¹⁰RUUTUM bí sipe podung, “Supak ngo botte-hane rupe, teyong telokkai gerepla, daadie kaadope lengkan sulenyé.

¹¹Noluke agom-aang rubosunamde agér bimang. Noluke inam tabungde loorímang. Ngokke aide nolum gunyokpena eme kísape idung.

¹²Sunpe romlennam elíng kísa, demangkom ereena pasumem metpipe gunam kísa, nolum guyé.

¹³Nolu mootenglo duune, ngok inamem tatlangka, delokke anínke ngokke angun-abé ralnamem kangkénla aroe emla míílangka.”

¹⁴Jayonlo duuna paabna ami kídarde yagorupe pesola sipe lubo sudung, “Sikepe gukut-gulutna Shédíke emelo, delokke íryar tetena eme so, ngoluke araso séko turla yélayén?”

¹⁵Séko bulu aro agom mílípe pola, deenampe yéla, irít-iket lok ato-siroem paapekpe paanamem míímape ila, amiem reko sumape, rukup-pakup mílílo amige kaamape, delokke nyorunge tatmape idudí, de ami kídarde turla yélayé.

¹⁶Dekena ami kídarde kedon kolo duula, elíng ekum aralo denge-poope duusi suyé. Dekenalo donam-tíínam ete edílokom anyomayé.

¹⁷Kampo-tatyorupe rojem duudupe, delokke rego mipíloope asi-amonge duudupe nolu kaapayé.

¹⁸Amiem amipe míímape, mili-hodongpe itígona ami kídíem, delokke amike ekum-gooralo maro-rotígoona, arope míímanam ami kídíem kaapa yimayé.

¹⁹Depeila mibo-miying kajana langgona kídíem ebínrupe mínggenam, delokke noluke tatkénmape mibo-miying agom ponam kídíem adírpe igenam takamde kaimayé.

²⁰Ngoluke gíídí-siipe ipom doolung Jayonem kaatola. Aapí-aange eetet neyingrupe dungko Jirusalemem kaatola. De edílokom atla yimanam tombu ekumpe iyaryé. Delokke rímo ginko dete edíng ayaryé, delokke rímo kídí dete bín yimana rímope iyé.

²¹Delo RUUTUM bí ngoluke Ralyayalumnape iyé. Ngolu bortakna korong, delokke roojik kídí abelo duuna kísa iyé. Delo miruke jajie yuda lamayé.

²²RUUTUM bí ngoluke kebang ruutume, RUUTUM bí ngoluke roje, delokke RUUTUM bí ngolume ayonem sutlíkne.

²³Depeila miru jajilokke rímo takamde agér bimaneke. Yudnana egem tuusu lamang. Ngolu miruke ekuserang tabungem lííla rotbomyéku. De ekuserang de bojé aloola lebetna amiete, buluke adusuko paayinyé.

²⁴Jayonlo duuna kídí aralok sékote, “Ngo kidung,” emna kamayé, delokke delo duuna ami kídíke paabem mesampe biyé.