Read Alladian ISAIAH 36 Bible Online

ISAIAH 36 - Alladian bible

ISAIAH 36

¹Judah lo Hejekiah ke dítak íying kolang appi nape roja idungem Assiria lokke roja bottena Sennaseribbí mimak iala, Judah among lokke líísak etor torgo suna doolung kídíeme bík alag aralo laayin aato.

²Delok rongem Hejekiah rojakom bík alag aralo tolík supe aido emla ludope, bíkke maglíng ruutum dem, maglíngem bojéko gíbola, Lakhish lokke Jirusalem lo endope lulígto. De maglíng ruutum de, Línggíng Paatang lok asi nola tokko delokke ege-galuk sumna kídíke sumko bedang dem doojét aabomto.

³Bíme kaaríkpe; roja ekumem kaabomna Hilkiah ke oo Eliakim, kebang atgebona Shebna, delokke opis lokke legang takamem atgebona Asaph ke oo Joah bulu angume lenríkto.

⁴Maglíng ruutum de bulum luto, “Hejekiahme sipe polangka, roja botte yalumna Assiriake rojabí sipe ludung: nokke edíípe mííte sulíkkode sékoda?

⁵No mimak idolokke ralnam emlang budii-bukan em ludupe, idola dekede asar agom mílíe, séko kída míídasula, no ngokke mirolpe roldun?

⁶Dolbum em banggénpe ila ami alage edílo delo gagda sula agí tebegem ilíkyédí, delo de dírla alagem níkla ina, Ijipt ami lua no míída sudun?

⁷Demangkom noluke Shédí kíngía no míída sudun? Hejekiah rojabí, runggu atel kolo kumsudope Judah, delokke Jirusalem ami kídíem lupala, RUUTUMke runggu takam emlang kumko ekum tabungem bénpak manía?”

⁸“Supak ngokke Assiria roja bottenake amínlok lukíko lubo sulape: Ngo éjar annyi guréem biyé, delo nolu duupena ami paayédí.

⁹Nolum Assiria maglíng arang sokke amé yalumna migom soteng ruupe sukanmang. Dekepe ilate nolu, Ijipt kídíe guré emlang guré-gaari kídíem igulpe melíkyé emla míída sudunía?

¹⁰RUUTUM ke igul kamape, ngo noluke among sim mimakpe iabomla, nyokmola itung emla nolu míídunía? Sim among sime mimak iala nyokmo langka emla, RUUTUM agísue ngome tomlíkto.”

¹¹Delo Eliakim, Shebna lang Joah bulu maglíng ruutum dem poto, “Aramaik agompe no polangka, ngolu dekedem tatkéndung. Hibru agompe pomapeka, kapeila líísak etor teyong telo duuna kídíe tatyindung.”

¹²Idola maglíng ruutum de poyan suto, “Assiria roja botte, nolum lang noluke roja petom lua ngome sim agom kídí sime podope lulígtune? Agíke tayém dosula, esiem tíísula ipena, etor teyong telo duuna kídí emte ngo podung.”

¹³Depe empala maglíng ruutum de dagrepla Hibru gomukpe érla luto, “Assiriake roja, botteruna rojake agomem tattola.

¹⁴Sikepe roja bí podung: ‘Hejekiah me yatko sumapeka. Bí nolume ipít lamang.

¹⁵“Nolu RUUTUM kíng míída sulangka,” emla bíkke luyid-luyad aralo aamapeka. Kapeila bí, “RUUTUM bí ngolume arope ipítyé. Assiria rojake alag aralo sim doolung sim edílokom duumomayé,” emla yaddung.

¹⁶Hejekiah ke agomem tatmapeka. Assiria roje sikepe podung: Ngokkíng nolu aapí eetetnam ajonem jonbosula aalangka. Dekepe imílo noluke onggur anelok, delokke dalim anelok onggur ayé emlang dalim ayéem nolum domola, noluke asi déérung lok asiem tíímola,

¹⁷noluke among sokke kísana asi-apong kana, delokke ettíngem alum-asamape ilenpeko aní among kolo ngo nolum laalang kula gíbo kumang yaryar loope, nolum eetet-monetpe duumo poyé.

¹⁸“RUUTUM bí ngolume ipítyé,” emla Hejekiah ke pomem agomem nolu tatmem sumapeka. Assiria roja ke alag aralok ingkona opín-buang lokke uyue ipít laaton?

¹⁹Ingko loda Harmoth kela Arpad ke uyu kídíe? Ingko loda Sepharbaim ke uyu kídíe? Bulu ngokke alag aralok Samari em ipítton?

²⁰Dekena among yéta kídí lokke uyu kídíe ngok keralok buluke among yétaem ipít sulaton? Deke kísape, ngokke alag sok Jirusalem em RUUTUM bí kape kísa ipít layén?’ ”

²¹Idola Hejekiah rojabí, “Dem ami dem agom atí luyan sumapeka,” emla lutum kolok ami kídíde asoope duula, agom atí luyan sumato.

²²Depe irodelo roja ekumem kaabomna Hilkiah ke oo Eliakim lang opiske legang takamem atgebona Asaph ke oo Joah, delokke kebang atgebona Shebna bulu agí-agíke ege galugem bétsula Assiria ke maglíng ruutum ke agom kídíem Hejekiah me popa bitoku.