Read Alladian ISAIAH 38 Bible Online

ISAIAH 38 - Alladian bible

ISAIAH 38

¹Delo longe kídí delo Hejekiah bí yagorupe sita-simangpe kito. Amojke oo kaaluna miri Isaiah bí, Hejekiah kíng aala bím poto, “RUUTUM bí sipe podung: Nokke ekum-erangem aipe ising-kaasing sutola, kapeila no kinam delok aikumape siyé.”

²Dem tatpala Hejekiah bí suppi danpe migmoe ila, RUUTUM kíng kumsuto,

³“E RUUTUM, nok keralo ai-kampope míngke sula, nokkíng aapí-aangem apíírupe bisula, nok amig keralo aina agér ila, ngokke yénamem no míípang subilangka,” Depe kumpala Hejekiah yagorupe kapto.

⁴Delo Isaiah kelo RUUTUM ke agome pííto:

⁵“Hejekiah kíng gíla sime polangka: ‘Nokke abu Dabid ke Shédí bí sipe podung: Ngo nokke kumnamem tatto, delokke miksi dínamem kaato. Ngo nokke yénamem dítak íying kolang pilngoko ruuban biyéku.

⁶Ngo sim doolung simla nome, Assiriake alag aralok mopít biyé. Sim doolung sim ngo kaabomyé.

⁷“ ‘RUUTUM bí agíke iyé emla toge sunamem igeyé emla lengkan iyodko ibiyé.

⁸Ahajke líísak ebang monamlo doonyi ugyumem lekor íyingko gílat sudokupe imoyé.’ ” Depe poro delo doonyi ugyum de lekor íying ko gílat sutoku.

⁹Kinam lok airong kudem, Hejekiah bí yidnam miriko atto.

¹⁰Ngo yaamé dungadape Sheol lokke yapgo eyablo aadak, ngo apíípe turla yémayé, emla mííto.

¹¹Tani angun turkoso, ngo RUUTUM me kaapa yimape, delokke abíd tani kídí emte kaapa yimayé, demangkom turna ami kídíso, leko bosu yimayé, emla mííto.

¹²Ngokke yénamsi bíntungla yéyintuai. Yénam si atlet kunam tombu ekum kísa, demangkom, ege sumkolok gatbínnam ege kísa. Shédíbí ngome yéyin modak míítuai.

¹³Doonyi saado loope haggapla ngo dooyato, myomure along rektírnam kísa, ngok amíl si kito. Shédí bí ngome yéyin modak míítuai.

¹⁴Ngo adud-ayud kote kabom suyimape kaptíto, pekí adud kísa ngo ríítíto. Teyong amongpe ngo kaadu sutíla, ngok amige kito. E RUUTUM ngome igultoi, ngo adír along gedung.

¹⁵Idola ngo ingko koda polayén? RUUTUM agísue sime isutung. Ngokke aid sokke anka sunam legape, ngokke yénam dítak tabunglo, aapí remyakla yéyaryé.

¹⁶E RUUTUM, sikepe tanie turdak, delokke sikeso ngokke aid eteng, yénamem paadung. No ngome eker molangkula turmotoku.

¹⁷Sikena adír paanamde, ngokke ainam legape ito. Nyokpeko Sheol kobulok, no ayala ngome bomsiito. Ngokke paab takamem, no nokke lamkulo mepakto.

¹⁸Kapeila Sheolde nome yidlamang, sinamde nome miri lubi lamang. Séko bulu Sheol kobulo tokdudí, bulu nokke aapí edíng delo míída suyimang.

¹⁹Turna kídí petome min ngok siloke yidnam kísa, nome yidgedune. Nokke aapí edíngem abu kídíe buluke ome-oolo popadung.

²⁰E RUUTUM, no ngome ipítoku, depeila ngolu tapung batla miri luyé. ngoluke turdu teteloope, nokke Kumkeng Ekumlo ngolu nome yidgeyé.

²¹Delo Isaiah poto, “Pik esing abak lok labak kísape tasut teyong delo kyamlíktoka, delo de aiyéku.”

²²Delo Hejekiah bí íngkíto, “RUUTUM ke Kumkeng Ekumlo ngo gídope ingkona iyod koda kaayén?”