Read Alladian ISAIAH 39 Bible Online

ISAIAH 39 - Alladian bible

ISAIAH 39

¹Delo longe kídí delo Baladan ke oo, Babilon lokke roja Merodak Baladan bí, Hejekiah roja ke kinamem tatto. Depeila shiti kolang amanko bím melíkto.

²Hejekiah bí kotoki kídíem aipe kaaríkla, ashéla bíkke kumsungem lengkanto. Bulume bíkke baldín, uun, abal, nampona tél bomnam kídí, kuséréng bomnam kídí, mimak ekurang kídí takam emlang bíkke mirem takamem kaayin moto. Bíkke among yéta takam lolang bíkke roja ekum dungkolo atel kote rumsup mape ato-siro bomnam takamem kaayin moto.

³Depe irodem kaalu miri Isaiah bí roja Hejekiah kíng gíla íngkíto, “Ingkolok de ami kídarde aatone, delokke ingko agom eke bulu podon?” “Bulu mooteng among Babilon lok ngokkíng aadung,” emla Hejekiah pobito.

⁴Delo, “Nokke ekumlo ingkueke bulu kaatone?” emla Isaiah íítoku. “Ngokke ekumlo kanam tabungem bulu kaayinto, delokke ngokke kumsunglo duuna atel kote mepakmape, bulum lengkan kanyinto,” emla Hejekiah bí poyan suto.

⁵Delo Isaiah bí Hejekiah me luto, “Ralyayalumna RUUTUM ke agomem tattola.

⁶Silo loope nokke ekum so duuna ato-siro takamem, delokke nokke abuke mesiinam sérang kídí tabungem Babilon lo giibom díku longeko pííyé. Ekuserang atel kote memayé, emla RUUTUM bí podung.

⁷Delok teyolo nokke agíke adín-iyyi lok olen sunam ome-oo kídíem Babilonpe giibom langkula, Babilon ke roja ekumlo mumbalpe imola bím agér gérbi dope yémoyé.”

⁸Hejekiah bí dem tatla, “Ngokke turdoso midu-mimak kamape aapí eetetpe yéyé,” emla míísula bíme, “Nokke popanam RUUTUM ke agomde aidung,” emla poyan suto.