Read Alladian ISAIAH 40 Bible Online

ISAIAH 40 - Alladian bible

ISAIAH 40

¹Noluke Shédíbí podung: “Aapíe edíílangka, E ngok ami kídía aapíe edíílangka.

²Jirusalem ke ami kídíem ernam agomem lubi langka. Buluke adírrupe yénam longe yéyinkai, buluke paab imem lokke edoem dorbikai, kapeila RUUTUM ke alaglok, buluke paab edo ajéngem bulu adu annyi kope paabanto.”

³Adudko gogla mandung, “RUUTUM ke legape, yépol mooruk amolo, bedangko irung gelangka. Ngoluke Shédíke legape mooruk amolo, jonna bene-bepongko moge langka.

⁴“Kobung-korung takamem neyi sumola, dííte-díítum tabungem atam dope imopala, loorímana bedang kídíem kampope iyisula, kogong-gípong ineme, pelam-pelidope neyi sumo langka.

⁵“Kapeila tani takame kaayin dope, RUUTUM ke angun-abéem lengkanyé.” Sikepe RUUTUM bí agí nappa sulok, polen sudung.

⁶“Ngiitomem siglangka,” emla adudko goglendung. Ngo íngkíto, “Ingkona ngiitom koda ngo sigpene?” Sim siglangka: “Tani takam si neyi-neyang kísape, moonam appun kísa buluke angun-abé de idung.

⁷“Neyi-neyange rukdungku, appune díldungku, kapeila RUUTUM ke ngayab asare buluke teyolo mutdung. Tanisi arope neyi-neyang berokpe idung.

⁸“Neyi-neyange rukdungku, appune díldungku, idola ngoluke Shédíke agome agínpe turyardung.

⁹“E Jayon, ashéng agomem kedonna dííte telo resa bomlangka. E Jirusalem, ashéng agomem ralnampe nok adudem boro molangka. Pesomapeka, erduk lentoka; Judah ke doolung kídíem polangka, ‘Kaatola, noluke Shédíbí píídak.’

¹⁰“Kaatola Shédíbí ralnam ruupe píídak. Delokke bík alage bík legape kelíng-kebang agérem iboyé; kaatola, bíkke amane bíkkíng kadung, delokke ayanem dorku penamde, bíkkíng aamín gedung.

¹¹“Mér kaabomna kísa bíkke mér em, bí dobo-tííboyé. Bíkke alag delo méro kídíem bola, bíkke angkenglo gomlíksula méro kídí takamem eetetpe yéboyé.”

¹²Séko amieda siyéng asiem agíke lakpyo annyilok sugla-sugla sanlayén, demangkom alage yamtarla taleng tesim kílayén? Séko amieda among sokke kédéng sime aapélo joola bomlayén, demangkom dííte-díítum kídíem bekkínanalo bekkílayén?

¹³Séko amieda RUUTUM ke Aidem polík kíton, demangkom bíme luyil-poyilla ikíton?

¹⁴Kényadope séko kíngda RUUTUM bí lupo sudun? Delokke sékoda bíme jonna bedangem sutkandun? Sékoda bíme kénnamem luyilton, demangkom agér ipenamem poyilton?

¹⁵RUUTUM ke keralo asi doodí kísape opín-buang takamde atí sanpenam kamang. Siyéng bograng lokke moopí kídar dete, remík yalumna demul kísane.

¹⁶Lebanonke esing siilungde, runggulo eme romnana esingpe atímang, delokke simon-sili tabungde romnam aman legape atímang.

¹⁷Opín-buang daadi tabunge bík keralo, míípaknam ato kamana kísa idung.

¹⁸Séko kída nolu, Shédíme ruupe suyén? Ingkona mimang koloda nolu bíme ruupe suyén?

¹⁹Mimang pínake, uun lok murtiem píla, baldín lok dakkengem pílíkla, inam mimang kísape bí imanako.

²⁰Séko amie yagorupe opanla, aman bilamape idudí, bí yaapemana esing lok uldung. Bí gairuna mistriem tomlíkla oletkupe mana mimangem imodung.

²¹Nolu kénmanía? Nolu tatmanía? Nolu tani among sime pílennamlok míngkén-tatkén manía?

²²Tani amongke teyong so kana taleng kékon telo asirna roja palenglo duuna bímin pílen ruulenne; rumkílo yéna tanide taruk kísa améngone. Ege donnam kísa bí talengem imone, delokke tombu ekum kísa mone.

²³Bí gai-gakona roja kídíem olet mokune, delokke kebang ruutumkídíem nyokmokune.

²⁴Bulume lelíkla, sidlíkla, delokke buluke amonglo appír pírlíkla iapak rodem, bí asar mutlíkla bulu rukdungku, delokke bulum gumnam asare ampeeme mutpaknam kísa mutbíndung.

²⁵Deena bí sipe podung: Séko kída nolu ngome ruupe suyén? Ngome kídí sune sékoda?

²⁶Noluke amige talengpe kaadung sutol; sékoda takar kídí, doonyi poolo, takam tem pílen tone? Dem takam dem, maglíng kísape gílen bola, mipil-miyong tem amín mínlíkla gogna bímin. Bíkke ralnam pauar loge bulu atel kote nyokmang.

²⁷“Ngoluke bedang gípekue, RUUTUM ke keralok runyok gedung; ngoluke adír kídar sime ngoluke Shédí bí aang kigemang,” emla E Israel kape nolu ebín-ebonpe lukan?

²⁸Nolu kénmanía? Nolu tatmanía? Tani amongem pílen rulenna, RUUTUM bí turyarna Shédíe. Bí edílokom adung-apéé manako, delokke bíkke kénnam dem, sékokom kénpíng-míípíng mínna kamang.

²⁹Bí ralmana, bengalna kídíem, ralnam kadope ruubine.

³⁰Yaamé koo kídíete bengalla apéédung, delokke tupsula oletdung.

³¹Idola séko bulu RUUTUM kíng mííbomsula toyadudí, buluke ralnamem aní moyéku; bulu pemí kísa alap lok, teyongpe deerepyé, bulu dugtí dokom apéémayé, bulu gítí dokom ledír-gídír sumayé.