Read Alladian ISAIAH 41 Bible Online

ISAIAH 41 - Alladian bible

ISAIAH 41

¹Shédíbí podung: Mootelo duuna among kídía, ngok keralo asoope ilangka! Ami kídarke ralnamem anípe isi sumo langka; bulume kerang so aala posu molangka; Kebang lubo sudope kaju gídum sulajun.

²Lekor miyonglo midu-mimak em ikumna, sanggodan lokke ami konem, sékoda gerep motun? Opín-buang roja miyonglo ikumdope, sékoda bíme ruutun? Bíkke yoksae takamem deemul kísape imodung, delokke anne ereenem asare mutbomnam kísape, bíkke yokmo apname idung.

³Bíkke enkímangko bedalote, tarí-tape atí kamape, bí miru kídíem monbomla idung.

⁴Sékoda sike takamem imone? Sékoda siirum siirumlo, tanike yéyi-yésangem ruune? RUUTUM ngomin kerayalume, delokke méélam yalum loope, RUUTUM ngomin iyéne.

⁵Mootenglo duuna among takame, ngok inamem kaala pesoríankai, depeila bulu takame píídumsula aayinkai.

⁶Mipil-miyonge igul bosula, “Aapíe edíng langka,” emla erpe pobo sudung.

⁷Mistri kídíe uun agér ineme, aapí edíídope pobo sukai. Martul demna kídíe demda sukenglo gagbomna dem, “Baasut sunam si aido,” emla pobo sukai. Yogmo kídíe erappe, poduk bosula murti mimangem, olet madope, edíídope kili lok, demlíkkai.

⁸Idola nolu, E Israel ngok béérang, ngok angong Abrahamke otíng-oyin nolu, ngok ullen sunam amie.

⁹Nolum ngo tani amongke yérílok tomlen sula, mooteng yalumna among kéényung lok, laalen sula, “Nolu ngokke béérange,” emla posuname. Nolum ngo mepak sumang. Nolu ngok agíke ullen sunam opíne.

¹⁰Nolu pesomapeka. Ngo nolukíng yémín gedung. Ngo noluke Shédíe. Nolu aapí-aange améng mapeka. Nolum ngo ralmoyé, delokke igulyé. Nolum ngokke deena alag sok gagdíng bomyé.

¹¹Nolum marbomna kídíe, ikum kosunam annyingem paayé. Nolum mimak iabomna kídarde nyokyé.

¹²Noluke miruem nolu mata godokom, bulume nolu paayimayé, nolum mimak ina kídíe, atí kaimayé.

¹³Kapeila, “Pesomapeka, nolum ngo igulyé,” emla nolum gagbomna, ngomino noluke Shédíbí.

¹⁴E améngona Israel nolu, tapum kísa ansoona Jakob nolu, ngo agísue nolum igulyé emla, nolum mopítna, Israelke Deena RUUTUM bí agísue polen sudung.

¹⁵Ngo nolume iipang ratna, anírupe pílíknam, ali-ayé kétna kiipar kísa imoyé. Nolu dííte-díítum kídíem kétjém bomla, demul alem kope iyé.

¹⁶Nolu dekedem yapla-kapla iyé, delokke asare dekedem mutpak bomyé. Gumname dekedem elo-belo gyanggo líkyé. Idola nolu RUUTUM kíng, Israel ke deena bíkke angun-abélo ashéngla yéyé.

¹⁷Edílo opan-aréne tíílílok nappange ereela asi matala igoyédí, Israel ke Shédí ngo bulum mepak sumape, RUUTUM ngo buluke kumnamem tatbiyé.

¹⁸Ngo ereena, kedonko mooruk amolo, delokke yiibe amolo, asi korongem biilen moyé. Ngo yépol amongem asi paatangpe imola, ereela pamkina amongem korongpe imoyé.

¹⁹Ngo yépol among lo, sidar esingem, akasia esingem, olib esingem, delokke mirtel esingem garmoyé. Ngo loorímangko among lo, pir emla sipres esingem, siinang esing lo garpe sumoyé.

²⁰Dekepe ikolok Israel ke Deena RUUTUM bí pílen rulentung emla, daadi takame kaayin-kényinyé.

²¹Jakob ke Roja RUUTUM bí sipe ludung: Mibo-miying uyu kídí noluke gusor kebangem bomala, gairupe tokkí-hangkí sunam agom kídíem bomatoka.

²²Noluke mimang kídíem bomala, yépenam longeke legangem, kaalu-polu kílangka. Ngoluke legang kídíe, kape iyékudí emla kéndope, kerangke legí-sigangem pokan bilangka.

²³Demangkom angkupena atoem, keralo ingko kodí iyéne, dekedem kaalula pobi langka. Depe imílo nolu uyue emla ngolu kangkényé. Ngolum pesorían dope, aina atodokom, demangkom atímana dokom ngolum atínako lengkan kílangka.

²⁴Noluke agér-anam kídarde, atísin kamana, are kamana míípak penam mílíe. Séko bulu nolum kumsu dudí, bulu belum runame.

²⁵Ngo sanggo elo duuna ami konem ulto; bí línggíng danlok mimak itok bomyé. Kédéng yupyangem, peking píne ibét-iyétla inam kísa, de amide roja kídíem, yupyang kísa ibét bomyé.

²⁶Ngo aroe emdope noluke aralo, sékoda kaalula sikepe, agér ikupenamem pogeton? Noluke dekepe ponamko, sékote tatna kamang, delokke nolu dekepe poto emla sékote pogena kamang.

²⁷RUUTUM ngomin Jayon em, sim legang sim kerayalumpe pokan gene. Ngo kotoki ko Jirusalem lo melíkla, “Noluk ami kídíe píídungku, kaatola, bulu ekumlo píngkaku,” emla poge mokune.

²⁸Uyu kídíem ngo kanggong sulate, bulu sékote agom polana kamang, delokke ngok íngkínam em bulu, sékote poyan sulana kamang.

²⁹Uyu kídar tabungde agér atí bimane, bulu atí ilamane, de murti mimang kídíde atí ralmang, delokke araana asarpe eke.