Read Alladian ISAIAH 43 Bible Online

ISAIAH 43 - Alladian bible

ISAIAH 43

¹E Jakob nolum pílenna, E Israel nolum ruulenna, RUUTUM bí sikepe podung: “Pesomapeka, ngo nolum ipítto. Nolum ngo amín lok gogla tomto, nolu ngokke.

²Noluke asi koongkolo, ngo nolukíng yémín gedung, noluke korolo gíyémte, asie nolum yubom mayé. Nolu eme aralok gídokom, eme de nolum gumayé.

³Kapeila nolum mopítna, Israel ke Deena, noluke Shédí bí, RUUTUM ngomin. Nolume ipít legape Ijiptem ngo biyanyé. Noluke ayanpe Sudan mela Shebame líkpé suyé.

⁴“Ngo nolum ayanam legape, nolu ngok kangkolo, airupe bomsii penam ato ekurang kísane. Depeila noluke yénam legape, delokke ayanpe, abíd opín ami kídíem ngo líkpé sulado.

⁵“Nolu atí peso mapeka, kapeila ngo nolukíng duumín dung. Ngo nolume, delokke noluke ome-oo kídíem sanggo-anggodan tabunglok laadum suyé.

⁶Ngo línggíngem luyé, ‘Bulum melen langkuka,’ delokke sokkoem luyé, ‘Bulum lutum mapeka.’ Tani among kéényung lokkai, ngokke ome-oo kídíem dumsu moyéku.

⁷Ngokke amínem mínna mipilem, ngokke angun legape pílen sunamem, ngokke supe rulen sunamem, ngo laadum suyin yéku.”

⁸Amig kadulate migmana kídíem, nyorung kadulate ruubéna kídíem, gogdum suyin aato.

⁹Opín takamem kebang baapomlo tomdum suto. Yépenam longe legangem, buluke uyuem pomo kíto. Supakke agér-anam sim uyu kídíde, porung gela ibitonía? Uyu kídíde, buluke hakiiem aabola buluke aronamem lengkan kíton? Ami abíd kídíe dekedem kaala-tatla, “Dekede arodo,” emdope uyu kídíde, ikan bipe aiyé.

¹⁰Israel teyolo RUUTUM bí sipe podung: “Nolu ngokke hakii kídíe, Ngomin bí emla daadie kéndope, nolute arope míídope nolu ngokke ullennam, delokke ngome agér ibidope ruulen suname. Ngok kékonlo abídyang Shédí kamang, delokke ngokke méélam kerang lote, anguyang kamayé.

¹¹Ngo, ngo petommin RUUTUM bí. Ngok kékonlo anguyang ipítna kamang.

¹²Nolum uyue yébomang, ngomin yébodune, emla ngo popala, lengkanla mopítto. Ngomin Shédíbí. Nolu ngokke hakii kídíe,” emla RUUTUM bí polendung.

¹³Arope konnyi-mennying lokkekai, ngomin bí. Edílo ngo agér iyédí, sékoda deme ikup-ilatla ilayén? Ngokke alag aralok sékoda, mopít layén?

¹⁴Nolum ipítna Israelke Deena, RUUTUM bí sipe podung: “Noluke legape Babilon lo ngo ami melíkla, Babilon ami kídíem, buluke míngkím subomnam jaji loge dugnyok gena ami kísape bulum umla boma mayinyé.

¹⁵Ngomino noluke RUUTUM bí. Noluke Deena bí, Israel em Pílenne, noluke Rojae.”

¹⁶RUUTUM bí sipe podung: “Bí siyéng asi raadalok bedang ila, deddína asi silungem taapan subila, gípekuem ruubito.

¹⁷Bí deddína maglíngem, guré em guré-gaariem nyokyin moto. Aséklo eme gunem mutmitnam kísa, bulu edílokom gerep layimape, asi rumkílo duuyarkai.

¹⁸Idola kerangke itonam ato-sirolo, umda-datí sumape, yéruk tonam legalo gagda-datí sumape, dekedem mitpan sulangka.

¹⁹Kaatola, ngo ato aníko idungku; de supak bukrepkai, nolu kaamania? Ngo yépol lo bedang ko modung, delokke mooruklo korongko biimodung.

²⁰Ménsurung kídíe lang pettun kídíe ngome yidgedung. Kapeila ngo yépol among lo, mooruk amolo asi kadope ruubitung, dekedem ngokke ullennam, ngokke ami kídí legape, bulu asi tíídope ngo ibidung.

²¹Bulu ngokke agíke pílen sunam ami kídare, delokke bulu ngome yidgela miri luyé.”

²²RUUTUM bí podung, “Idola Israel nolu ngome apéé bomsuto; delokke nolu ngome kumsu mato.

²³Nolu ngome ipak ibila, mér em romnam aman pete boma bimato. Ngo nolume arí kana nampona lok, nyottí bilangka, demangkom ali-ayé amanlok bomtí bilangka, emla nolum tebeg along gedope, delokke tatyém dope lutí kímang.

²⁴Ngok legape nolu arí namponem rebi kímang, demangkom noluke simon-sili una adínlok ngome aang apíípe idope bikímang. Idola deke ayanpe, noluke paab lok, ngome tebeg motíla, Noluke imem-samem loge ngome apéé modung.

²⁵Depeilate noluke paabem mesam bina, Shédímin ngo. Ngo sikesim idung kapeila, ngomin bí. Noluke paabem ngo sanmayé.

²⁶“Ngok keralo noluke kerangke, legang kídíem lusi-lumo kítoku. Kebang ekum lo ngolu akmín sulaju; noluke ainam legangem, kebanglo lengkan kíto.

²⁷Noluke kerayalum abude paab igeto. Noluke kebang ruutum kídíde, mirolpe rolto.

²⁸“Noluke miro kídíe ngokke deena ekumem deema moto. Depeila ngo Jakob ke teyolo, atung-arééyém bomala, Israelme annying sudope ito.”