Read Alladian ISAIAH 44 Bible Online

ISAIAH 44 - Alladian bible

ISAIAH 44

¹“Idola ngom agér ibina Jakob, ngokke ullen sunam Israel, tatlangka!

²Nolum ane akiilo pílenna, ruulenna delokke igulna, RUUTUM bí sikepe podung: Ngome agér ibina Jakob, ngokke ullensunam Jeshurun no pesomapeka.

³Kapeila ngo tíílína kédénglo asiem purlíkyé, delokke ereena amolo, korongem biimoyé; Ngo noluke otíng oyin kídílo, ngok Aidem purlíkla, utepooroem ruulíkyé.

⁴Bulu asi bitínam ardana íími kísayé, delokke korong abelo garna esing kísayé.

⁵Buluke aralo akone, ‘Ngo RUUTUM ke,’ emsuyé, akone Jakobke amín loge mínsuyé, delokke akone Israel amínem gedola, agí alag lo RUUTUM ke emla soktam palíksuyé.”

⁶Ralyayalumna RUUTUM bí sipe podung: “Ngo mino kerayalume, delokke ngo mino méélam yalume; ngok kékonlo abídyang Shédí angu kamang.

⁷Ngok kísanako akoyang kadunía? Kadumílo bí polen sutola. Ngokke ami kídíeme tomlendo delokkekai ila, ingko-ingkoedí itone, dekem lang, angkupena longe, kape iyékudí dekedem, bí kaalula pokanpe aido.

⁸Pesomapeka. Sikesime kerapekai ngo, pokan bimatonía? Nolu ngokke hakii kídíe. Ngok kékonlo abídyang Shédíko kadunía? Angukon yang lííreng ko kadupe, ngo kénmang.”

⁹Mimang pína ami takamde are kamane, delokke buluke gairupe mííbomnam uyu kídíde agér bimane. Séko bulu dekena uyu kídíem kumdudí, bulu kénmane, migmane, delokke Shédíke ayang luyulo yéne.

¹⁰Mimangem píla, deme uyu kope kumsula inamde atí paapek bimang.

¹¹Dekena kumna mipilem annying moyéku. Dekeme pína kídarde taniemin, bulu takame kebang keralo dagang kítoka, bulu pesoríane ila, Shédí ke ayang luyulo yéyé.

¹²Yogmode arem ool koneme emelo baalíkyé. Delo bíkke alag delo martul bottenako bomla baanam ool deme moi-muang kadope demlíkyé. Bíkke dekepe agér idudelo bí apééye ila, tííling-kenoe idung.

¹³Esing mistride esing ool deme sapyé. Delo moi-muang em gídod líkyé. Depe ipala bíkke inana ekurang delok, lablíkla, gatlíkla, ruuji-ruma bomdola, nuulíkla, kamporuna tani mimang kope molenyé. Deme ekum arangke kumpom delo leelíkdope idung.

¹⁴Bí sidar esing, demangkom ok, demangkom saipres esing kídílok, moonamlo matala agér inape pala bomadungku. Demangkom bí míínam esingko ledung, delokke deme pedonge okatla siisa modung.

¹⁵Delo de ami delokke eme parnana esingpe ila, bí esing delokke ol konem agíem iigang pamsunape ila, eme parla burla goona ettíngem pamdung; delokke de ami de uyu mimang koteng ol kon delok kumsupe pídung, bí mimangko roolen pala, delok keranglo gubaadung.

¹⁶Esing olekon delok bí eme parla, adín keenala, aang píídope donala, iigang dope pamsunala, “Eme si aipe írdo, ngo supak iigang kaku,” emla agíe lusudung.

¹⁷Esing delokke kerangke ol kon delok bí mimangpe píla, delok kerang delo gubla kumsula sipe emyé, “Nomin ngok uyue. Ngome ipíttoi.”

¹⁸Sikena ami kídíde yagorupe bopolla, buluke iyi-isange kape idudí deme kénsumang. Buluke amige aroem kaapamang, delokke aapí-aange kénpamang.

¹⁹Mimang pína delokke akon pagekom, “Esing sokke attung konem ngo emepe parla, attung konem burla goona ettíngpe pamnala, adín keenala donato; attung konem mimang kope pína pala supak ngo esing alop konem gubla kumsudung,” emla míísukíla, kénsukíla ina pinnyo kana kamang.

²⁰Bí mepiem dola duudung; bopolna aapíe bíme gímem modung, delokke bí agíem ipísulamang, demangkom, “Ngokke lakbík so gagnam si aromana ato mangkua?” emlate pola sumang.

²¹E Jakob, sike sim no míípa sulangka. E Israel no ngom agér ibine. Ngome agér ibidope ngo nome pílento. Depeila E Israel, ngo nom mitpan sulamayé.

²²Nokke agér atímangem, doomugem gyabín monam kísa, ngo gyabín moto. Nokke paabem, nyokkuna roh tangar kísa, ngo nyokmotoku. Ngokkíng aalat sutokuka, kapeila ngo nom mopítto.

²³E teyong among, ashéng lok miri lulangka; E sutkin kédéng, ashéng lok ersalangka. Dííte kídí, moonam kídí, esing kídí nolu ashéng miriem lulangka. Kapeila RUUTUM bí Jakob me mopítto, Bík angun-abé em Israel ke teyolo, lengkan líkkai.

²⁴Nolum ane akiilo ruulenla, mopítna RUUTUM bí sipe podung; Ngomino RUUTUM bí. Ngo ato-siro takamem pílenne. Ngo petom kédéng sim molenla, agí petome talengem ruulenne.

²⁵Ngo alag kaana kídarem bopol mola, takar kaana kídíke kaalu-poluem pomem mola, kénna kídíke agom-aangem pomol-poyol mola, bulu takamke gyan kénnamem, bopolpe imone.

²⁶Idola edílo ngom agér ibine, kaalu agomem poyédí, edílo ngo kotoki melíkla, ngok aapí míínamem lengkan yédí, deke takam dem ngo aro modung. Jirusalemlo amie duuyéku, emla ngo podung. Judah lokke doolung kídíem lekoda doolungpe duumo yéku, delokke dekede byakruk tonamlo, dunga bomyéku.

²⁷Ngok agom lulíglok, siyéng lokke lang korong kídíke, asie kaimape idung.

²⁸Ngo Sairas me, “Ngok legape no among yétaem yéboyé, ngok míngkorpe agérem no iyé, no Jirusalem em lekoda, isi-simo yéku, delokke Kumkeng Ekum lokke dakkengem, pílen yéku,” emla lulígne.