Read Alladian ISAIAH 48 Bible Online

ISAIAH 48 - Alladian bible

ISAIAH 48

¹Tatlangka sime, E Israelke amínlok mínnam Jakobke erang kídí, delokke Judahke otíng-oyin kídí nolu tattola; Nolu RUUTUMke amínlok pésula, Israelke Shédíme kumsudung; idola nolu aro loklang, deenam lok imang.

²Nolu agísuem deena doolung lokke amie emla lusudung, delokke Israelke Shédí kíng, sékoke amín emdí maglíngke RUUTUM emdune, delo míída sudung.

³Legí-sigang kídíem, konnyi-mennyingkai, ngo lurung bila bulum kénmoto; delo ngo menang asak dekedem, kalen moto.

⁴Nolu arem kísa edííla, pitol kísa tolla, noluke aapíde tolneke, emla ngo kénto.

⁵Depeila “Ngoluke mimang kídíe, delokke roolennam mimang kídíe, demangkom yollennam mimang kídíe dekedem ito,” emla nolu manma dope deke delokke imang adapekai, noluke angkupena longelo, legang ikupenam kídíem ngo kerapekai lurung geto.

⁶Ngokke lurung genam ato takame, ngokke pokampe iyinkai. Ngokke lurung namde aroe emla nolu togepe aido. Supak ngo angkupena aní legangko popayé, deme kerape ngo lengkan mato.

⁷Kerapekai ikímanam atoko, ngo supak ilentung. De katuamílo, “Ngoluke kénrukko,” emla nolu poyai.

⁸Nolu agínpe mirolpe ineke, depeila ngo nolume arope míímang. Legang sime nolu kénkímang, delokke sikesi noluke nyorulo píngkímang.

⁹Ngokke amínsu legape, delokke ngom yidgenam legape, ngokke marnamem itum supodung, delokke nolum nyokmomayé.

¹⁰Eme mepomlo baldínem deedope yolnam kísa, ankí-kenoke emelo nolum ngo ikang kíto. Idola nolu loorí tete mang.

¹¹Ngokkesu legape, ngokke agísu legape, sikesim ngo idung. Kape ngo agíeme amín aimanako kamoyén? Akonlo ngokke angun-abé em melík mayé.

¹²“E Jakob, ngok goglennam Israel, ngok agomem tatlangka! Ngomin bí, ngo kerayalume, delokke ngo méélam yalume.

¹³Among sokke dakkengem, ngok agí alage pílíkto, delokke taleng tesime ngok agí alage lotta dope ito. Edílo ngo gogtodí, bulu takam ngok keralo dagato.

¹⁴“Nolu takam dumsula tatlangka. RUUTUM ke magpépe ulnamde, bíkke míídupe agérem ibila, Babilonem mimak iabomyé, emla ingkona mimang uyueda porung gekíton?

¹⁵Ngo agísue bím pone, arope ngo bím tomne, bíkke agére apíng aloodope, ngo bím langaayé.

¹⁶Ngok anínso aala ngokke ponamem tattola, kerapekai ngo agom-aangem rumnyok kímang; dekede apíng ayardope ngo imodung.” Supak Ralyayalumna RUUTUM bí, bíkke aidlok ngome melíktung.

¹⁷Israelke Deena, nolum ipítna, RUUTUM bí sipe podung: “Noluke gíperungko bedalok ruulíkna, delokke noluke legape aiyalumna ato legangem poyilna, ngo mino RUUTUM noluke Shédí bí.

¹⁸Nolu ngokke lulígem aipe tatgap tuamílo, korong lokke asi ansiina kísa noluke aapíe eetetpe iyai, delokke siyéng asi kísa noluke deenamde iyai.

¹⁹Noluke otíng-oyinde, ngok keralo nyokmape, buluke amíne duuyarla, sanam yimanam petu-tumí kísa, demangkom sulli kísa iyai.”

²⁰Asarpe Babilon lok gílen langkula, sikena ashénam agomem ashéla, gogyingpe goggo langka. “RUUTUM bí agíke legape agér ibina Israelem ipíttoku!” emla tani among yéyin kéényung loope pokan goolangka.

²¹Yépol amolo RUUTUMke bulum gíboduem, bulu asi tíílíng atí kamato; bí líírengem barpan sumola, asiem purlen mola, buluke legape líírelok bí asiem biilen moto.

²²“Atímana ami legape edílokom, aapí eetet emname kamayé,” emla RUUTUM bí podung.