Read Alladian ISAIAH 49 Bible Online

ISAIAH 49 - Alladian bible

ISAIAH 49

¹Mootelo duuna opín kídía, delokke siyéng bogralok moopí kídía, ngok agom sim tattola: Ngom omang adapekai RUUTUM bí, ngome ulto, ngom orong lokke ila, bí ngok amínem míntídung.

²Bíkke alag ugyum aralo bí ngome rumnyok tuula, píratnam yoksa kísape bí ngok nappangem píratto. Bíkke gatbung aralo bí ngome rumnyok tuula, yarjonam yokmope bí ngome imoto.

³Bí ngome, “E Israel, no ngokke agérem ibidope tomlenname. Depeila ngok angun-abé em nok teyolo ngunkan biyé,” emla lupoto.

⁴Idola ngo, “Atí legang kamape, ngo agér ibito, delokke ngok ralnamem ítsampe imoto. Idola ngokke paape namde, RUUTUMke alaglo kadung,” emla poyan suto.

⁵Ngome omang adapekai, RUUTUM bí bíkke Israel amiem, aalat bodokupe, Delokke rego mipilo duuna takamem laadum suyin dokupe ngome bí ruutubong. RUUTUM bí ngokke ralnam lerínge.

⁶RUUTUM bí ngom lupoto: “Ngokke mesiinam Israel kídíem, bomang dokupe, delokke Jakobke opínem turmo dokupe, agér ikolo ibinape nokke ngom inamde, nok legape ansoona agér komai; tani amongke kéényung loope, ngokke turnamem boma bidope, mibo-miyingke angunpe ngo nome iyé.

⁷“Israelke Deena, ipítna RUUTUM bí opín-buang takamke míípaknam, among takamke aknam, yébona kídíke béérang em sipe podung: Noluke kímtepe gerep namem, roja kídíe kaayinyé. Roja oo kídíe kaala, kumsula gubang geyé. Kapeila agínpe agíke agomem mesing suna, Israelke Deena RUUTUM bí nolum ullentung.”

⁸RUUTUM bí sipe podung: “Ngokke ayasudí longelo, noluke agomem ngo poyan suyé, ipítdí longelo nolum ngo igulyé. Nolum ngo kaabomla mopítyé. Nolukíng ikengdola, opín-buang takamlo daapongko ibosuyé. Supakke kumruk-moorukpe ina amonglo, nolum ngo lekoda dungaamoyéku.

⁹Pateklo duunem ‘Asarpe melentoku,’ delokke kaamolo duuna kídíem, ‘Angunlo lentoku,’ emla ngo poyé. Neyang kana díítumlo dogoona mér kísape bulu iyéku.

¹⁰Bulu tíílíng-keno kaimayé, delokke doonyi pamkie lang yépolke pamkie bulum pamtí bomyimayé. Bulum ayana Shédíbí bulume, bedangem sutkan biyé, delokke reyina sirung asilo bulum gíboyé.

¹¹“Ngokke dííte kídíem bedape ibiyé, delokke bortakna bedang kídíem kedonmoyé.

¹²Bulu mooteng amolok píídumsuyé, ayokone línggíng lok, ayokone anggolok, delokke ayokone Aswan[1] among lok pííyé.

¹³Depeila, E teyong among kídía, ashélok goglangka, E tani among, érla ashélangka; E dííte kídí, miripe goglen langka; kapeila RUUTUM bí agí amiem, ayala ngiisukaku, delokke ami kídíke adírem kaabi kaku.”

¹⁴Idola Jayon bí sipe ludung: “RUUTUM bí ngome mitpansula mepakto.”

¹⁵“Agíe olensula, anyun sunsasula inam koo dem anede mitpan sulayén? Dekena anete mitpan sunamko kadokom, nom ngo edílote mitpan sumayé.

¹⁶Nom ngokke lakpyo araso atyin líktung; nokke doolung etorde, ngok keralo agínpe kadung.

¹⁷Nome morep kupene píídak, delokke nome nyokmone gídakku.

¹⁸Nok amige kanggo sutola, nok ami kídíe dumsu dungku, bulu ekumlo píídum sudungku. Ngo turna Shédípe idu tetedem, nyamenge lungguem kape kísa ashéla, gedakdín, deke kísape nokke ami kídí teyolo no míngkím suyé.

¹⁹“No loorí yimape kumruk-moorukpe ituai, nok asi-amonge ereetuai; idola nom dona kídíe mooteng yéku. Delokke nok ami kídíe, nok teyolo bíínga bomyéku.

²⁰Nokke ankang sula ido delo ome-oo onam kídíe, ‘Ngolu yébo supeko moolop kaimang, duupe-dagpekoem bojéko ngolum ruulen bilangka,’ emnamem no agí nyorulo tatpa suyéku.

²¹Delo no agísuem sipe lusuyé: ‘Sim koo kídar sim sékoi ngome obiton? Ngo mepaknampe ila, mibo-minnompe yégola, ankí-adír aloola, ome-oo omana amikuai. Ngo agí petome yésunakuai, idola sim koo kídí sim sékoi, usaa bitone? Kolokyi bulu aatone?’ ”

²²Shédíbí sipe podung: “Kaatola, ngo mibo-miying amiem tomla, ami keralo ngokke jandiem tungonla, edílo ngo iyédí, delo bulu nokke ome-uem bola aaboyé.

²³Roje buluke abu busope ila, ranie buluke ane nesope ila, bulum isaayé. Bulu nok keralo amonglo gubala, nom kumsu-joosuyé. Nokke ale akangem bulu arbínyé. Delo mino, ngo RUUTUM bí emla, no ngome kangkén yékune. Séko buludí ngokkíng míída sudune, bulu edílokom bursumayé.

²⁴“Líínam sérangem maglíng aralok, no laalen layén? Mikírna rojake abílpe umnamem no mopíla laalen layén?

²⁵RUUTUM bí sikepe podung: ‘Dekepe supak iyéku, maglíng aralok líínam sérangem, laalen yéku, delokke abílpe umnamem mikírna, rojake alag lok laalen yéku. Nome mimak inem ngo mimak imínsuyé; nokke ome-oo kídíem ngo mopítyé.

²⁶Nome irééna kídíem, agí adínem dosu dope ngo iyé. Bulu apong lok tíngír suna kísa, agí iyyi lok tíngír suyé. Delo takam tanie, nome ipítna, RUUTUM bí ngo emla kényinyé, delokke Jakobke, Ralyayalumna Shédíbí ngo emla kaayinyé.’ ”