Read Alladian ISAIAH 5 Bible Online

ISAIAH 5 - Alladian bible

ISAIAH 5

¹Ngokke mííbosunam angongke onggur rikséngke legangem miripe ngo lubiyé: Ardana adi among kolo onggur ríkséngko ngok angonge kadung.

²Bí deme ibín-sabínla, elíng kídíem ikutla, delo gai-gaina onggur em lelíkto. Bí delo ippo kote políkla, onggur alangem ilen peko arung ko kooto. Bí toyala gaina ayém matato, idola ayé takamde kungkai.

³Dekepe ila ngok angongde poto, “E Jirusalem lolang Judahlo duuna kídía; ngok ríkséng kelang ngokke pénsamlo kebang lubi yika.

⁴Ríkséng teyo delo, ngo ilíkram namko katonía? Dekemílo ngokke míínamnam aina onggur em éébimape, kape kuuna onggur em éébikan?

⁵“Ngo ngokke ríkséng teyoso sikepe iyé: Ngo sokke etorem laabín yéku, delokke motum dope língkumpe kumgongnam kídíem kom bénpak langkula, moonam simon-sili kídar em domola, tujém-tuyém moyéku.

⁶Ngo ííng kídíem sim buklum moyé. Ngo onggur ane kídíem ngélong-ítlong yimayé, delokke leríng dem kédéng gelík yimayé; delok ayanpe ngo tanyum-tatkéem, dekedem buklum moyé. Ngo doomug kídíem kom delo pedong olík madope itumyé.”

⁷Ralyayalumna RUUTUMke onggur ríkséde Israel opín-buang kídíe; Judah ami kídarde bíkke lelíknam onggur esing kídíe. Bí ainamem kaalítuai, idola bulu yilí-biimín sukai. Bí deenampe yénamem kaalítuai, idola buluke ankí-kenola ulo gognamem tatpangkai.

⁸Reyubrupe adír pangku pena nolu, noluke kasuko teyolo ekum-arík em nolu retemdung. Idola sékote deke delo duula yimape agí atele duusudíe píídak.

⁹Ngok tatkolo Ralyalumna RUUTUMbí popadung: “Aropakpe, kampona ekum kídar delo duubomna kaimayé, delokke gai-gakona ekum bottena kídarde kumrukpe iyéku.

¹⁰Héktor íying amonglo onggur inam lokke alange litar íying petomko apongem lenbiyé. Lelíknam 180 kilogram amí delok, aliem 18 kilogram petomko paalen yéku.”

¹¹Séko bulu rokomope gerepla, tíínamlo dugtadudí, séko bulu yoh raajang loope tííla-dola apong lok duududí, bulu reyubrunam adírem paayéku.

¹²Bulu batnam tapungem, konggangem, dumdumem, bikul tapungem, delokke apongem, doman-tíímanlo erap bomdung, idola RUUTUM ke agér inamem, bulu atí kopete mínggemang; bíkke alag lokke iyod kídíem kénkípe emlate imang.

¹³Depeila ngok ami kídíke kénmanam legape, bulum mibo miying amolo monnyokyé. Delo bulu asi tíílílok, akii kenolok sinyok gooyé.

¹⁴Depeila ago arung ete ami dolínge yagoyape ila, bíkke nappangem koyabila, delo Jirusalemke miro kídíem lang adud-ayude tatla yimape muuyamna mití-maglíngem métyinyé.

¹⁵Depeila míngkím-kangkím sula yéna, ami aapíem amé moyéku.

¹⁶Idola Ralyayalumna RUUTUMbí raada-pénsam aroem lengkanla, bíkke mite-migompe yénamem lengkan subiyé. Deena Shédíbí agíke deenamem lengkan subiyé.

¹⁷Delo mér kídíe neyi-neyang dogo penamem paala, dogooyéku, delokke sobén béno kídíe luune kumruk delo dota gooyéku.

¹⁸Séko bulu atímape rultígola, yatnam-panam paab mílílo yétí goola idudí, bulu reyubrunam adírem paayé.

¹⁹Nolu sipe emdung. “RUUTUMbí agíe dekepe iyé emla mansunam dem menape ngoluke kaado so ipe aido, Israelke deena Shédí bí bík mííbomnamem menape ipípe aido. Depe inamem ngolu kaala, bík aang aralo genamem ngolu kénlaju.”

²⁰Nolu reyubrunam adírem paayé. Nolu ainem atímang emla, atímanem aine emla; kaamoem angun mola, delokke angunem kaamo mola; tiinem kosang mola, delokke kosangnem tiimola ineke.

²¹Nolu reyubrunam adírem paayé, kapeila nolu agíem gairuna, kénna-paanape míísuneke.

²²E apong lokke miram kídía! Tíínamem ríkyél sukolo kera-nappang erbomna kídía! Reyubrunam adírem nolu paayé.

²³Nolu agíem anyongolok rekosula, atímanem melen langkula, aina amiem pénsam-raadang kebangem lubimape idung.

²⁴Depeila kapekísadí ammunge lang íími sanne emelo yagorupe guko sududí, delok kísape noluke appír kídíe yaayé, delokke noluke appun kídíe ereela asarlo mutnyok kosuyé. Kapeila nolu Israelke deena Shédíke poyilem tatmato, delokke Ralyayalumna RUUTUMke ayonem mepakto.

²⁵Depeila RUUTUM bí ami kídí teyolo marla, bík alage dempe emla lengordung. Dííte kídíe taronpe tonyé, delokke sina kídíke simange bedu-bedalo deemana apompe dooyé. Depe ilate RUUTUMke aklínge aikumayé, delokke bík alage lengor teteyé.

²⁶RUUTUMbí jandiem tungonla mooteng lokke opínem tomadung. Tani among sokke kéényulok aadope bulum mudbidung. Kaatola, bulu jonnam rupe, menarupe aadak!

²⁷Buluke aralo sékote immi-iptapla ina kamang, sékote apééla tupsu-tubrula imang. Uug emte taalu suna kamang, delokke leyugete bétna kamang.

²⁸Buluke iyyi aanem tulíkkai, delokke buluke yogmo kídarde aar kana rungeke. Buluke guré ale kídarde asirna elíng kísape idung, delokke buluke gaari kelong lodudde asar gumdud kísa idung.

²⁹Buluke maglíng ngomdudde myomur lokke ugla, simonem rekpet tula ngírla, sékote ipít layimadope joobom kuna kísape idung.

³⁰Dekepe ido longe delo, siyéng lokke sipar taadud kísa, buluke ngomdudde iyé. Delo amongem akone kaasuyém, among delote bí ankí-keno emlang kaamoem kaapayé, kapeila delo longe delo longe angunemte biisamna doomuge dakkapla kaamo moyé.