Read Alladian ISAIAH 50 Bible Online

ISAIAH 50 - Alladian bible

ISAIAH 50

¹RUUTUM bí sikepe podung: “Noluke aneme mepak kunana lokke kakode ingko loda? Demangkom ngok ajéng langket suko séko kída nolum ngo abílpe kolíkton? Dekemang, noluke paab legapemin, nolu ami rumkílo yédope nolu gítone. Delokke noluke isi-siyo legapemin nolum melíktone.

²“Edílo ngo píítodí, kape midum atel kote duurík suna kaman? Edílo ngo gogtodí, kape midum atel kote, ‘Oi,’ emyan suna kaman? Nolume repít lenpe, mopítpe, ngok alage andeng dunía? Ngokke agom ansoo pokolok, siyénge oola, koronge yépolpe ilangkula, asi kaimala, engo takame siyindung.

³Duuk-adírlo ankí gasor polumnam kísa, talengem kaamolok ngo polum dung.”

⁴Míídírna kídíem aapí ralmo dokupe, agom popenamem Shédíbí ngome luyilto. Rodípe bíkke aní-aní poyilem ngo erla tatdope, bí ngome imodung.

⁵RUUTUM kelok gílen kumadope, demangkom bíkke mirolpe imadope, bí ngome kénnamem ruulíktung.

⁶Ngome demna kídíem ngo lamkuem gebito, ngokke nammídem pulennem, kémtaem geka subito, delokke ngome lupu-luléla takil sukkatnem, ngo migmoem geka subito.

⁷Idola buluke ipu-ilé kídíe ngome atímape imomayé. Kapeila Shédíbí ngom igul dung. Dekedem ngo haggap gedung, kapeila annyingem ngo paamayé;

⁸Ngome imem kamang emla elíkna bí, ngokke anínlo kadung. Sékoda ngome atímang emla lulayén? Migmoe geríksula kaarík sulaju. Sékoda ngome atímang emla ludun? De amide ngome kebang irík supe aiyé.

⁹Shédíbí agísuei ngome igulla tolbi dung. Sékoda ngome atímang luketyén? Bulu ege ínna kísa iyéku, delokke tapume bulum dobom yéku.

¹⁰Noluke aralo sékoda RUUTUMme pesola, bíkke agér ibinake agomem tatdun? Sékodí angun kamape kaamolo gídune, bí RUUTUM kíng míngkesula, bíkke Shédí kíng míída sulangka.

¹¹Idola eme rína takam nolu, eme meru bomla rítí goona nolu, gítí gootola, noluke eme nolum gusu yéku. RUUTUM bí agísue dekepe imoyé, nolu adír aloola anka suyéku.