Read Alladian ISAIAH 53 Bible Online

ISAIAH 53 - Alladian bible

ISAIAH 53

¹Ami kídíe poyansuto: “Ngoluke agom pokan binamem, séko buluda arope tatdun? Séko bulu kída RUUTUMke alagem lengkanton?

²De agér ibinade RUUTUMke keralo, among ereng kolote kamporuna esing asul kísa siisala appír pírla ikai. Eríp-erappe bím ngolu kaadope, bí yaamé petemang, delokke kampo petemang. Bíkke migmo-lepangde, ngoluke erbom penam atí kamang.

³Bí adír mílílo yétíla ankí-keno runa amiko. Bím ami takame míípakla kaapakto. Bík keralo ami takamke migmue rugenampe bí ila, bím míípakla ngolu bím gai-gakongpe mííbom mato.

⁴“Aropakpe bí ngoluke kinam-ramnam emlang ngoluke ankí-kenoem gebito. Dekepe ido rubung deme Shédí bí, bíme itung-iréla kimo-rammoto emla ngolu míítíto.

⁵Idola ngoluke paab legape bíme tarí iketto, ngoluke atímang legape, bíme demngéé sékréto. Bíkke kinamem ankang suge kolok, ngolum takamem ipí píyintoku; delokke bíkke tarí geko delok, ngolu takam aikaku.

⁶Ngolu takam gínyokna mér kísape ito, mipil-miyong ngolu agí míínampe magong suto. Ngoluke adír paapenamem, RUUTUM bí bíkke teyolo adírem ilíkto.

⁷“Bíme kidorupe itung-iré alooto, idolate bí kinam takam dem, atí agom lulen mape hakjém geto. Petkolo mérem gíbonam kísa, delokke amíd ngíkut kolo mére asoope dagbinam kísa, bí agom atí lulen mato.

⁸Bíme umla, bíme kebang baabomla, sikolo bíme gíboto; idola sékote bíkke anka supenamem, kaajing-kénjing bina katomang. Ngoluke ami kídíke paab legape, bíme mokato.

⁹Bí edílote milí-hodongpe yémanakuai, delokke edílote menam agom lukímana kuai. Idolate aimana ami kídílo lekope, bíme yubo sulíkla, mirem agolo bíme yuto.

¹⁰“Bíme anka sumola dírmíknamde, RUUTUMke míínampe ito. RUUTUM bí, bíkke yénamem, atímana paab aman kope ituakom bí, bíkke oten ome-uem kaayé; bík yéname míípíng yimanamko kayé, delokke RUUTUMke mííname bíkkíng duulíkla, bí utepooro kana amipe iyé.

¹¹Bíkke aid kiname kiyin rongem, bí yénamke angunem kaapala, bíkke aange apíng yéku. Ngome agér ibina, deena ami bíkke kénnamlok deddínem dormo amipe sanmoyé, delokke bí, buluke paab egedem gebiyé.

¹²Depeila migom-mite kídí pénsamlo, ngo bím duupe koko irung biyé. Sanam yimanam miram kídílo, bíkke líínam ekurangem orpansuyé. Kapeila paab kana ami pénsamlo, bíme ami konpe santak sulíkto, delokke bík yénamem sikolo tolík suto, sike sok teyong lote, bí deddína ami kídíke paabem gebila dormo kamana kídí legape, kumbila ikai.”