Read Alladian ISAIAH 54 Bible Online

ISAIAH 54 - Alladian bible

ISAIAH 54

¹RUUTUM bí sipe podung: “Edílokom okii kila, koo okí mana, negen kísape ina, Jirusalem no ashéla miri lulangka. Kapeila milo kala, ome-oo kanem pemílo pakyape no ome-uem paayé.

²Nokke dungko tombu notko dem, bodong bortak yadope hobanla, rímo kídíem bodoyape ila, rínkengem mooteyalo edííyape demlíkla ilangka.

³Lakbík-lakképe nokke among rísue gooyé. Nokke ome-oo kídíe miru opín kídíem monla, buluke byakrukko doolunglo, dungang aayin bomyé.

⁴“Pesomapeka, no annying yimayé. No ayang luyulo yéyéku emla míímapeka, kapeila nome ipusiléé yimayé. Nokke mimumdu delokke annyingem, delokke nokke mime meyéngpe yéla, atung-arééem no kénsu yimayé.

⁵Kapeila nom mopítna Israelke Deena bí, nome pílenna maglíngke RUUTUM bí, nokke milope iyé. Tani among takamke Shédíe emla bím poyindung.”

⁶Nokke Shédíbí sipe podung: “Mimum koope milo gíkí pala, mepak kunam mime kísa no ine. Depeila no yagorupe míídír aloodung, idola RUUTUM bí nome tomlat sulangkula sipe podung:

⁷Anyo moodí legapemin nom ngo mepaktone, idola ngo nom yagorupe ayasulangkula laangayéku.

⁸Ngokke marlílok anyong legape, ngokke migmoem nok keralok, ngo runyok geto, idola duuyarna ayalok, nom ngo ayang suyéku.” Nome ipítna RUUTUM bí sipe podung.

⁹“Noahke longe delo, among sim puumupe lekokom ngo eemo yimayé, emla pésuto. Deke kísape nok teyolo ngo maryimayé, emla ngo pésudung. Delokke nom ngo lula, itung-iréla iyimayé.

¹⁰Dííte kídíe bénla, díítume kaimape idakkom, ngokke nom ayangde duuyar tete yéku. Ngokke aapí eetet legape daapong inamdem, edílokom nyokmo yimayé. Nok teyolo ayangkuna RUUTUM bí, sipe podung.

¹¹“ ‘Gumnam-lamname ití bomnam, kití-ramtíla ayang paamana Jirusalem nom, ngo asirna edíína elínglok anípe mosaayéku.

¹²Nokke líísak ekum kídíem asirna, rubi elíng kídílok pílang kula, eme kísa írna elínglok nokke yabgo eyabem molang kula, delokke nokke etorem asirna lunggulok toryéku.

¹³“ ‘Nokke ome-oo kídíem RUUTUM agísue poyil suyé, delokke aapí eetet elang utepooroe nokke ami kídílo kayinyé.

¹⁴Nokke edíínana leríngpe deenamde iyé, reyubnam atímange nokke mootengoolo kayé, depeila no edílokom peso emnam kaimayé. Delo dem nok anínlok laabínla iyé, iname dekede edílokom nok anínlo kaimayé.

¹⁵Nome mimakpe aabomnako kayémílote, de ngokke ruulík maname. Idola séko-séko bulu nome aabomyédí, dekede nok ale rumkílo oletyé.

¹⁶Kaatola ngomino yogmoem píne, mekol kídíem eme íírdope yoplíkne, delokke gíníng-yoksa kídíem ilenmone. Ngomino reyub-rekap rudope, paka-níkkana kídíem ruulenne.

¹⁷Idola ingkona gíníng yoksekom nome atí ilamayé. Nome lupu-luléla lukaana kídíke agom-aang takamem no asipe iyam moyé. Sikepe ngokke igule nom agér ibina kídílo pííyé, delokke ikumnana utepooro aide nolu kelo agínpe kayarmín geyé.’ ” Sikepe RUUTUM bí polendung.