Read Alladian ISAIAH 55 Bible Online

ISAIAH 55 - Alladian bible

ISAIAH 55

¹“Asi tíílína takam nolu aala tíítola, asie alum mape kadung. Abal kamana nolu aala rela dolangka. Atí are-ame emmape, gakír emlang onggur alangem relangka.

²Donam-tíínam malo kape abalem inyokdun? Delokke akii dodar pemang kolo kape agér itíkan? Ngome aipe tatbitola, delo aina atoem dolangka, delokke nolu aina atíem dola ashéyé.

³Noluke aide turdope, noluke nyorung kídíe aipe tatgapla, ngokke anín so aalangka. Agínpe turyarpena daapongem, ngo nolukíng ibosuyé, delokke Dabid kíng ngokke pésulíknam utepooroem nolukíng ruulíkyé.

⁴Kaatola opín-buang daadike, maglíng ruutum pelang kebang ruutumpe, bím ngo imoto. Ami kídí keralo bíme, ngo hakiipe idope imoto.

⁵Arorupe nolum kénkímana, mibo-miying amiem nolu gogyé, delo bulu noluke keralo lomla dugayé. Kapeila RUUTUM noluke Shédí, Israelke Deena Shédí ngo, nolume angun-abé ruudope ruuyé.

⁶RUUTUM me paadungeme, bím matalangka; bíkke anínlo kadungeme, bím kumlangka.

⁷Mili-hodonge bíkke bedangem mepak langka, delokke atímane, bíkke aimana aapíem melangka. Bí RUUTUM kíng aapí míílat sulangka, RUUTUM bí bíme asampe ayayéku, delokke RUUTUM ngoluke Shédíbí bíme, mesambiyé.”

⁸Kapeila RUUTUM bí sipe polen dung: “Ngokke aapí míínam ségue, noluke míínam ségu kísamang; delokke ngokke bedangde, noluke bedang kísamang.

⁹Taleng tesi kapekísa among sim kedon yadudí, delok kísa ngok bedange, noluke bedangem pemílo kedon yadung; delokke ngokke aapí míínam ségude, noluke míínam séguem pemílo, kedon yadung.

¹⁰“Kapekísa tapame lang pedonge, taleng telok otokla, among sime asi kadope olík mape gílat sukumadí, Delokke dekepe olíkla among so, ali-ayéem garmola, sidlíkna legape ali-aam kamola, delokke dope-tíípe namem kamodudí,

¹¹delok kísape ngok nappang sok agom lennade araape aalat sukumayé, idola ngokke mííbomla lulígnam legadem apíí-pílí ipíng ruuyé, delokke agomde ngokke lulíg bomnam teyong delo utepooro kamoyé.

¹²“Kapeila nolu ashéla gílen yéku, delokke aapí eetetrupe nolume gíboyéku. Noluke keralo, díítela díítum kídíe, ashélok miri lulenyé, delokke moonam lokke esing kídíe lakpyoe piríksula iríkyé.

¹³Tang kana moonam pasum ayanpe, saipres esinge garyé, delokke peji-pereng ayanpe, mirtel esinge bukrepyé. Si agínpe turyarpena iyod kope, duuyaryé, delokke RUUTUMke agér inamem míípang suyarmoyé.”