Read Alladian ISAIAH 58 Bible Online

ISAIAH 58 - Alladian bible

ISAIAH 58

¹“Paasumape, ulo jérlangka Nok adudem bikul tapung kísape botte molangka. Ngok ami kídar lokke mirolpe inam emlang buluke paab kídíem lukan goolangka.

²Bulu loodí kítpe ngom matala, ngokke ségu-siangem kénlínge ina kísa ila, aina agér mílílo itína opín kísa lengkanla, Shédíke ngiitom luyilem mepakmape yégap bomna kísarupe idung. Bulu aina kebangem ngom baabi dope itína kísa ila, buluke raadalo Shédí bí yémín gedope erap bomnam kísa lengkan dung.

³‘Ngoluke nyonamem kape no kaaman? Ngoluke aapíe remyak langkula dengompe yékunamem kape no kaapaman?’ emla bulu mandung. Idola aro agomde idung, noluke nyoyé-rííyém, nolu agí-agíke mikit aapí agérem idung, delokke nolum agér ibinem nolu ipusiléédung.

⁴Noluke nyonam-ríínam dem momín-díímín sukolok iyindung. Noluke sikepe míngki-hakki bosu dola nyonam delokke adud-ayudem kedon ko telo tatpayé emla míídunía?

⁵Longe lotel legape aapí dengom monam nyonam dem ngo todunía? Dolbum ane gupgír gena kísa noluke dumpode gupgír gela, ankí gasor lolang metbulo ketpe ketnamde arolok nyonam-ríínamía? Noluke dekepe inam longe dem RUUTUM bí torík suyénía?

⁶“Ngokke torík sunam nyonam-ríínamde sikepe idung: Itung-iréna ikoli dem laabín langka. Gordulo éélíknam rímo tebegna dem taabín langka. Itung-irénam amieme asar dope melen langkula, delokke eget tebegna tabungem nyokmo langka.

⁷Kenona kídíem noluke donamem orsu langka. Opan arééla magoona, ekum kamana kídíem, nolu duupe-dakpekuem ibilangka. Ege-galuk gepenam kamanem bisulangka, delokke nokke edung-erangem igul bosumape imapeka.

⁸Delomin ngokke ayang angune noluke teyolo ngunlen yéne. De roh doonyi saanam kísa ila noluke tarí kídíem menape ipíyéku. Ngo nolukíng agínpe duumín gela, nolum mopítla, ngok angun-abéde rego mipílo nolum kaabomyé.

⁹Delo edílo nolu ngom gogyédí, delo ngo nolum agom poyan subiyé; edílo nolu kapla-rííla kumsu yédí, delo RUUTUM bí, ‘Sina ngo,’ emla tatbi-kaabiyé. Nolu itung-irénamem iyimape, ipusilééla, lué-luléla inam kídí emlang lakkéng sutla atímana agom lunam takamem mepak yémílo;

¹⁰nolu kenona kídíem donam-tíínam biríkla, adírna kídí takamke míínamem ipíí bila iyémílo; nolum gargo bomna kaamo ara delok angune lenla, longe raadang kísa iyéku.

¹¹Delo RUUTUM bí nolum agínpe gíbola, doonyi baarenam among lote noluke míínamem ipíng biyé, delokke noluke along kídíem bí edíí moyéku. Agínpe asi bitínam appun bagan kísa ila, asi lentína sirung kísa iyé.

¹²Noluke ami kídíe byakruknam doolunglo ekum molang kula, gaang aku upomlo edíírupe gaang díílík yéku. Delo nolume ami kídíe, bénna etorem torkune, delokke bedu-bedangem isi-samo langkula, dungko ekumem anípe mokune, emge yéku.

¹³“Nolu Sabbath longelo deenam rupe nyogapla, noluke agí mikit pongkoklo dem longe dem yémape, nolu ngokke deena longe dem are kadope nyobila, delo longe delo en-gong gígong mape, agér-anam igoomape, demangkom loorímana agom-aanglo ngomtí bosumape, aropakpe nyoyémílo;

¹⁴delo nolu, RUUTUM kíng ashénamem paayé. Kedín-kedonko among takamlo noluke amíne gígoyé, delokke noluke buku Jakob kíng ngokke pébi sulíknam asi-among delo nolu doman-tíímanla, agínpe yéyaryé.” Sikepe RUUTUM ke nappalok agom sim polendung.