Read Alladian ISAIAH 60 Bible Online

ISAIAH 60 - Alladian bible

ISAIAH 60

¹Gereptola, nguntola, kapeila nokke angune píngkai, delokke RUUTUMke angun-abée nokkíng ngunsangkai.

²Kaatola, amongem kaamoe polum bomdung, delokke eerína kaamoe ami kídí teyolo ibomdung, idola RUUTUM bí nok teyolo saabomyé, delokke bík angun-abée nokkíng lengkanyé.

³Opín-buang takame nokke angunem kaabola aayé, delokke roja kídíe, nokke longe aníke angun saanem kaape emla aayé.

⁴Nok amige kanggo sula, nokke ampeng-amlengem kaasu gootoka. Takame dumsula nokkíng aadakku, delokke nokke oo kídíe mooteng amolok, pííyin dakku, nokke ome kídíem alaglo bola aabo dakku.

⁵Dekedem no kaala ashéng alooyé, no ashéng ikén yimalok danyamyé. Opín takamke miremem nokkíng bomayé, siyéng kékonlok, buluke arem tadoge nokkíng pííyé.

⁶Sanam yimanam uut simon alunge, Midian lokla Ephah lok pííyé. Sheba lokkete alung abam rupe uun emla nampona arí kana kídíem gíala nokkíng aayé, bulu takam RUUTUM me yidgela erkí geyinyé.

⁷Kedarke mér abame nokkíng pííla, Nebaiothke bénbame nokke míngkorpe idope aabiyé. Deke takam dem ngokke deena runggulo, ipak inam amanpe ngo torík suyé. Delokke ngokke angunna Kumkeng Ekumem, kampo-tatpo rudope ilíkyé.

⁸Séko bulu pekí kídare asuplo yobang kunam kísa, doomug telokke gyanam kísa idakne?

⁹Dekede Tarshish lokke jaji kídíe, Shédíke ami kídíem ekumlo yuda bodakku. Bulu takam uun em, delokke baldín kídíem RUUTUM nokke Shédíme yidge-ríngge kakupe, emla bomala aayin dakku; kapeila bí nome kímte-remtepe duudokupe ruulíktung.

¹⁰Mibo ami kídíe nok etorem torbi yéku, delokke buluke roja kídíe nome agér ibiyé. Ngo aklílok nome demtuakom, atekpe ayang sulang kula, ngok ayangem lengkan suyéku.

¹¹Longe yohpe nokke eyabe, sitya ayarla sittum yimayé; legade opín-buang takamke roja kídíe gai-gakorupe, maglíngpe yonala nome, buluke arem-tadok em bomabiyé.

¹²Kapeila ingkona opíne, nome agér ibimayédí, deke takam dem apíí-pílí nyokyin moyé.

¹³Lebanonke míngkím subomnam saipres, siinang, delokke juniper esing kídíem nokkíng bomala, ngokke Kumkeng Ekumem kampo-tatpo rudope imolangkula, ngokke ale dakkeng dem, angun-abé kadorupe ngo imoyéku.

¹⁴Nome itung-iréna kídíke ome-oo kídíe, nome míípakla yéna kídíe, nok keralo lebíng kooníngla gubayéku. Bulu nome RUUTUMke Luune, Israelke Deena Shédíke Jayon doolunge, emyéku.

¹⁵Nome nela akla mepakla, sékote nome yébo suna kamatuakom, nom ngo kampo-tatporuna, delokke gai-gakong runa doolung kope imo langkula, siirum siirumke ashé séngkepe imoyéku.

¹⁶Agíke kuem anyun sunla isaana kísa, nome opín-buang kídíelang roja kídíe airupe kaasi-tatsi yéku. Delomin nome ipítna Shédí bí, delokke nome mopítna RUUTUM bí ngo emla no kényé kune.

¹⁷Pitol ayanpe uun em, arem ayanpe baldín em, ngo nom bomabiyé; esing ayanpe pitolem, delokke elíng ayanpe arem em, ngo nome boma biyé. Nome ruutum bomna kídídem, mito-suarpe imo mape, pénsam aapí kamola, dengompe yébomoyé.

¹⁸Nok among delo ipusiléénam adud tatpa yimayé, delokke nyoknam-rííname nok among rísu kídílo kaimayé, delok ayanpe nok etor kídíem Turname emyé, Delokke nok yabgo kídíem Yidname emyé.

¹⁹Nok legape doonyide longeke angunpe iyimayé, delokke poolode nok legape yohke angunpe iyimayé; kapeila nok legape agínpe kayarna angunpe RUUTUM ngo iyé; delokke nokke Shédíbí nokke angun-abépe iyé.

²⁰Nokke ankí-kenodí longe kaimayé, Doonyi emlang pooloem pemílo pakyape agínpe kayarna, nokke angunpe RUUTUM ngo iyé.

²¹Delo nok ami kídar tabungde, deenampe yéyéku, Delokke bulu asi-amongem agínpe yéyar bomyéku. Ngokke agíke angun-abé em lengkan sunam legape, ngok alag sok díílík tonam, asulpe saana kídíde bulu.

²²Noluke arang lokke sanbom supemanam, erang anyongo ete, amín kanarung opín kope iyéku. Noluke midum atel annyiete, ami éjar kope paryéku. Longe píímílo ngo menape, dekedem imoyé. Ngomino RUUTUM bí!