Read Alladian ISAIAH 62 Bible Online

ISAIAH 62 - Alladian bible

ISAIAH 62

¹Deename longe raadang kísa angunmang tete delo, turname meru angun kísa írlenma tete delo, Jayon ke legape ngo asoope duumayé, Jirusalem ke legape adud dudmape imayé.

²Nokke deenamem opín takame kaayinyé, nokke angun-abé em, roja takame kaayinyé. Nok legape amín aníko RUUTUM ke nappalok mínlen biyé.

³RUUTUMke keralo no asirna lunggu kísa ine, delokke nok Shédíke keralo roja dumlup kísa ine.

⁴Nome bulu Ajubah[2] emyimayé, delokke nok amongem Shemamah[3] emyimayé; idola deke delokke ayanpe, nome Hephjibah [4] emyéku, delokke nok among dem Beulah[5] emyéku. Kapeila RUUTUM bí nok teyolo airuupe ashéng langkula, nok among delokke milope iyéku.

⁵Yaamée mimumem nyamran inam kísape, nome pílenna bí nome nyamram iyéku. Makboe nyameng keralo ashénam kísa, nokke teyolo Shédí bí ashéng yéku.

⁶E Jirusalem, nok etor kídí delo, kaabomna amiem ngo lulígtung. Bulu longe yohpe asoope duumayé. RUUTUMme gogna nolu agíem apéé momapeka.

⁷Jirusalemem edíípe ilík kumang tete deloope, tani amonge bíme yidgemang tete deloope, bíme apééla imo mapeka.

⁸RUUTUM bí agí alage leedu sula, sikepe podung: “Noluke ali-aamem miru kídíke, donampe ngo edílokom biyi mayé. Noluke ílnam saala ibom sunam, aní apongem mibo ami kídíem, tíímo yimayé.

⁹Idola nolu ali-aamem ilíkla, dola-tíílang kula iyéku, delokke RUUTUMme yidge yéku. Nolu onggur ayé kídíem píllang kula, ngokke dungko Kumkeng Ekum gíídalo tííman bosuyéku.”

¹⁰Gílen tola, gílen tola, eyablok gílen tola, angkuna nok ami kídí legape, bedangem irung gelangka. Molangka, molangka, bene-bepongem molangka, elíng kídíeme bedang lok pyabín langka. Opín kídíe kaasu dope, jandiko tungon bilangka.

¹¹Tani among duurí loope RUUTUM bí gogyipe goggodung: “Noluke Turmone píídak emla, Jayonke ome kídíem polangka. Kaatola bík amane bíkkíng kadung, delokke agér iree bík kerang lo kadung.”

¹²Bulume Deena Amie, delokke RUUTUMke Ipítname, emla man-yéku; delokke nome Shédíke Mepak manam Luune emyéku.