Read Alladian ISAIAH 63 Bible Online

ISAIAH 63 - Alladian bible

ISAIAH 63

¹Sékoi Edom among lokke Bojrah doolung lok, gai-gakong ruupe yalína ege gela, kímte-remte ruupe ila miga-mirampe aadakne? “Miga-miram ruupe ipít dokupe, deenam-anam ruupe agom-aang pola, aana si RUUTUM ngo moko.”

²Onggur alangem kétlenna amike kísape, nokke ege kídarde kape yalíng kane?

³RUUTUM bí poyan suto: “Onggur alangem kétlennam kísape, ngo petom opín kídíem kétsuto; sékote ngome igulna kamang. Ngo marlílok bulume tujém-tuyémla kétduem, buluke iyyi kídíe ngok egelo purkatla, ege takame yalíng kai.

⁴Kapeila miru kídíem edo radíku longe ngok aapílo kato, delokke agí ami kídíem ipít díku dítage píngkai.

⁵Ngo kanggong along sulate, ngome igul penayang ami kaapa mato. Sékote ngome igul mangkolok, ngo míírí-míínyope mííla, ngokke agí marlíde ngome ralmola, agíke lakbíng ralnam lok ngo ikumto.

⁶Ngokke marlílok, opín tabung dem, tujém-hayémla ijét alooto. Depe ipala buluke iyyieme ngo amonglo purpakto.”

⁷RUUTUM ke ayang yanggul namem, ngo lupa biyé. Ngoluke legape bíkke agér, ibinamem ngo yidgeyé; arope bí ayang yalen sula, Israelke erang teyolo, ayang igulem, delokke deddína aina atoem ibito.

⁸Kapeila bí, “Aropakpe bulu ngokke ami kídíe, delokke ngome yadmayé,” emla polen sula bulum ipítnape ikai.

⁹Buluke adír kolo, bíte adír mínto, depeila bíkke kotokie yémín gela, bulume ipítto. Bíkke asampe ayang lok, bí bulume mopítto; kerang yénam lote bí bulum kaabomla, bola gítíboto.

¹⁰Depe ilate bulu bíkke mirolpe ila, Deena Aidme ankí motíto; depeila bí buluke mirupe ilat toku, delokke bulum bí agísue mimak isuto.

¹¹Delo bík ami kídarde, bík béérang Mosike kerangke longe aku kídíem míípa sulangkula matatoku: Ingkoloi mér kaabomnape agí amiem, kaabomla siyéng raadalok aabokuna RUUTUM bí? Ingkoloi agíke Deena Aid em, ami kídílo melíkna RUUTUM bí?

¹²Ingkoloi agínpe amín kayar dope, agíke ralnamem Mosi kíng melíkla ami kídí kerang kerape siyéng asiem, ipan suge bila ina RUUTUM bí?

¹³Buluke asi eeríko raadalok gídodem, aya-pesa ina yiibe amolo guré gínam kísa, tupsu-tupru kamape bulu gíto.

¹⁴Gooru-sobén kídíe among lottalo yégonam kísa, RUUTUMke Aid bí bulum eetet moto. RUUTUM no amín kadorupe sikepe, no ami kídíeme gíboto.

¹⁵E RUUTUM, nokke teyong among lokke, angun runa, deena, kedon runa, paleng delok kaatok sutola. Ingkoloi nokke ernam ela ralname? Nokke aang remyak emlang, ayang yalen sukunamem, kapei ngolume bimane?

¹⁶Abraham bí ngolum kényi kuma dokom, Israel buku kídíe ngolum kaayii kuma dokom, no ngoluke abue. E RUUTUM, no ngoluke abue, ngolume kerang yédo lokke ila ipítne. Si nokke amíne.

¹⁷E RUUTUM, nokke bedang luyulok, kape ngolume gímokan? Nome kumsu-joosu kaimadope, kape ngoluke aapí-aangem tolmokan? Nome agér ibina, nokke opínke legape, no aalat subi langkuka.

¹⁸Anyo longe legape nok ami kídíe, nokke deena moolop em yébom dung; idola supak miru kídíe, nokke deena ekumem ale tujém bomdung.

¹⁹Aku longe lokke ila, ngolu nokke sue, idola ngolum no yébone emla nokke ségue edílote ikímang, delokke nok amínlok, gogkí manam ami kísa ngolu idung.