Read Alladian ISAIAH 64 Bible Online

ISAIAH 64 - Alladian bible

ISAIAH 64

¹Kape no talengem sérpan supala tokmane? Dííte kídíe nome kaapala pesolok dan-geyai.

²Kape kísa esing aag-arak eerenem eme parla asiem usa modudí, deke kísa idope nok miru kídíe, nok amínem erkí gedope, opín-buang kídíe nok keralo peso-rían gedope no tatbi langka.

³Ngoluke míípa manam reyub runam agérem, nokke ila tokdodem dííte kídíe, nok keralo dan-gela igeto.

⁴Nom mííbomla toyana kídí legape, Shédí nokke agér ibina kísana, angukon shédíko konnyi-mennyingkai ila, sékokom kénkímang, ingko nyorung ekom tatkímang, delokke ingko amige kom kangkímang.

⁵Séko bulu nokke bedangem kénji dudí, séko bulu nok kangkolo aina agérem itídudí, dekenem no igulpe aadung. Idola edílo ngolu paablo itíyédí, no ngoluke teyolo marbomdung. Ngolu kape kísa turnamem paayén?

⁶Ngolu takame deemana amipe iyinkai. Ngoluke deena agér tabung dete, belumnam ege yana kísa idung. Ngolu anne sanna kísa idung, delokke ngoluke paabe asar kísa ngolume mutpak dung.

⁷Sékote nok amínem mínla kumsuna kamang, kapeila nokke migmoem ngoluke keralok, no runyok mokai, Delokke ngoluke agí paablok ngolume yaanyok sumotung.

⁸Idola E RUUTUM, no ngoluke abue, ngolu kédénge, no kédéng peking píne; ngolu takam, nokke alagke agér itonam mílíe.

⁹E RUUTUM, mopít yimape no mardí-marmo mapeka. Ngoluke paab kídíem no míípa suyar mapeka. Ngolu kumdung, no ngolum kaasu toika, kapeila ngolu takam nok amie.

¹⁰Nokke deena doolung kídíe, yépol amongpe batkaku. Jirusalem ete yépolpe ilang kula, Jayone nyokkaku.

¹¹Ngoluke buku kídíke nome kumsuko, ngoluke deena, angunna Kumkeng Ekum emte eme gula, deke delokke, ekuserang takame mekol alempe ikai.

¹²Siddí pakpe ilang kulate, no ngépak tete yénía? No adud-ayud kamape, irí-isi kaimape, ngolume itung-iréla ití yénía?