Read Alladian ISAIAH 65 Bible Online

ISAIAH 65 - Alladian bible

ISAIAH 65

¹RUUTUM bí sikepe podung, “Ngome íngkímana bulume ngo lengkan supe irusutuai, delokke ngome matamana kídíem ngome bulu paadope irusutuai. Ngokke amínem gogmana opín konem, ‘Sina ngo duune,’ emla ngo lupasuto.

²Agínpe ngo, agí amisuem torík supe alage yamtar tartíto. Idola bulu mikép amipe ila, agí míínam supe yétísula atímalo ití berokkai.

³Bulu annying kamape ngome martímue. Bulu uyu kumko baari aralo ipak itíla, delokke uyu kídíke runggupe inam líísak lok písanam tetelo nampona arí kanem nyotlík líktíla,

⁴yoeme bupík arang kídí lolang ago kídí aralo urom kídíem lupo-potí bosula ití goodung. Bulu éék adínem dola, uyu kepe tosak líknam adín alangem tííbosula itígodung.

⁵Dekepe idu teríla amieme, ‘Ngoluke anín so aamapeka; mootelo; ngolu amíl uktet kosu pemana deena amie,’ emla ludung. Dekena amidem ngo kape kísa kaalíyén? Dekena ami teyolo mityimana eme kísa ngok marnam de ibomyé.

⁶“Kaatola, sim ngok keralo atla metubong: Ngo asoope duumayé, idola apíngpe doryan suyéku. Ngo bulu kelok

⁷buluke imem ajéng emlang buluke abu kídíke ajéngem laayé. Dííte lebelo, díítum lííreng kídílo duuna uyu kumpom kídílo bulu nampona arí kanem nyotlík goola, ipak igoola, ngome luge goola ití goonam legape buluke kerangke atímana agér ire sunam ajéngem ngo airupe laayé.”

⁸RUUTUM bí sipe podung: “Kape kísa onggur ayé alem kolo, alang anyongko kadope kaapayédí, delo dekepe kaapanam deme amie, ‘Alangeke kadungada laalo, dekedem elpak mapeka,’ emla lubo sududí, deke kísape ngom agér ibina kídí legape ami takamem ngo nyokyin momayé.

⁹Ngo Jakob keelok lenna Judah opínlo utepooro ruulíkla, ngokke dííte kídíem yébom dope imoyé. Delo ngokke ullen sukunam ami kídíe, ngome agér ibina kídíe duuyéku.

¹⁰Depe iyékuem Sharon lo mér kídíe dota goolang kula, delokke Akhor Yiibelo gooru-sobén kídíe ketgo langkula iyéku. Ngok ami kídíe dekepe igo dolang kula ngome kumsu yéku.

¹¹“Idola RUUTUM me mepak suna kídí, bíkke deena dííteme mitpan suna kídí, kompal kanam-kamangke uyu Gad melang yékupenam longeke ponjikang ika bina uyu Meni me kumtí sula itína kídí nolume,

¹²ngo paka-níkka kolo, gíníng-yoksalo ruulíkdung. Kapeila edílo ngo gogtodí, delo nolu elík suyan mato; ngo nolume lupo late nolu poyan sumato. Depe igeyéla ngok kangkolo atímana agér mílílo ití goola ngokke aklínam ato mílílo ulta tatí gooto.”

¹³Depeila Ruutum Shédíbí sipe podung, “Ngom agér ibina bulu dola-tííla ashéng-angam iyé, idola nolu akii-kenola, asi tíílíla, annyirunge ila iyé.

¹⁴Ngome agér ibina kídíe ashéng aapílok miri luyé, nolu aapí-aang míídírlok, aapí-aange opak-oyakla ulo jérla kapyé.

¹⁵Ngokke ulnam ami kídíe noluke amínem mínla pésukolo pékeenayé, deloge Ruutum Shédí ngo nolume mokayé; idola ngok agomem tatna kídílo ngo aní amínem mínlíkyé.

¹⁶Among delo utepooro kadope lubéélíkna aro Shédí kelok lubéé líkyé, delokke among delo amkí-pékísuna kídíe aro Shédí kelok amkí-pékí emkom ike suyé. Kapeila yétonam kídíke ebín-ebon kídar dem mitpan suyé, delokke ngok amig keralok rumnyokyé.”

¹⁷RUUTUM bí sipe podung, “Kaatola, ngo aní teyong among kídí emlang aní amongko pílen yéku. Kerangke ato legí-sigang kídíem mitpan suyé, delokke aapí aralo geyimayé.

¹⁸Idola ngokke pílen kupenam legape, agínpe ashéngla erlangka. Kapeila ngo Jirusalem me anípe pílang kula, ami kídíke ashéng séépompe imoyéku.

¹⁹Jirusalem teyolo ngo agísue ashéng bomlang kula, ami kídí teyolo ngo erap along bomyéku. Delo edílokom kapnam-ríínam adudem tatpa yimayé.

²⁰Delo koo améne ojingpe siyi mayé, delokke mijing-ejo kídíe deddína dítagem turla yéyé. Dítak língko turnam dem yaamé koo kísa mííyé. Dítak língko píímape sinadem béélíkname emyé.

²¹Bulu ekum mola ashépe duuyé. Bulu onggur ríkséng ila ashépe ayéme doyé.

²²Buluke ekum monam kídílo, delokke onggur ríkséng kídílo mibo-miying amie duubom yimayé, delokke dobi-tííbila iyi mayé, esing lokke turnam kísa, ngok ami kídíe turla yéyéku. Ngokke ulsunam ami kídíe deddína dítak loope buluke alag inam lokke ireem paalang kula yéyé.

²³Bulu agérem isam yimayé, delokke situ-dorpo dope ome-uem olen yimayé. Kapeila bulukíng lang buluke oten-sirek loope RUUTUM ke utepooroe duumín geyé.

²⁴Buluke kumyin manga dapekai, ngo kumnam dem torík subiyé.

²⁵Sipyange lang méroe lekope dobo suyé, myomure gooru lokke donam kísa ammungem doyé; idola demulde tabí lokke donampe iyé. Ngokke deena díítum takamlo bulu atímape, demangkom simo-nyokmola atí imayé.”