Read Alladian ISAIAH 66 Bible Online

ISAIAH 66 - Alladian bible

ISAIAH 66

¹RUUTUM bí sipe podung: “Teyong amongde ngokke dungkeng palenge, delokke tani among si ngokke ale tupue. Ingkona ekum koda nolu ngom mobiyéne? Ingko loda ngokke apééla duupekue?

²Among taleng tabusim ngok alage pílen manía? Idola sékodí aapí dengomla, aapí míílat sulangkula, ngom pesola, ngok agom-aangem tatyédí; dekena amilo ngok ainame lang ashénge kalík dung.

³“Idola sékodi ruboem ipakpe pakadudí, de ami mokanam akame, delokke sékodí mér em ipakpe ilíkdudí, de ekii alíngem dírnam akame. Sékodí ali-ayéme ipakpe ilíkdudi, de éék iyyi idadnam akame, delokke sékodí nampona arí kanem ipak kolo romlíkdudí de uyu mimang lo kumnam akame. Dekena ami kídarde agí bedangem ulsutung. Bulu, buluke belumrupe kumsunam agérlo yagorupe erdung.

⁴Depeila ngokom buluke teyolo atírumanam itung-iréem laangayé, delokke buluke peso bomnam adírem bomayé, kapeila edílo ngo tomgo sutodí, sékote gogyan suna kamang. Edílo ngo lupo todí, sékote poyan suna kamang. Bulu ngokke kangkolo atímangem itíla, ngokke aklínam ato mílílo ulta tatí gooto.”

⁵RUUTUM ke agomem tattola, bíkke agom-aangem dan-gena nolu tatgap toka: “Nolu RUUTUM me arope míngke sula yénam legape, noluke ayokon amie nolum akdung, delokke luyupe kaapak dung. Bulu lué-luléla sipe ludung, ‘Nolum ashépe ngolu kaadope, RUUTUM bí nolum mopítpe aido.’ Idola bulum min annying moyékune.

⁶Tattola, doolung lokke taleng telokkai saana ngomdud kídar esim; Kumkeng Ekum elok lenna adud-ayud kídar esim; eke esi RUUTUMke miru kídí teyolo itung-irénam adud kídíe.

⁷“Ngok deena doolung si okii kimape lomlík sula koo oyamna mime kísadung.

⁸Sékoda dekena legangem kerape kangkíton, demangkom tatkíton? Among yéta konem, demangkom opín ami konem longe lotel em, demangkom kemír letel lok ilenla imo layénía? Idolate Jayonke okii kilen-kialo, bíkke koo kídíem bí olento.

⁹RUUTUM bí sipe podung: Kooeme olen tata mopala, omo mape akiiem ngo itumla iyénía? Koo olen dope ina ngo, omadope iyénía?

¹⁰“Jirusalem lo lekope erbo sula, bíkke legape ashétola, bíme míína takame; bíkkíng supage yagorupe ashéng séétík bosulangka, bík legape kaptí-ríítí bomla itína kídíe.

¹¹Ane anyunlo kooe tííla ashénam kísa, nolu tííla-dola ashéng along yéku.”

¹²Kapeila RUUTUM bí sikepe podung, “Asi korong kísa, bíkke eetet-monetpe yékunamem ngo duuyar moyéku, delokke asi puumu kísa opín takame arem-tadok, mirem ekurangem nokkíng biinga moyé. Koo ojingem anyun sunla, alag lo bogo bomla, jalla inam kísape nolu iyéku.

¹³Ane agíke kooem ngiinam kísa, Jirusalem lo nolum ngo ngiiyéku.

¹⁴Sikepe idokupe edílo nolu kaasu yékudí, delo nolu yagorupe ashéyéku, delokke íími garnam kísa alung-abam iyéku. RUUTUMke ayang alage nolum gagbom tete bomyé, idola ngokke miru kídílo ngok marnamem lengkanyé.”

¹⁵Kaatola, RUUTUM bí, yagorupe marlí bomnam ami kídí teyolo itung-irékupe emelok aabom yéku. Bí gumnam-meyat kísa ina guré-gaarilok, aalangkula eme meyope ina marlí delok bulume ingéé yéku.

¹⁶Atímape bíkke kaanam tani amongke ami kídíem eme lokla yoksalok bí itung-iré aloola ibom yéku. Dekepe iyékuem deddína amiem RUUTUM bí moka yéku.

¹⁷RUUTUM bí sipe podung, “Séko buludí uyu kumkolo agíem deesu-asula, pídé sula, uyu kumpom baarilo yonla gídudí, delokke yékdín dola, kebung adín dola, delokke abíd-abíd deemang-amona ato-siroem dodudí, bulu takamke yéyin longe anínkai.

¹⁸Buluke aapí míídu-míítok emla agér-anamem ngo kéndung. Nabbél ko gekína opín-buang takamem dumsu mola ngokke imodíe píídak. Bulu píídum suyém, ngokke angun-abé em bulu takam kaapayé,

¹⁹delo ngo buluke pénsamlo iyodko ikan biyé. Buluke ayokonem ngo turmola, ngokke angun-abé em, midu-mirampe inamem, ngokke ralnamem, delokke ngokke amín kanamem kénkí-tatkí mangko, mooteng among: Tarshishlo, Libia, delokke Lidia lokke iyyi epuk apjina ami kídílo, Tuballo, delokke Grik amonglo, ngo megong líkyé. Bulu gígoola deke kídí opín takamlo ngokke angun-abé em lugo biyé.

²⁰Bulu dekepe gígoola, opín-buang takamlok noluke bíro kídíem, gurélok, gado lok, uut simon lok, guré-gaari lok, roja joonana rammang lok, ngokke deena díítum dungko Jirusalem lo RUUTUM kíng amanpe gíaboyéku. Israel kídíe kapekísa ali-ayé amanem deena eku-batilo bomla, dormo ayonlok, RUUTUMke Kumkeng Ekumlo boma tuadí, deke kísape, bulu bulum aaboyéku.

²¹Buluke ara lokkom ayokonem ngo miri pelang Lebipe idope ulyéku.

²²“Kape kísadí ngokke píkupenam aní teyong among kídí elang aní amonge duuyar yédí; delok kísape noluke oten ome-oo kídíe lang noluke amíne kayaryé.

²³Poolo Aní gíídí-siipe akon lokke ila, akon loope delokke Sabbath longe mipílo tani takame ngokkíng aala ngome kumsuyé.

²⁴Buluke ngome kumsu pala gílen yékuem, ngom mirolpe rolmín suna kídí takamke simangem bulu kaayinyé. Buluke simang kídíem dona tapum kídíde edílote simayé, delokke bulume gukana emede edílote mityi mayé. Bulume dekepe kaapanamde tani takam legape belum runampe iyé.”