Read Alladian ISAIAH 7 Bible Online

ISAIAH 7 - Alladian bible

ISAIAH 7

¹Edílo Judah amolo, Ujjiah ke onam Jothamke oo Ahajbí rojape itodí, delo Siria among lokke roja Rejin lang Remaliah ke oo, Israelke roja Pekah bínyi Jirusalemlo mimakpe aabomto, idola bínyi ikum lamato.

²Edílo Siriae Israel kídílo makpépe ila aabomdung emla agomem tattodí, delo Ahaj lang bík ami kídíe, gumnam lok esinge tapgo sunam kísa pesolok dan gekai.

³Delo Isaiahme RUUTUM bí poto, “No nokke oo Shear Jashub me gíbola Ahaj rojame kaarík sulangka. Bíme no línggíngke pukuri lok asi aklenko sigo opom, ege etna kídíke agér iko bedalo kaarík suyé.

⁴Delo bím sipe polangka, ‘No aapíe eetetla pesomapeka, delokke ansulangka. Siria lokke Rejin roja keelang Pekah bínyike aklíde atí kamang. Bínyike marnam de metung annyi lokke míkkí kísane.

⁵Siria elang Israele, delokke roja kídíe nom nyokmodope ruusup bosula sipe embo sudung,

⁶“Ngonyi Judah em mimakpe iyala, ngonyike aralo ipan bosula Tabeel ke uem Jirusalem lokke rojape ilíklape.” ’

⁷“Idola RUUTUM ngo podung, dekepe atí kídarde edílokom imayé.

⁸Kapeila Siria among lokke dumponge Damaskas bí, delokke Damaskaske dumpoope Rejin bí idung. Toodí takying akké kolang takngo méélamlo Israel bí yagorupe loorí yimape ila, opín atel kopete hankan yimape iyé.

⁹Kapeila Israelke dumpoope Samari bí iyé, delokke Samari ke dumpoope Remaliah ke oo kídíe iyé. Nolu míngkeng sunamem edíípe bomyar mayémílo nolu yéyarmayé.”

¹⁰RUUTUM bí Ahaj rojame lekoda lutoku,

¹¹“RUUTUM nokke Shédí kíng iyodko rogutola. De iyod de eeríruna siko among lokke dokom aiyé, demangkom kedon yalumna teyong among lokke dokom aiyé.”

¹²Idola Ahaj bí poyansuto, “Ngo rogumayé, delokke ngo RUUTUM me ikang mayé.”

¹³Delo Isaiah bí poto, “Dabid rojake oten kídía, supak tattola. Tanike hakjémem jémge layimadupe inamde aimane. Dekepe no Shédíke hakjém emte imope idunía?

¹⁴Depeila RUUTUM bí agísue nome iyodko ibiyé: Mimum koo kone kooko gela oo kope oyé, delokke bík amínem Immanuel emyé.

¹⁵Edílo koode ainem lang aimanamem kénpan suyédí, delo bí dohi emlang ngullangem doyé-tííyé.

¹⁶Idola koo delokke ainem lang aimanem kénpan sulen mangadapekai nokke peso bomnam roja annyi delokke asi-amonge nyokyinyé.

¹⁷“Israel kela Judahke among yéta ipansudo delo, kape kísana adíre itodí, dem pemílo pakyana adírem RUUTUM bí nokkíng lang nok ami kídarlo, delokke nok kékonlo roja ikupena erang takamlo bomayé. Bí Assiria lokke rojaem bomayé.

¹⁸“Delo longe delo Nayil korong lokke kéényu yalumlok Ijipt lokke tamid midbamem, delokke Assiria lokke tangut ngutbamem kooyitpe yida likyé.

¹⁹Bulu dííte lííreng kídíke bupík kídílo, sine-moopang yiibe kídílo, sirung kídílo, delokke tang kana pasum-parum daadi takamem yoba bomyé.

²⁰“Delo longe delo RUUTUMbí dumíd ngíneme, Euphrates korong kékonlok gogayé. Depe embom namde Assiria rojae. Bí noluke nammídem, dumídem. delokke amíl lokke amíd kídíem ngíbínyé.

²¹Delo longe delo ami akone koo bona gooru kolang sobén annyi petomko bomdokom,

²²bulu bojérupe gakírem bila, ami delokke aange apííruudope iyé. Delo longe delo anyongona ami duuna kídarde gakír emlang dohi em dopang-tíípangyé.

²³“Delo longe delo éjar onggur agíre kala, delokke esing atele éjar nokdi arepe ina, airuna onggur ríkséng kídíe loorí yimala géényak, kopí tang pasumpe iyéku.

²⁴Dekepe iko kídílo iyyi epugem bomla, ami kídíe apta gooyéku. Arope, amo takam delo tang kana esinge bííbom yéku.

²⁵Ingkona adi among lodí arík ituane, delo tang kana esing mooname buklup bomlang kula, sékote deke delo magoo yimayé. Delo gooru, mér, delokke sobén kídíe neyi-neyang dogoola yégo yéku.”