Read Alladian ISAIAH 8 Bible Online

ISAIAH 8 - Alladian bible

ISAIAH 8

¹RUUTUM bí ngom poto, “Bortak runa kakot aborko laala, akorem delo bottepe sipe atlík langka: Maher-Shalal-Hash-Baj.

²Delokke ngo miripe ina Uriah melang Jeberekhiah ke oo Jekhariah me hakiipe tomyé.”

³Dekepe irodelo méélamdem ngok mimede koo gekai. Koo dem oo kope olen rodem RUUTUM bí ngom, “Oo delokke amínem Maher-Shalal-Hash-Baj emla mínlangka,” emla lulígto.

⁴Bí depe lulíg dola poto, “Koo delokke, ‘Yayie,’ demangkom ‘Aie,’ emla gokkén mangadapekai Damaskas ke mirem emlang Samari ke ato takamem Assiria roje rotbom yéku.”

⁵RUUTUM bí ngom lekoda lupotoku.

⁶“Shiloah korong lokke asi remelna sim ami kídísi mepak geyéla Rejin roja melang Pekah rojame ashébomnam legape,

⁷RUUTUM ngo Judah amongem mimakpe iabomdope Assiria roja bottem lang bík mití-maglíngem aamoyé.

⁸Bulu puumu kísape, gordu loope eríe ila, among takamem eebomyé. E Immanuel, delokke alabe bojérupe taala bortakna amongem polum bomyé.”

⁹E opín kídíe, reyubpe míídola dumsutola! Mibo mooteng ami kídía, mimak legape gídum sutola, idola pesorían tola! Arope iru sutola, idola pesotola!

¹⁰Nolu midu-mimak legangem ruubo sutola! Idola de edílokom aipe imayé. Edítko ilayédí nolu lupo bosutola! Idola de edílokom agér kamayé. Kapeila Shédí bí ngolukíng kadung.

¹¹Ngokke teyolo agíke lakbíng ralnamem ijém bomdola RUUTUM bí ngome, ami kídíke yédu-yébyape yémapeka, emla lurít dola bí poto,

¹²“Ami kídarke mirupe rukup-rulatla bonying ibosuko delo, no bonying agom lumapeka. Buluke pesorían kolo, note yagorupe pesorían mínmapeka.

¹³Ralyayalumna RUUTUM petomme no deenape míílangka. Bím petom no pesolangka. Delokke bím petom no yagorupe ansula yélangka.

¹⁴Delokke bí tanike yéda sukeng, kumkeng ekum kope iyé. Idola Israelke ekum annyi legape bí ale tupsula oletko líídung-líírepe iyé. Delokke Jirusalem ke ami legape bí etku-edape iyé.

¹⁵Deddína amie batjém kosula, umkosula, delokke deddíne oletla amíl-amoe atímadupe isuyé.”

¹⁶Agom-aang kídarsim ngotkumla ayon kídarsim ngokkíng luyilsuna kídí aralo siil tuplíkla melangka.

¹⁷Israel kídíke keralok rusisuna RUUTUM kíng ngo agí sidan míngke suyé, delokke toyala yétíyé.

¹⁸RUUTUMke ome-oo ruulíkname lang ngo, si lekope yédung. Jayon díítumlo duuna Ralyayalumna RUUTUM kepe ngolu Israel kídíke keralo iyode.

¹⁹Edílo ami kídíe nolume, “Poru-pogongna, delokke nyorulo pomel goona uyu kana ami, delokke urom tomna amilo lupo-manmo ilangka,” emla luyédí, delo agíke Shédí kíng ami kídíe íngkí lamanía? Kape turnam ayanpe sinalo lupo sukane?

²⁰Ayon atbinam loklang idong lok matala, deke delokke agompe bulu lumamílo bulukíng longe angun kamang.

²¹Bulu tíílíng-kenoe, aapí ejir-emare ila, among tabulo mayin goola edílo bulukíng ato ralnam kaimayédí, bulu yagorupe marla, kaadu sudola buluke Shédí melang buluke rojem bulu bééyé.

²²Bulu rumkíng amo danpe kaayékuemte, reyubna kaamoem kaapang sula, ankí-keno, adírem kaayé, delo bulum kaamolo níílíkyé.