Read Alladian LEBITIKA 10 Bible Online

LEBITIKA 10 - Alladian bible

LEBITIKA 10

¹Aaron ke oo annyi, Nadab lang Abihu bínyi metbu ekung asak bomla, delo eme dorna mekol lok ilíkla delokke nampona atoem item líkla RUUTUM ke keralo bomato, idola de deena emepe imato kapeila bínyime dekepe ilangka emla RUUTUM bí tolíkmato.

²Depe ila RUUTUM kelok eme lenla bínyim RUUTUM ke keralo gukato.

³Depe irodem Aaron me Mosi bí poyilto, “Sikepe ipenam legangem moko RUUTUM ke podungem emtuane; ‘Séko buludí ngok keralo aayéne, ngok deenamem ngo lengkan suyé; ami kídí keralo ngome yidge moyé.’” Aaron bí asoope ito.

⁴Depe irodem Aaron ke apang Ujjielke oo Mishael melang Eljaphan me Mosi gogala poto, “Nonyi so aala nonyike bíro simang kídí sim RUUTUM ke Tombu sok joobínla notko luyupe joolento.”

⁵Mosi ke políknampe bínyi aala, simang delokke ege genam kídí lok joopu sula notko luyulo joolento.

⁶Delo Mosi bí, Aaron melang bík oo annyi Eleajar mela Ithamarme poto, “Noluke dumídem tupsumape imapeka delokke noluke egem bétsu mapeka, demamílo nolukom siyé, delokke milung tabuso RUUTUM ke marname kayé. Idola noluke ali-atod kídíe lang Israel tabunge RUUTUM ke eme lok gukanam bínyim, kabbom-rííbomla ilado.

⁷Nolu RUUTUM ke Tombu lamgé sok gíku mapeka, demamílo nolu siyé; kapeila RUUTUM ke pídélíknam télde nolukíng kadung.” Bulu Mosi ke podupe ito.

⁸Delok rongem RUUTUM bí Aaron me poto,

⁹“Nolang nok oo kídíe RUUTUM ke araso aadung aatok yém apong tííma peka demangkom siiyé katak suna angukon alang emte tíímapeka; depe imílo nolu siyé. Si siirum mipílo igepenam duuyarna ayone.

¹⁰Nolu deena ato emla deemana atoem delokke Shédíke atoem lang tani milungke atoem, kaapansupe aido.

¹¹Nolu Mosi kíng RUUTUM ke ayon pobinam tabungem Israel daadi takamlo poyil langka.”

¹²Mosi bí Aaron melang bík duuna oo annyi Eleajar melang Ithamar bulum poto, “RUUTUM kíng eme lok romnam ipak iko lokke ali- ayé aman ingongem laala runggu abe delo siiyé líkyél sumanamem dolangka. Kapeila si deenarunge;

¹³sime deena mooloplo dolangka, legade RUUTUM kíng eme lok romnam aman lokke, nokke lang nok oo kídí lokke taronge. Sikepe ngome lulígtung.

¹⁴Idola leesak líknam angkeng adín tarodem, no lang nok oo kídíe delokke nok ome kídíe dolado delokke RUUTUM kelo bikannam letík demte ila dormo ayon lok deena moolop kolo dobosulangka. Kapeila Israel kídí arang lokke ashéng aman bikolo sike si nokke lang nok ome-oo kídí lokke paapenam tarongsue.

¹⁵RUUTUM kelo lengkannam letík demlang leesak tonam angkeng dem romnam aman lokke unem lekope bomla RUUTUM ke keralo leesak líkla, leesak amanpe ipe aido. Si RUUTUM ke lulíg nampe nokke lang nok ome-oo kídíke paayar supenam taronge.”

¹⁶Mosi bí paab amanke sobén dem íítala, deme romtobong emnamem kénrongem, bí Eleajar kelang Ithamar ke teyolo marla, bínyim bí luto,

¹⁷“Kapeila nonyi paab aman dem deena notkolo domane? De deenarung atoe; RUUTUM ke keralo ipít agérem ila, Israel opínke imemem laabín dope emla nonyim binamíai.

¹⁸Delokke iyyiem deena moolop delo bomang mape irodem sobén adíndem nonyi deena notko delo ngok políknampe dotuamílo aiyai.”

¹⁹Aaron poyansuto, “Silo ngo paab aman dem dotuamílo RUUTUM bí elík duadí? Silo ami kídíe buluke paab amanem RUUTUM kelo bomato delokke bulu romnam aman emte bomato, idolate sikena reyub runa atoe ngokkíng ikai.”

²⁰Deme tatro dem Mosi ke aange eetetkaku.