Read Alladian LEBITIKA 12 Bible Online

LEBITIKA 12 - Alladian bible

LEBITIKA 12

¹RUUTUM bí Mosime poto,

²“Israel kídíem polangka: Mime kone koo gela ooko orongem bí longe kíníd loope, bíkke deemang-kodang idolo deemanam kísa deemayé.

³Longe píínyi delo koodem dínbíng iyodpe aido.

⁴Delo looying angum kolang longumko, iyyi bítgape, dooyala deebín sukupe aiyé. Depe ido delo bí deena atoem ukkípe aimang demangkom bíkke deebín sukuma tetedem, kumsuko ekumlo gípe aimang.

⁵Bí omeko oyémílo, looying kola loopi loope bí deemang-kodang idola deemanam kísa deemayé. Depe irongem bík iyyi bítgape looying akké kolang longe akkéko dooyala deebín sukupe aiyé.

⁶“Edílo bíkke oo demangkom ome legape deebín sudí longem duuyin yédí, bí dukríkna méro ko romnam aman legape delokke perong ooko demangkom pekíko paab aman legape RUUTUM ke Tombu lamgélo bomala miriem bilangka.

⁷Delo miride bíkke legape RUUTUM ke keralo deemo kunam ipagem ila irongem, bík iyyi bítnam deemang lok deeyéku. Sikesi moko ome demangkom oo ona mime lokke igepenam ayone.

⁸Mimede mérodem boma lamayé mílo, parong annyiko demangkom pekí annyiko, akondem romnam aman pelang akon dem paab amanpe boma langka. Delo miride bím deemokuna ipagem ila bí deeyéku.”