Read Alladian LEBITIKA 13 Bible Online

LEBITIKA 13 - Alladian bible

LEBITIKA 13

²“Edílo amikone bíínako kala demangkom tasutko kala, demangkom asig-ayolo pesorunam tarípe ikupena yasina alopko kalen yédí, bíme Aaron kíng demangkom bíkke oo konlo bomape aido.

³Miride bíkke asig-ayo delokke bíínamem kangípe aido. Bíína delokke alopde yasi lenyémílo delokke bíínade asig-ayo delo eerípe bíílen yémílo de tarí bottena kope ikupene. Miride kangírodem deemangkai emla pokanpe aido.

⁴Asig-ayo delokke alopde yasi yémílo delokke eerípe bíímayémílo delokke amídde yasi mayémílo, miride dekena kinem longe kíníd kope agí atelpe dungu sumope aiyé.

⁵Longe kíníd nana delo miride bím kangíng kupe aido. Delo bí bíínade hanlang kula delokke, abídlo bííyon sumadope kaayé kumílo bím longe kíníd konko agí atelpe dungu sumokupe aido.

⁶Longe kíníd nana longe delo, miride kangíng kupe aido, delo bíínade hanlang kula abíd looteng gíyon sumang dope kaayé mílo bíme deengkaku emla pokan langka. Kapeila de bíína petome, delo amide agíke ege-galugem etbínsula deengkunape ipe aido.

⁷Idola miri delokke kaapala deebín kurong emte, bíílen langkula abídlo bííyon suyékumílo, bí miri keradelo angkan sukupe aiyé, miride lekoda bíme kangíng kupe aiyé, delokke bíínade gíyon sudumílo, deme deemane emla pokanpe aiyé, kapeila de reyubnam asig-ayo kiname.

⁸“Amikone reyubpe asig-ayoe kiyémílo bím miri keralo bomalangka.

⁹

¹⁰Miride bím kangkíla, bíkke asig-ayo delo yasipe bííla delokke dumíd emte yasimola adín emte yasipe kaamola iyémílo,

¹¹de tííde delokke miride bím deemangkai emla pokanpe aido. Bíme dungu ngutí sumomadokom aiyé, kapeila bí deemana amipe ikabong.

¹²Tííde bíkke asig-ayo tabulo lenyin yémílo delokke miri lokke kaapíngko yaryarlo kala, tukku lokke ila ale loope kayémílo,

¹³miride bím kangíla, tííd de amíl tabungem buklum bomyémílo, bíme deene emla pokan langka. Legade amíl tabulo yasipe bukyin gola deengkai.

¹⁴Idola edílo adíne yasipe lenyédí, delo bí deeyimang.

¹⁵Edílo miride yayina adínem kaapayédí delo bím deemang emla pokan langka. Adín yayide deemane; kapeila de tííde.

¹⁶Adín yayide angupe ilangkula yasi yéku mílo bí mirilo lengkan sukupe aido.

¹⁷Miride bím kangíla bíínade yasipe iyémílo, miride deene emla pokan bipe aido, delo bí deeyéku.

¹⁸Edílo amikone asig-ayolo tasut gela, de hanmap rongkuem,

¹⁹hankuko delo yasipe goonako demangkom yalíng-yasingpe abukko lenyédí, bí miri keralo lengkansupe aido.

²⁰Miride deme kangípe aido delokke de asig-ayoem eeríyang kamílo delokke delo duuna amídde yasing kamílo miride, bím deemangkai emla ponkanpe aido. De tasut delok lenna tííde.

²¹Idola edílo miri delokke kaadungem, yasina amídde kamape ila, asig-ayoem eeríyamape ila delokke kaimayémílo, delo miride bím agí ateleme longe kínídko dungu sumolangka.

²²Idola de asig-ayo delo bukjéyémílo, miride bíme deemane emla pokan langka; kapeila de tííd taríe.

²³Idola de abukde angu yamape ila buggo mayémílo, delokke tasut delokke abuksupe duusuyémílo, miride bím deedung emla pokan langka.

²⁴Edílo amikonem eme asigem gula delokke gukode, yasi-yalíngpe adíne iyédí,

²⁵miride gukodem kangípe aido delokke gukoke amídde yasi yémílo delokke taríde eerí yémílo de eme tarílok lenna tííde. Delo miride deemane emla bím pokanpe aido, kapeila de tííd kiname.

²⁶Idola miri delokke kaadu delo, tarí delo yasina amíd kamape, tarí dete eerímape hanka kumílo delo miride, longe kínídko bím agí ateleme dungu sumope aiyé.

²⁷Longe kíníd nana longe delo miride bím kangíng kupe aiyé, delo taríde bojémomo igoo suyémílo, miride bím deemang emla pokan langka, kapeila de tííd kiname.

²⁸Dekepe imape taríde anguyape imang delokke bukjémang, idola hankyam kaku iyémílo, de gunam delokke bííname delokke miride bím deedung emla pokanpe aido, kapeila de eme tarísupe isune.

²⁹Edílo milokong dokom delokke mime dokom, dumpolo mamílo sokkorlo bíínako kayémílo,

³⁰miride bíína dem kangípe aido. Bíínade eerína komílo, delokke bíngko alopke amídde yagéla bésor yémílo, miride amidem deemang emla pokan langka; kapeila de dumíd dílmona kiname delokke dumpolo demangkom sokkorlo lenna tííde.

³¹Idola miride sikena bíína kinamem kangíla, tarí delo dumíd yorana kaapamayémílo, dekena kina amiem miride longe kíníd kope agí atelpe dungu sumope aiyé.

³²Longe kíníd nana longe delo, miride bík bíína dem kangíng kupe aiyé. Delo kikode goomape ila, yagéla dumíd lenmape delokke taríde eerímayé mílo,

³³kiko alopdem megeyéla bíkke dumpong dem ngíbín supe aiyé. Depe irodem miride bím agí ateleme longe kíníd konko dungu sumokupe aiyé.

³⁴Longe kíníd nana longe delo, miride bíkke tarídem kangíng kupe aido. Taríde asig-ayo momem delo bukyon sumayémílo delokke taríde eerímayémílo miride bím deedung emla pokan langka. Delo bí agí ege-galugem etbínsula irongem bí deeyéku.

³⁵Idola miri delokke deebín rongkuem, taríde bukyon suyémílo,

³⁶miride kangíng kupe aido. Delo miride arope tarí delokke goobyak kunamem kaarodem, bí dumíd yagénamem kaata tatínam kaimang, kapeila amide deenape iyimang.

³⁷Idola bík kaangkolo taríde goomap langkula dumíd yorane delo bugyékumílo, taríde aikaku delokke bí deengkaku. Miride bím deengkaku emla manbipe aiyé.

³⁸“Edílo milokong kone demangkom mimekone bík asig-ayo delo yasina alop kídíeke kaayédí,

³⁹miride dekedem kangípe aiyé. De alop kídíde aro-sirope yasimayé mílo de emmumna abuk lensuname; iname de amide deedung.

⁴⁰Edílo amikone dumíde dílyinla bí tuklok kadí, bí deene.

⁴¹Bíkke tuktadan dumíde dílla bíkke tuktange tuklok dokom bí deene.

⁴²Idola bíkke tukta delo demangkom tuklokna tukku delo yasi yalíngna taríe buglen yémílo, de tííde bíkke tukku delola tukta delo buklenkai.

⁴³Delo miride bím kangíngpe aiyé. Depe kaaduem bíkke amíl abíd delo tííd tarí lenna kísape tukku delokkela tukta delokke yasi yalínape tarí kídíde iyémílo,

⁴⁴bí tííd gena amipe ikai delokke deemangkai. Bíkke dumpolo tííd karodem, miride bím deemane emla pokanpe aido.

⁴⁵“Dekepe tííd kina amide, bétna ege-galugem gepe aido delokke bí dumídem taabyorsula, bík migmo rumkíng danem polumsula, ‘Deemang, deemange,’ emla ulo gogpe aido.

⁴⁶Bíkkíng deke taríde kadu teteng dem bí deemape iyaryé. Bí notko luyu delo agí atele duusupe aiyé.”

⁴⁷“Edílo siipyak demangkom enno lokke egelo demangkom,

⁴⁸sumnam ege demangkom mujalok demangkom kampona ennolok omnam ege, delokke amíd demangkom ayolok inam ekurang kídílo tííd tarí deemange kayémílo,

⁴⁹delokke dekena deemade siipyak, muja, sumnam demangkom omnam egelo delokke amíd lolang ayo ekurang kídílo kanade yaying demangkom yalípe iyémílo de goobyakna tííd taríe, iname deme mirilo lengkan sulangka.

⁵⁰Miride egedem kangípala, longe kínídko asoope leepotoka.

⁵¹Longe kíníd nana longe delo miride egedem kangíng kupe aido. Tarí deemangde goobyakmílo de egede deemangkai.

⁵²Depeila dekena dem miride rompakpe aido, kapeila de deemana goobyakna tííde.

⁵³“Idola edílo miride dekena deemangem goobyak madope kaayédí,

⁵⁴deme etbínla longe kíníd konko mepong dokupe polangka.

⁵⁵Depe porongem, miri delokke kaayékuem, deemanade goobyak kumaduakom delokke moríe angu kumape iyémílo de deemadada. Iname deemana atíde ege delokke kerang mamílo méélam danlo kadokom deme no rompak langka.

⁵⁶Dekepe miri delokke kangíng yékuem, deemana atíde nyokka kumílo, dem miride, dekena alopdem, amídlo demangkom ayolo daktuakom bétbín langka.

⁵⁷Sok kékon loteng deemana atíde lenlang kula gooyémílo, ege delokke atode, deme emelo rompak langka.

⁵⁸Delokke bíkke etbín rongkuem nyokyémílo, deme etsi-etmo tokuka, delo atíde deeyéku.”

⁵⁹Si moko sumnam demangkom omnam demangkom ponam ege kídílo lang amíd kana demangkom ayolok inam ato-sirolo tííd deemang daklíknam legape ibosupenam ayone. Sikepe moko dormo ayon lok deedudí ma deemadí emla pobo sunana legange idune.