Read Alladian LEBITIKA 15 Bible Online

LEBITIKA 15 - Alladian bible

LEBITIKA 15

¹RUUTUM bí Mosi melang Aaronme poto,

²“Israel kídíem sipe polangka; edílo amikone amíllok iyyi lenyédí, delo bí deemangkai.

³Iyyi delokke lendu teteng dem demangkom iyyi dem lenmo yimape itum dokom de bím deemomayé.

⁴Iyyi lennake ketkíko ippude deemayé, bíkke dungkíko atí dete deemayé.

⁵Sékodí bíkke ippuem ukkíyédí, bí agí ege galugem etbín sula asilo írsukupe aiyé, delok teyolo bí adeng loope deemayé.

⁶Séko amiedí, dekepe iyyi lenna ami dungko kolo duuyéne, de amide agí ege galugem etbín sula, asilo írsukupe aiyé, delokke bí adeng loope deemayé.

⁷Séko amiedí dekena iyyi lennem ukkíyéne, bí agí ege galugem etbín sula, asilo írsukupe aiyé delokke bí adeng loope deemayé.

⁸Deena amikonem dekena iyyi lennakone, takil sukkat yémílo, de amide agí ege galugem etbínsula asilo írsukupe aido delokke bí adeng loope deemayé.

⁹Iyyi lenna ami delokke bedang entílo, duupom dakpom kídí deteng deemayé.

¹⁰Ami delokke dungko-dakkoem ukkínade, adeng loope deemayé. Sékodí dekedem bomkíla iyéne, bí agí ege galugem etbín sula asilo írsula ipe aido delokke bí adeng loope deemayé.

¹¹Séko ami emdí dekena amie, agí alagem asilo arbín sumape ukkíyédí, de amide agí ege galugem etbínsula, asilo írsula ipe aido delokke de amide adeng loope deemayé.

¹²Ami delokke ukkínam kiilíng pekingem benpakpe aiyé delokke esinglok inam ato-siro tabung, bíkke ukkínam em asilo arkutkupe aiyé.

¹³“Edílo iyyi lenna amide aiyékudí, bí longe kínídko dormo ayon lok deenggang kupe nyopala, agí ege galugem etbínla, asi koronglo írbin sulangka; delo bí deeyéku.

¹⁴Longe píínyinana longe delo bí pekí annyi mamílo perong annyiko RUUTUM ke Tombu lamgé delo aala mirieme bilangka.

¹⁵Delo miride pettang konem paab aman ipak pelang pettang konem romnam aman ipakpe ibipe aido. Dekepe iyyi lenna kinam delok miride, kina ami dem RUUTUM ke keralo deebín biyéku.

¹⁶“Edílo amikone makmi bítyédí, bí delo amíl tabungem írkut sulangka delokke bí adeng loope deemayé.

¹⁷Ege mamílo ayo ege atílo ijéngnamko kayémílo, deme asilo arkut langka delokke de adeng loope deemayé.

¹⁸Edílo amikone mime kolo ketbo-dobo sula iyédí, delo bínyi asilo írbin sulangka delokke bínyi adeng loope deemayé.

¹⁹Edílo mime kone deemang-kodang iyédí de deemade longe kíníd loope deemayé.

²⁰Mime delokke deemang idungem, bíkke ketko kídí delang dungko kídíde deemayé.

²¹Sékodí bím ukkíyéne, bí agí ege-galugem etbínla asilo írbinsula ilangka delokke bí adeng loope deemayé.

²²Mime delokke dungkíko kídíemteng ukkínade, agí ege-galugem etbínsula, asilo írbinsula ilangka delokke bí adeng loope deemayé.

²³Mime delokke dungkode ippupe iduakom demangkom íngkona atípe ituakom, sékodí deke deme ukkíyéne, bí adeng loope deemayé.

²⁴Mime delokke deemang-kodang idungem amikone ibbosuyémílo, bí longe kíníd loope deemayé. Ami delokke ippu kídídeteng deeyimayé.

²⁵“Mimekone deemang-kodang kékonlo longe ayokope iyyi lentí yémílo, demangkom deemang-kodang tokyindí kékon looteng ngatbope ikamílo, bíkke deemang-kodang tokdo moodí delokke kísa bí iyé.

²⁶Deemang tokdo moodí delokke kísa bíkke iyyi tokdu delo bíkke ippu ketpom delang bíkke duupom kídíde deemayé.

²⁷Dekedem séko ukkí-gakkíyédí bí deemayé. Bí agí ege-galugem etbínsula, asilo írbinsupe aido delokke adeng loope bí deemayé.

²⁸“Edílo mime bí dekena deemalok aiyékudí, delo bí longe kíníd kope nyopope aiyé, delok rodem dormo ayonlok bí deeyéku.

²⁹Longe píínyinana longe delo bí pekí annyi mamílo perong annyiko, RUUTUM ke Tombu lamgé delo bomala miriem bí bipe aido.

³⁰Delo miride pettang konem paab aman ipakpe, delokke pettang konem romnam aman ipakpe ibipe aido. Dekepe iyyi lenna kinam delok miride kina mime dem RUUTUM ke keralo deebín biyéku.”

³¹“Israel kídíe buluke deemang-amolok, buluke aralo duuna, ngokke dungko Tombu deme deemamola bulu simadope, deemang-amonem mengusula duumo langka.”

³²Sike simoko milokong lokke iyyi lenla, makmi bítla,

³³mime lokke deemang-kodang ila, demangkom kinam iyyi tokla delokke mime-milo ketbo-dobo dormo ayonlok deemala iyéme igepenam idong kídíe.