Read Alladian LEBITIKA 16 Bible Online

LEBITIKA 16 - Alladian bible

LEBITIKA 16

¹RUUTUM ke keralo deemana ipagem ikolok, Aaron ke oo annyi sirongem,

²RUUTUM bí Mosi me poto, “Porda arot konke Daapong Sonduklo, Ipítna Ayang Dungkeng kako Deeya Yalumna Alop delo, aapyam mapeka emla nok bíro Aaronme polangka, demamílo bí siyé. Kapeila Ipítna Ayang Dungkeng teyolo ngo doomuglok lengkan sudung.

³Bí paab amanpe ruboko delokke romnam amanpe mérko laarong emmin, bí Deeya Yalumna Alop delo aalayéne.

⁴Sike sokke kékonlo, bíkke aamang adape, bí deena paajok lukdor dem lang amíl arangke paajok galugem gela paajokpe sumnam uug, delokke paajokpe ila dumelpe inam dem lublík sulangka. Sikesi deena ege-galuge, iname sike sim gemang adape bí asilo írsupe aido.

⁵Israel opín kídí lok bí bénbo annyiko paab amanpe delokke mér ko romnam amanpe laalangka.

⁶Aaron bí agíke supe lang bík edung-erangke ipítsu legape rubo dem paab amanpe ipaktoka.

⁷Delok rongem, bí bénbo annyi dem laala RUUTUM ke Tombu lamgé delo bomape aido.

⁸Delo bí bénbo annyi legape lotori ilangka; akonem RUUTUM kepe delokke akonem Ajajel [5] kepe.

⁹RUUTUM kepe lenna dem paab aman ipakpe Aaron bí ilangka.

¹⁰Idola Ajajel kepe lenna dem RUUTUM ke keralo turdope lengkan pala ami tabungke paab kídíem gebínnam legape yépol mooruk amonglo Ajajel kíng melík langka.

¹¹Edílo Aaron bí rubodem agíke supelang bík edung-erangke ipítsu legape paab amanpe ipak iyédí delo,

¹²bí runggu delok dorna mekol lok ekung delo tublíkla nyotmíknam nampona atolok lakpyo teteng annyiko, dekedem laala, Deeya Yalumna Alop delo bomalangka.

¹³Delo RUUTUM ke keralo nampona ato kídíem dorna mekol delo ilíkla bomatoka. Depe imílo delokke míkkíde Daapong Sonduk teyonglo duuna Ipítna Ayang Dungkeng dem uulum bomla, deme bí kaapamape ila bí simayé.

¹⁴Delok rongem, bí rubo delokke iyyi ayoko laala, bíkke lakkéng delok Ipítna Ayang Dungkeng keranggam delo píkjéngla delokke Ipítna Ayang Dungkeng kerapak deloteng lém kínídko píkjéng langka.

¹⁵Depe irongem, bí bénbo dem ami kídíke paab aman ipakpe pakala, delokke iyyiem porda kékonke Deeya Yalumna Alop dungko delo bomala, rubo delokke iyyiem ikam pakpe ilík langka, bí iyyi dem Ipítna Ayang Dungkeng delo lang delok kerapak delo píkjéng langka.

¹⁶Sikepe bí Deeya Yalumna Alop dem, Israel kídíke paab kídí lok lang deemang amo kídílok deebínyé.

¹⁷Aaron ke Deeya Yalumna Alop delo aala, dem deebínla delokke bíkke paab legasupelang, bíkke edung-erangke supe delokke Israel opín-buangke legape, dormo ayonlok ipít sukunamem iyinla lendoku deloope sékoteng RUUTUM ke Tombu delo aana kamapeka.

¹⁸Dekepe irongem, bí gílen langkula runggu delo aala dem teng deebínpe aiyé, bí rubo delokke iyyi ayoko, delo mér delokke iyyi ayoko laala, runggu delokke tuubu kéényung kídílo tídkat goope aiyé.

¹⁹Bíkke agí lakkéng lok runggu dem lemkíníd kokai iyyi lok píkkatpe aiyé. Sikepe bí Israel kídíke paab lok rungguem arkutla deebín langka.

²⁰“Edílo Aaron bí dormo ayon lok Deena Yalum Alop dem lang, runggu dem lang, RUUTUM ke Tombu dem deebínla iyin rodem, bí Ajajel kepe tosaknam turna sobéndem RUUTUM ke keralo bomape aido.

²¹Delo bíkke alag annyie sobén dumpong delo gagbom dola Israel kídíke miru-sogongpe ila atímape inam, mirolpe inam kídíem delokke paab deemang takamem ponkan sula, deke dem sobén dumpong delo lubéé líklangka. Depe meyon sulíkrodem, agér sok legape lulíknam ami delo sobén dem melíkla, deme yépol mooruk amonglo menyok líklangka.

²²Sobénde bíkke dumpong delo ami takamke deemang-amoem gela, ronggamko amonglo yényok goodope, amide sobén dem yépol mooruk amonglo menyok líkyé.

²³Depe irodem Aaron ke Deeya Yalumna Alop delo gíamang adape píllík sutonam miri egedem pítpak sugeyéla RUUTUM ke Tombu aradelo aalangkula egedem melangka.

²⁴Delokrodem bí deena moolop kolo asilok írsula irongem bíkke geyasunam ege galugem gelangka. Depe irongem bí lenlangkula agíke supelang ami kídí legape romnam aman ipagem, agí emlang ami kídíem deebínsu legape ilangka.

²⁵Delokke bí paab amanke taro delokke unem runggu delo romnam aman ipakpe romlík langka.

²⁶“Tosak sobénem melíkna amide bí agí ege galugem etbínla agíe asilo írsu langka. Depe irodem, bí notkolo aaladoku.

²⁷Deeya Yalumna Alop dem deebín dope ilíknam paab aman lokke rubo demlang sobén deme notko luyulo joolen bomla, deke delokke asig ayo emlang adínem delokke agíke ege-galugem etbín sula, asilo írsula irongem notkolo aalangkuka.

²⁸Dekeme rompakna amide agíke ege galugem etbín sula asilo írsula irongem notkolo aalangkuka.

²⁹Nolu sim idong kídí sim agínpe iyar bomlangka. Poolo kíníd lokke longe íying delo Israel kídíe, delokke buluke aradelo mibo-miyingpe duune, doma-tíímape nyola agér atí imapeka.

³⁰Delo longe delo nolu dormo ayon lok deebín dope, nolum paab lok ipítnam agérem RUUTUM ke keralo ibiyé.

³¹De longe de apéédí Sabbath longe, noluke nyodíe, delokke sim nolu agínpe iyar bomlangka.

³²Pídénam miride bíkke abuem írnepe iyan dope ordénnampe, bí dormo ayon lok deebín supe aido. Bí deena paajoknam miri egem gela,

³³Deeya Yalumna Alop demlang, RUUTUM ke Tombu dem delokke runggu demlang miri kídí legape, delok teyolo opín tabung kídí legape deebínbope aiyé.

³⁴Sim idong sim agínpe iyar bomla, Israel kídíke paab legape dítaklo letelko ipítnam iyon sim iyar gelangka.” RUUTUM ke políknampe Mosi bí ato takamem ito.