Read Alladian LEBITIKA 17 Bible Online

LEBITIKA 17 - Alladian bible

LEBITIKA 17

¹RUUTUM bí Mosime poto,

²“Aaron melang bík oo kídíem delokke Israel tabungem polangka: RUUTUM bí sikepe políkdung:

³Israel ami kone ruboko demangkom mérko demangkom sobénko, notkolo demamílo notko luyulo, RUUTUM kepe sobope payémílo bí ayonem betkai.

⁴Kapeila bí RUUTUM ke Tombu lamgé lokke sobo papomlo pamang. Bím yilíng biimonape hanla, Israel kídíke amikonpe hanyimayé.

⁵Delok legape, supak lokke ila séko buludí mítbín amonglo taroem sobope padudí, bulu dekelo payimape RUUTUM ke keralo bomyin aalangkuka. Bulu RUUTUM ke Tombu lamgé delo miri keralo bomyin aalangkula, ashéng aman sobope payin yéku.

⁶Delo miride RUUTUM ke Tombu aatak lamgélo duuna runggu abelo iyyiem kuujéngla runggu delo unem romlíkla RUUTUM ke keralo nampona namngupe idope ilangka.

⁷Buluke abír-ayo ibosunam sobén urom kídílo sobo pabiyimape bulu yélangka. Si buluke legape siirum takamlo bomyar geku penam idonge.

⁸Bulum polangka: Israel amikone demangkom buluke aralo duumín gena mibo-miying kone, romnam aman bila demangkom abíd soboem,

⁹RUUTUM kelo amanpe, RUUTUM ke Tombu lamgélo bomamape angu konlo iyémílo, bíme Israel kídíke amikonpe hanyimapeka.

¹⁰Israel amikone demangkom buluke aralo duumín gena mibo-miying kone adínlo iyyi kadupe doyémílo, ngo bíkke mirolpe ila, bíkke repe sinying aralok bím ami konpe hanyimayé.

¹¹Kapeila turna tabungke yéname iyyi delomin kadune. Dekepeila, iyyide yénamem deebín kolok, runggulo noluke paabem deebín sudope iyyiem purlík langka emla ngo lulígtone.

¹²Depeila ngo Israel kídíem sipe podung: nolu sékote iyyi domapeka delokke noluke aralo duumín gena mibo-miying ete iyyi domapeka.

¹³Israel amikone demangkom buluke aralo duumín gena mibo-miying kone aptagola, dormo ayonlok deena taroko demangkom pettangko apyémílo, bí delokke iyyiem amolo bítyin lenmopala, dekedem peklum langkuka.

¹⁴Turna tabungke yénamde iyyilo kadung, depeila adínlo iyyi dotak sumapeka emla RUUTUM bí Israel kídíem popato delokke dekepe inem agí ami konpe hanyimadope emlate popato.

¹⁵“Israel amikone demangkom buluke aralo duumín gena mibo-miying kone sisuna simang atíko, demangkom monkír rekkanamko doyé mílo bí agí ege-galugem etbín sula asilo írsulangka delokke bí adeng loope deemayé. Delok kékonlo bí deeyéku.

¹⁶Idola bí agí ege-galugem etbín sumape delokke írsumape iyémílo bí delokke areme paasuyé.”