Read Alladian LEBITIKA 2 Bible Online

LEBITIKA 2 - Alladian bible

LEBITIKA 2

¹Edílo amikone ali-ayé aman bomayédí, de ímíknampe ipe aido. Amide delo teyong delo tél pílíkla nampona atoem ilíkla,

²Aaronke miri oo kídílo bomape aido. Miride ímíknam delok lakyum tetengko laala, delokke tél emlang nampona ato emte laala, runggu delo míípang sugenam amanpe tolíkpe aido. Kapeila de namponade, RUUTUM ke ashéng bomnam emelok romnam amane.

³Delok ingat ali-ayé aman tabude, Aaron kelang bík oo kídí kepe iyé. Simin Deeya yalumnape RUUTUM kíng emelok romlíknam amane.

⁴Aman bomanamde, pampí kolo pampínam ettípe iyémílo, de siiyé líknampe ipe aimang. De biisamna tél hoyél sunampe idakkom, demangkom remyakna tél hoyél sunampe idakkom, siiyé hoyél sulík manampe ipe aido.

⁵Amande towalo pamnam ettíngpe iyémílo, de tél lok hoyél sunampe ipe aido, idola siiyé líkmapeka.

⁶Deme benmík pala, tél hoyél sula, no amanpe bomala bilangka.

⁷Amande damalo raanam ettíngpe iyémílo, de tél petom lok hoyél sunampe ipe aido.

⁸Deme RUUTUM kíng amanpe bomala mirilo bilangka. Miride deme runggulo leelíkyé.

⁹Miride míípang sugenam amanpe laala, runggu delo romlíkyé. Kapeila de romnam aríde RUUTUM ke airupe míínam emelok romlíknam amane.

¹⁰Abíd aman bingong kídíde miri kepe idung, kapeila de RUUTUM me bingongde deena amane.

¹¹RUUTUM kíng noluke ali-ayé aman binam delo siiyé kape aimang, kapeila no RUUTUM kelo donam aman bikolo edílote siiyém demangkom ngullangem romlíkmayé.

¹²Ali-ayé len-gena amanem nolu, RUUTUM kelo bomalangka idola dekeme runggulo rommapeka.

¹³Ali-ayé aman romlíkko miyoolo alo líklangka, kapeila de noluke lang Shédíke pénsam lokke daapong iyodem lengkanname. Noluke aman tabulo alo ilíklangka.

¹⁴Edílo nolu kerayalumpe len-gena, isi-sasing genam ali-ayé amanem RUUTUM kíng bomayédí, delo íkutla emelo banam aní ambín lok bomalangka.

¹⁵Delo tél píyélsula nampona atoem itak sulíklangka.

¹⁶Delo miride míípang sugedope íkutnam ambín demlang téldem delokke nampona ato tabudem idumsula RUUTUM kíng emelok romlíknam amanpe ilík langka.