Read Alladian LEBITIKA 21 Bible Online

LEBITIKA 21 - Alladian bible

LEBITIKA 21

¹RUUTUM bí Mosi me poto, “Aaron ke miri oo kídíem sipe polangka: Miri amide ami momemko sila iyém, delo bí dekena gííma-siimolo dormo ayonlok deemang ilíksupe aimang.

²Bíkke agíke ane demangkom ome demangkom bíroe

³delokke milo kamana, bíkkíng duumín gena bírme, dekepe bík erang kídí lokke gííma-siimolo, bí isulado.

⁴Ami kídí aralo bí ruutumpe yébola ikolok bí agí suem deemang ilíksupe aimang.

⁵“Miri kídíde dumpong dumídem ngíbín sumapeka, nammíd lokke kéényung-rego emte ngíbín sumapeka demangkom amíl-amo eme gatsugoola imapeka.

⁶Bulu Shédíke amínem deemang momapeka delokke Shédíke keralo deenampe yélangka. Kapeila buluke RUUTUMke donam legape bulu emelok romnam amanem romlíkne, depeila bulu deena amipe yépe aido.

⁷Bulu notii mimem bommapeka, demangkom milo mepak kunam mime emteng bommapeka, kapeila miri kídíde buluke Shédíke keralo deena amie.

⁸Bulum deena amipe míílangka, kapeila bulu Shédíke donam legape romnam amanem romlíkne. Bulum deena amipe hanpe aido, kapeila bulum deenape ingusuna RUUTUM ngo deene.

⁹“Miri lok omekone notiipe ilík suyémílo, bí abu lokke mikmo-lepangem nyokmodung. Dekepe inem emelo romka langka.

¹⁰Miri kídíke gooralo írnepe idope séko memdí tél lok pídé líkla ordénla miri egem gemoyédí, bí agí dumídem aya-pesa imomapeka, delokke agí egem bétsumapeka.

¹¹Bí simang kakolo gímapeka. Bí agíke ane demangkom agíke abu legang supete agísuem deemang ilík sumapeka.

¹²Bí Shédíke Tombuem gínyomapeka delokke deemang momapeka, kapeila bím, bíkke Shédíke tél lok, pídé líkla ordén ilíkname. Ngomino RUUTUM bí.

¹³Deena mimumem bí mimepe bomlangka.

¹⁴Bí mime meyéngem, mime mekunamem, notiipe ila deemang ilík suna mimem méngpe bommapeka. Bí agí ami goora lokke deena mimumpe yénem bomlangka.

¹⁵Dekepe imílo bí agíke ome-oolo deemang ibí hoyél sumomayé. Bím deena írnepe ingusuna ngomino RUUTUM bí.”

¹⁶RUUTUM bí Mosi me poto,

¹⁷“Aaron me sipe polangka: Siirum-siirum loope nokke otíng-oyin kídí lokke amíl amolo take-tarenade, ngok keralo donam amanem bomamayé.

¹⁸Take-tarepe ina ami: mikmana, lebyana, atuk mikmo lorímana, miyodpe ina,

¹⁹lebya-lakbyana,

²⁰ínggírna, minu partung ami, amig atímana, karak gena, tasut gena demangkom mumbalpe ina ami kídísi amanem bomamayé.

²¹Aaron ke otíng-oyinlo séko sikepe take-tare dudí, de amide romnam amanem RUUTUM ke keralo bomamayé. Bíkkíng take-tare kala bí ngok keralo donam amanem bomamayé.

²²Bí Shédíke deena ettíng emla abíd deena donam-tíínamem dola-tíílado.

²³Idola bíkke take-tare legape bí deena porda anín lolang runggu anínlo gíala, ngokke deena dungkuem deema momapeka. Bulum deena amipe ingusuna ngomino RUUTUM bí.”

²⁴Sim luyil-poyil agom kídí sim Mosi bí, Aaron melang bík oo kídíem delokke Israel tabungem poyin bito.