Read Alladian LEBITIKA 22 Bible Online

LEBITIKA 22 - Alladian bible

LEBITIKA 22

¹RUUTUM bí Mosi me poto,

²“Aaron melang bík oo kídíem sipe polangka: nolu ngokke deena amínem mikmo-lepang kamomape imapeka. Israel kídíke ngokkíng deena aman tolíknamem airupe mííbom langka. Ngomino RUUTUM bí.

³Noluke aman binam anínlo gíanako kayémílo, dem amidem agí amipe hanyimayé. Si noluke siirum-siirumlo mínggap gepename. Ngo mino RUUTUM bí.

⁴Aaron ke oten lokke akone tííd genako kayémílo, demangkom iyyi bídnako kayémílo, bí deebín sukuma tetedem, deena aman kídíem dolamayé. Ingkona mirie simangko uktetyédí bí deemayé demangkom bí makmi bítlen mílote bí deemayé,

⁵demangkom eggoona atíko ukmílote bí deemayé delokke deemana amiete bím deemamoyé.

⁶Sikena ato-siroem ukkína bí adeng loope deemayé. Bí asilo ursukuma tetengem deena amanem domapeka.

⁷Doonyi uarongem bí deeyéku, delo bí deena aman kídíem doladoku, dekede bíkke donamsue.

⁸Bí sisuna atíemte domapeka delokke monkír rekkanam emte domapeka, dekeme domílo bí deemayé. Ngomino RUUTUM bí.

⁹Ngokke míínam kídí sim miride bomgappe aido. Sime ipat-sula iyémílo, bulu agísue imemsula siyé. Bulum deedope imona ngo mino RUUTUM bí.

¹⁰Deena amanem miri kídíke edung erang kékonlo sékote domapeka. Miri kídílo mibo doonete delokke agér inete domapeka.

¹¹Idola miri kone abílko rela demangkom bík ekumlo abíl lok onam kídíde bíkke donamem domín gelado.

¹²Miri lok ome kone miripe imana amikonem milope bommílo, bí dekena deena amanem dolamín yimayé.

¹³Idola miri konke omekone meyéngpe ila demangkom memínsulang kula iko teyong loteng ome-oo kamape miri abu ekum delo kerangke akampe duusu yékumílo, bí abuke donamdem domín geladoku. Idola elík manam amide sékokom, dekeme domín gelamang.

¹⁴“Ami akone deena amanem domempe doyémílo bí delokke areme miri delo dorlangkula adu pilngoke adukonemte dortem langka.

¹⁵Israel kídíke deena aman bomanamem miri kídíe,

¹⁶elík manam amiem domo-tíímola deema momapeka. Dekepe imílo, ami teyong delo ajéngem dorsammoyé. Bulume deedope imona ngomino RUUTUM bí.”

¹⁷RUUTUM bí Mosi me poto,

¹⁸“Aaron melang bík oo kídíem delokke Israel tabungem sipe polangka: Noluke goora lokke Israel kone demangkom nolukelo yémín gena mibo-miying kone, RUUTUM kelo romnam amanko, pésunamem ipíínam legape demangkom agí mínggosu amanpe bomayémílo,

¹⁹amandem torík subadope, atí tarí-tape kamana ruboko demangkom mérboko demangkom bénboko bomape aido.

²⁰Tarí-tape kana lok bomayémílo amandem torík subimayé.

²¹Edílo amikone RUUTUM kelo pésunamem ipíínam legape demangkom agí mínggosu amanpe, ashéng amanem bomayédi, delo amandem torík subadope atí tarí-tape demangkom take-tare kamana bíkke gooru demangkom mér sobén alung lok boma langka.

²²RUUTUM kelo sikena taroem eme lok runggulo romlík dope amanpe: mikmana, lebyana, amíl amo loorí yimana demangkom tarí ríbyang gena, karak gena, tasut gena kídíem boma mapeka.

²³Idolate nolu agí mínggosu amanpe take-tarena delokke siitengpe siimana ruboem demangkom mér em boma lado. Idola deme pésunamem ipííng kumonam amanpe torík sumayé.

²⁴RUUTUM kelo amanpe, íttum tumnam, íttumlo tarí gena, íttum betna demangkom gatnam, dekepe ina taroem bomamapeka. Agí among sulo sikenem elíkmang.

²⁵Mibo miyinglok laarík sunam taroem donam amanpe Shédí kelo bimapeka. Kapeila deke dem bíírík samgomana tarope míílíkdung, iname dekeme torík sumayé.

²⁶RUUTUM bí Mosi me poto,

²⁷Edílo ruboko demangkom mér ko demangkom sobénko oyédí, onam dem ane delo longe kínídko yémín gemo langka. Longe píínyinana longe lokke ila dekeme RUUTUM ke keralo romnam amanpe toríksuyé.

²⁸Longe lotello, gooru lai, mér lai demangkom sobén lai, ane emlang ngangaem ipakpe moka mapeka.

²⁹“Edílo nolu yidgenam amanko ipakpe RUUTUM kelo iyédí, delo nolum torík subadope ipagem ibosulangka.

³⁰Delo longe delo ipak adínem doyin langka. Roh rokom loope donam atí memapeka. Ngomino RUUTUM bí.

³¹Ngok poyil-lulígem bomgap langka delokke dekedem ige langka. Ngomino RUUTUM bí.

³²Ngok amínem deema momapeka. Israel tabunge, ngome deene emla kén-gela torík suyinpe aido. Nolume deena amipe ingusuna, ngomino RUUTUM bí.

³³Nolume Ijipt among lok laalen langkula noluke Shédípe ina, ngomino RUUTUM bí.”