Read Alladian LEBITIKA 25 Bible Online

LEBITIKA 25 - Alladian bible

LEBITIKA 25

²“Israel kídíem sipe polangka: Ngokke nolum bipenam among delo, noluke pííyém among sude, Sabbath em RUUTUM kelo igepe aido.

³Toodí takkéko noluke arík kídí delo ali-ayé ilíkla, ríkséng etor kídí delo siipí-siiyé kídíem kaasi-tatsila ali-ayéme italangka.

⁴Idola dítak kíníd nana dítak delo, RUUTUM ke Sabbath em igela, amongde apééla, Sabbath em igelangka. Delo dítak delo ali-ayé ilík-salíkla, siipí-siiyé kídíem kaasi-tatsila imapeka.

⁵Nolu saasuna ali-ayéme gatmapeka delokke kaasi-tatsi manam onggur anelok ayé pílmapeka. Asi-amongde apéédí dítakko kape aido.

⁶De dítakde Sabbath dítakpe iduakom, asi-amongde nolum, noluke agérem ibina kídíem, noluke mibo kídíem,

⁷noluke simon-sili kídíemla moonamlo taro yéna kídíem, donam-tííname kabiyé. Delok lenbina kídí takam dem dolado.”

⁸“Sabbath dítak kíníd lokke kínídna Sabbath dítak kínídko sapdum sula dítak íying appi kolang dítak konangko saprongem,

⁹noluke among lokke kéényung-rego miyolo, poolo kíníd lokke looying nana longe, Ipíddí Longe delo, gígola bikul mudgo langka.

¹⁰Sikepe nolu, takying pilngo dítak dem kumlíkla, among so duuna ami takamlo ipítnamem pogong gela igo langka. Si noluke Jubli dítage. Iname mipil-miyong nolu agí-agíke buku-nekuke moole-baale kakolo lang opín-odonglo gílat suyin kupe aido.

¹¹So takying pilngo nana dítak Jubli dítak so ali-ayé ilík-salík mapeka, delokke agíe éésuna ali-ayé emlang isi-sasimape lensuna siipí-siiyém ita gomapeka.

¹²Kapeila de dítakde Jubli dítage, iname de nolu kepe deena dítage. Arík kídí petom lok lennem dolangka.

¹³So Jubli dítak so mipil-miyongpe, agí-agí buku-neku moole-baale kakolo gílat supong kupe aido.

¹⁴“Edílo nolu agíke Israel gooralo among kola demangkom rela ibosuyédí, delo nolu ilum-salum bosumapeka.

¹⁵Jubli dítaklok kílenla, dítak kídíem sapdola, asi-amongem relangka delokke ali-ayé ita penam dítak moodíem sabbomla asi-amongem kolangka.

¹⁶Dítage bojéyémílo, are dete bojélangka delokke dítage anyong yémílo are dete anyong langka. Legade kona bí arorupe ali-ayé bojé-anyong emmin kolíkdune.

¹⁷Noluke arang sulo yatbo sumapeka. Noluke Shédíme peso langka. Ngomino RUUTUM noluke Shédíbí.

¹⁸“Ngokke ayon ibinam kídí emlang lulígnam kídíem airupe igelangka. Dekepe imílo, nolu among delo ai-kampope duuyé.

¹⁹Asi-among de ali-ayéme arda biyé delokke nolu ashéng-angampe dola-tííla yéyé.

²⁰‘Dítak apíng kíníd delo arík-anam ita-hata mape kape kísa ngolu dola duuyén?’ emla nolu íngkí bosulado.

²¹Idola ngo rulík bila, nolu dítak angum loope tíípe-dopename kadope ibiyé.

²²Dekepe rulík kolok, noluke dítak píínyina delo ita-hata idung kuemte nolu aku ali-aam lok dola-tííla, dítak konangnana dítakke ali-ayéme isi-sasing doku deloope dolík-tíílíkyé.”

²³“Nolu asi-amonge akon kepe iyar dope kobo sumapeka, kapeila asi-among de ngokke. Delokke nolu, mibo-miying em ngok asi-among lo imonam kísane.

²⁴Noluke asi-among yébom dunam tabung delo, asi-amongem repít lenkunana bedang emte ibila bomlangka.

²⁵Israel amikone arééla, agíke amongem kosu yémílo, bíkke erang kone dekeme repít kupe aido.

²⁶Idola amikone dekeme repít lenkupena edung-erang kamape iko teyong delo, méélampe bí dorkunane alum sumayémílo,

²⁷bíkke kodo dítak lokke ilenla, areme sapla, kolíkko delo dortem kupenam emte itaksula dorlang kuka; delo asi-among de agíke supe isuyéku.

²⁸Idola dorkunanem ilen lamayémílo, bíkke kotonam asi-among de Jubli dítak loope, kolígko ami delokke ekurangpe iyé. Jubli delo bím bilat rongkuem, bíkke agíke asi-amongpe isuyéku.

²⁹Amikone língkum kumgongko doolung aralo duuna agí ekumem kosuyémílo, bí korong delokke ila dítak goorík arang delo dorlayéku.

³⁰Dítak goorík arang delo dorlang kumayémílo, de ekumde rena kelang bíkke oten ome-oo loope, agínpe bulu kepe iyaryé. Deme Jubli lokom bilat sukumayé.

³¹Idola língkum kamana doolulo ekum duuna dem mítbín among kísape míílangka. Dekeme dorla yéku delokke Jubli lo bilat sukupe aiyé.

³²“Lébi ami kídíde buluke yébom-dakbomko Lébi doolunglo, buluke ekum kídíem repít sulayéku.

³³Lébi kídíke yébomko doolung kolo ekum konam dem Jubli dítak lo bilat suyéku, kapeila Israel aralo Lébi kídíke yébomnam ekum kídíde buluke ekurangsue. Depeila buluke ekurang deme repít layéku.

³⁴Idola buluke doolung kídí lokke simon-sili, ekii-perok delokke yépom moole kídí deme edílo kom kolamayé, kapeila dekede buluke agínpe bomyar supenam ekurange.

³⁵Noluke gooralok, Israel amikone yagorupe aré-anyo ila, agíem ula suyimape iyémílo, mibo-miyipe doonaem igulnam kísape, noluke gooralo bíte duuyar míndope, bím igul langka.

³⁶Sikena aatí-opanna noluke Israel agí amisuem, noluke gooralo duuyarmín gedope nolu Shédíme pesola, sikena ami lok are-ame atí laaban mapeka.

³⁷Nolu sikena amiem bipoonam aballo laaban kumapeka delokke bulu kelo kolíknam donam lok namngo itamapeka.

³⁸Nolume Kanaan amongem bidope, delokke noluke Shédípe idope, Ijipt among lok laalenkuna, ngomino RUUTUM noluke Shédí bí.

³⁹“Noluke goora lok Israel ami kone opan-aréla, agísueme nolukíng kolík suyémílo, bíme abíl kísape agér imomapeka.

⁴⁰Bík teyolo noluke ségue, agér idope tomnam ami, demamílo duumín gepona ami kísape ilangka. Bíme nolu, Jubli dítak loope agér imodope ilangka.

⁴¹Delok rodem bí lang bíkke ome-oo kídíem buluke buku-neku moole-baalelo, opín-odolo gísu dokupe ilangka.

⁴²Kapeila Ijipt among lok, ngokke laalen kunam Israel amide ngome agér ibine, dekepe ila Israel amidem abílpe kope aimang.

⁴³Dekena ami teyolo noluke ségu-siyange tolmapeka. Nolu Shédíme peso langka.

⁴⁴Nolum dunggo bomna angu ami kídí lok, nolu mime abíl delokke milokong abíl em relado.

⁴⁵Nolu kelo mibo-miyingpe duumín gepona kídíem lang, buluke ome-oo kídíem nolu abílpe rela, noluke ekurape ilado.

⁴⁶Bulume noluke ome-oo kídílo orgo líklado, delokke yénam tabulo abílpe bomlado. Idola, nolu agísue Israel amisulo, noluke ségu-siyange tolmapeka.

⁴⁷“Noluke gooralo duupoona mibo-miying kone miremla, bíkkíng noluke Israel amisukone opan-aréla kolík suyémílo demangkom ami delokke ali-atod kolo kolík suyémílo,

⁴⁸de Israel amide agíem repít sulen layéku, demangkom bíkke ali-atod kone bíme repít lenlayéku.

⁴⁹Dekena amidem akí kone demangkom anying kone demangkom adín iyyike edung-erang kone repít lenlayéku. Demangkom bí agí sude mirem yémílo, agísude repít sulayéku.

⁵⁰Bí lang rena amide, redo dítaklok ila, Jubli dítak loope sabbo sula, longe loodum lokke arepe ibosula, edít dítak kodí Ipít sudo longe delok ila areme bitodí, delokke Jubli angkumang adape edít kodí dorku pename kayéne, dekeme ibo sulangka.

⁵¹Dítage bojéko kadung adamílo, bíkke ipít sudoku delo, bím renem pemílo bojé yangko areme bibanpe aiyé.

⁵²Jubli dítage píídoku deloope, dítage anyongko kadung adamílo deke delokke loodum areem sapla dorkupe aiyé.

⁵³Bíme toodí-yamolo, amiem tomla loodum areem binam ami kísape míípe aido. Bíkke teyolo bím bomna ato delokke ségu-siange tolpe aimang.

⁵⁴Sikena ségu kídí lok bíme ipítkula mayékom, bímla bíkke ome-oo kídíem Jubli dítak delo melenrung kupe aido.

⁵⁵Kapeila Israel amide ngom agér ibine. Bulu ngokke Ijipt among lok laalen sukunam agér ibina kídíe. Ngomino RUUTUM noluke Shédíbí.”