Read Alladian LEBITIKA 26 Bible Online

LEBITIKA 26 - Alladian bible

LEBITIKA 26

¹Nolu murti pímapeka demangkom mimang imapeka demangkom elíngeme, tírí-tídjokla, elíng gaanglo noksa píketla, dekena dínggola, nolu kumsu mapeka. Ngomino RUUTUM noluke Shédí bí.

²Ngokke Sabbath em igela, ngom kumsukuem mííte sulangka. Ngomino RUUTUM bí.

³Nolu ngokke poyil lulígem igap gela, ngok ayonem iyar geyémílo,

⁴ngo toodí-yamolo pedong- asarem melíkla, noluke asi-amonge ali-ayé éébiyé delokke noluke siipí-siiyé ane kídíe siipí-siiyém éébiyé.

⁵Nolu alum-asa mape jéla onggur ayém píldí loope, nolu dolot-tínggi ipename kayé, delokke onggur ayéme ali-aam siddí loope píldope ayé kamola noluke dope-tíípenamem bojémoyé, delokke noluke aapí-aange apííla, ai-kampope among delo nolu yépayé.

⁶Among delo noluke aapí-aangem eetetmoyé. Nolum sékote iríd-lurídla ina kamape nolu asoope ketmanyé. Ngo noluke among delok monkír-tangkírem laabínyé. Noluke among delo midu-mimak atí kamomayé.

⁷Miru kídí teyolo nolu ikumyé.

⁸Noluke midum pilngoe miru língkuem ikumla, delokke noluke midum língkue, miruke jarying amieme ikumyé.

⁹Ngo nolume ayala, ngokke utepooroem ruulígla, nolum milung moyé. Ngo nolum ibosunam daapongem bomgapyé.

¹⁰Nolume bojérupe jémola, aní ali-aamem gíalangkula aku kídíem igébadope, ngo ruubíyé.

¹¹Ngokke dungkuem noluke gooralo melígla nolum ngo mepakmayé.

¹²Ngo nolukíng yémín gela, ngo noluke Shédípe delokke nolu ngokke amipe ibosuyé.

¹³Nolu Ijipt ami kídílo abílpe iyimadope, Ijipt among lok laalen kuna, ngomino RUUTUM noluke Shédí bí. Nolume ijét bomna jungoli esing dem, ngo dírla, ngo nolume dumponge ngemonla gíyin motoku.

¹⁴Nolu ngok poyilem tatmape, lulíg tabusim igemayémílo,

¹⁵delokke ngok ayon kídíem mepakla, ngiitom lulígnam kídíem igemape, ngokke daapong ibosunamem betyémílo,

¹⁶nolum ngo, sim itung iréé kídí sim iyé: Ngo nolu kelo mamam sunam reyub runam peso-ríanem aamola, ipíyimanam kilii-ramliem kimola delokke nolu mikma-nyuala, noluke yéname yanyokyé. Nolu ali-ayéme ilík-salík dokom dem nolu dopamayé, kapeila noluke mirue dekeme lííbiyé.

¹⁷Ngokke migmoe noluke mirolpe ila, nolum miru kídíe ikumla, nolum nena kídíe nolum ruutum bomla, nolum monbomna kamapete nolu peso-rían lok dugnyok gela iyé.

¹⁸Sike sokke kékon looteng, nolu kénsumape, ngom tatma yémílo, noluke paab legape lemkíníd mayangko itung-iréem melíkyé.

¹⁹Ngo noluke adum miteem dírmíkla, noluke teyongke talengem arem kísape delokke noluke rumkíngke amongem pitolpe imoyé.

²⁰Noluke ralnam tabude emmumpe gísamyé, delokke noluke among delok esing kídíe siipí-siiyé éébimayé.

²¹Nolu ngome miru-hogong itíla, ngom tatma yémílo, noluke paab adupe noluke teyonglo itung-irénam aduem lemkíníd kokai bojé yamoyé.

²²Ngo monkír-tangkírem noluke mirolpe melígla, bulu noluke ome-oo kídíem, noluke simon-sili kídíem rekka-mokala, nolum milu-mibampe imoyimape bedu-bedang looteng gígonggona kaimadope imoyé.

²³Sike takam sokke itung-iré kékon looteng, ngokke nyorung etnamem kangkén sumape ngok mirolpe nolu ití dada yémílo,

²⁴ngo agínpe noluke mirolpe rolla, nolum itung-irénam aduem lemkíníd kokai bojéyamoyé.

²⁵Daapong ayonem noluke betnam legape, nolu kelo midu-mimagem píímoyé. Nolu agíem ipísupe doolunglo dumsu dokukom, noluke aralo kinam-ramnam adírem ngo melígla, nolume miru alaglo ngo kolíkyé.

²⁶Mime ane íyinge ettíng pamko attello pambo sula idope, noluke teyolo ngo donam-tíínamem kaimomayé. Nolu rungki-ruyik lenlate, nolu donam pííram bosula ashéng mayé.

²⁷Sikepe dug-adírem paalate, ngok agomem tatmape, ngok mirolpe nolu itíyémílo,

²⁸ngote marla noluke mirolpe irepyé. Ngo agísue noluke paab legape sikepe itung-irénam adu kídí sokke lemkíníd kokai adírem ngatbandope ilíkyé.

²⁹Nolu akén-ayén yimape akii kenola, agíke ome-oo adínem dosuyé.

³⁰Noluke kumpom kídíem nyokmola, nampona ato kako runggu kídíem bénpakla, nolum míípakla, noluke simang kídíem noluke aid-alo kamana murti kídílo, ngo gejét líkyé.

³¹Ngo noluke doolung kídíem, kumrukna doolungpe batmoyé. Noluke kumsuko ekum kídíem benmíkla, noluke aman lok ipak inam kídí emte torík sumayé.

³²Ngo noluke asi among emte atírumape nyokmola, delo dunga bompena miru kídíeteng dekedem kaarí-kaanyope kaadope iyé.

³³Ngo nolum midu-mimakpe iyabomla, nolum mibo-miying opín kídí gooralo yépitdope monbomyé. Noluke asi amongem kurukla noluke doolung kídíem kumruk doolungpe iyinmoyé.

³⁴Dekepe iyém, noluke asi amonge Sabbath dítag kídílo asoope apéénam kísa apééyé. Idola nolu, noluke miru kídí amolo ripuji kísape ankaasuyé.

³⁵Noluke yédungeme Sabbath kídílo kape kísa asi among de ituane, dem pemílo rongngam yape asi among delokke atí kaimape ido delo asi among de iyé.

³⁶Séko nolum mibo-miying amolo mibo-minnom pe ila yégomoyédí, bí nolum miru among delo yagorupe pesona amipe yégomoyé. Nolu annelo asar muddud emte mirue aabomdung emla mííla duknyok geyé. Bulum monbomna ami atí kamadokom, bulu agísue emmumpe duggela olet-oset goola iyé.

³⁷Nolum monbomna ami atí kamapete, noluke arasulo tupsu-tupru bosula olet bosuyé. Nolu dekepe ila miruem mimak atí ila bosumayé.

³⁸Nolume miru amonge métla, nolu mibo-miying amolo sinyokgoyé.

³⁹Mibo amolo séko bulu turla yékíyédí, paab deemang lok lang buluke neku-buku paab lok nyokyinyé.

⁴⁰“Idola edílo bulu, agíke paab deemang emlang, buluke neku-buku paabem, delokke ngok teyolo, buluke iru-hogong igola mirolpe inamem,

⁴¹delokke íngkona atímang lokdí ngo, buluke mirolpe ila, bulume miru amolo melíknamem, bulu ponkan sulangkula, delokke buluke paab ajéngem dorlangkula, buluke aapí-aange remyakpe míílat suyékumílo;

⁴²ngo delo Jakob kelo daapong ibosunamem, Isaak kelo daapong ibosunamem, delokke Abraham kelo daapong ibosunamem míípang sulangkula, asi among dem ngo míípang suyéku.

⁴³Idokom kerang yalumpe asi among delo ami yépong kupe aimang. Depe imílo de apíípe apéénamem paayé. Delok teyolo, ngok ayon emlang ngiitom lulígem igemape, ngom buluke mepaknam adu-ajéng emdan, bulu apíípe dorpope aiyé.

⁴⁴Depe epe idakkom, buluke miru amolo yédungem, ngo bulum mepak sumayé delokke nyokyin momayé. Depe imamílo, ngok daapong ibosuname kaimayé; kapeila ngomino RUUTUM buluke Shédí bí.

⁴⁵Idola buluke legape, angu opín kídí keralo, ngo buluke Shédípe idope, Ijipt among lok ngokke laalen langkula buluke neku-buku kídílo daapong ibosunamem ngo míípasuyé. Ngomino RUUTUM bí.”

⁴⁶Sinai díítelo, sim ayon kídí tabung simlang idong takam sim delokke ngiitom lulígnam kídar sim, Israel ami kídí legape Mosi ke keralo RUUTUM ke ilen biname.