Read Alladian LEBITIKA 3 Bible Online

LEBITIKA 3 - Alladian bible

LEBITIKA 3

¹Edílo amikone RUUTUM kelo ashéng amanpe gooru sobén aralok ruoko demangkom runeko bomayédí, de tarí-tape kamana kope ipe aido.

²Amide bík alagem, amanpe bomanam delokke tukku delo gagdola RUUTUM ke Tombu lamgé delo sobope palíkpe aido. Delo Aaron ke miri oo kídíde iyyiem runggu delokke abe kídílo kuujéngpe aido.

³RUUTUM kíng eme lok ipakko idope, ashéng aman delok bí tarong kídíem bomape aiyé; amíl arang lokke una tabungem,

⁴katpí annyi emla dem dunggo bomna ugíng anín lokke una kídíem, delokke bíkke katpílo laatak supenam ayinem ilum bomna kídíemkom.

⁵Delo Aaronke miri oo kídíde romnam aman teyolo dekedem romtak sulíkpe aiyé. Kapeila de aríkana, RUUTUM ke airupe míínam emelok romnam amane.

⁶Edílo bí RUUTUM kelo ashéng amanpe mér demangkom sobén aralok bénbo demangkom bénneko bomayédí, de tarí-tape atí kamana kope ipe aido.

⁷Bí mérko bomayémílo RUUTUM ke keralo bomape aido.

⁸Bí agíke alage amanpe bomanam delokke tukku delo gagdola RUUTUM ke Tombu lamgé delo sobope palíkpe aido. Delokke Aaronke miri oo kídíde iyyiem runggu delokke abe kídílo kuujéngpe aido.

⁹RUUTUM kíng emelok ipakpe idope ashéng aman delok bí tarong kídísim bomape aiyé: Lamku gíji along duurík sukolok gatrekla gatlennam ngelna tamé delokke una takamem, amíl arang lokke una tabungem,

¹⁰katpí annyiemla dem dunggo bomna ugíng anín lokke una kídíem delokke bíkke katpílo laatak supenam ayinem ilumbomna kídíem.

¹¹Delo miride romnam amanpe dekedem runggulo romlíkpe aiyé.

¹²Bíkke aman binamde sobénko iyémílo, bí RUUTUM ke keralo bomape aido.

¹³Bíkke agí alage aman delokke tukku delo gagdola RUUTUM ke Tombu lamgé delo sobope palíkpe aido. Delo Aaron ke miri oo kídíde iyyiem runggu delokke abe kídílo kuujéngpe aido.

¹⁴Bíkke sobo aman binam delokke sim tarong kídí sim RUUTUM kíng emelok ipakpe idope bí bomape aiyé: Amíl arang lokke una tabungem,

¹⁵katpí annyi emlang dem dunggo bomna ugíng anín lokke una kídíem delokke bíkke katpílo laatak supenam ayinem ilum bomna kídíem.

¹⁶Miride deke deme donam amanpe runggulo romlíkpe aiyé. Kapeila de aríkana, RUUTUM ke airupe míínam emelok romlíknam amane. Una tabude RUUTUMke.

¹⁷Si noluke dungko mipílo agínpe bomyar pename, delokke angkupena siirum tabulo duuyarpena ayone. Nolu una demangkom iyyi atí domapeka.