Read Alladian LEBITIKA 7 Bible Online

LEBITIKA 7 - Alladian bible

LEBITIKA 7

¹“Sike simoko imem aman lokke deenarung idong kídíe:

²Sok aman sokke taroem línggídanlo, romnam aman taro kídíem pakakolo pakalangka. Delokke sokke iyyiem runggu lokke kéényung rego takamlo kuujéng langka.

³Taro delokke una takamem laabínla, tamé lokke unem, amíl arang lokke una takamem,

⁴katpí annyiem lang delokke ugíng anín lokke unem delokke ayin lok gaiyalumna em laatak sulenpenam una kídíem laalen langka.

⁵Dekedem runggulo miride eme ipakpe RUUTUM kíng romlík langka, kapeila si imem aman ipage.

⁶Sim aman sim miri erang lokke milokong kone dolado, idola deenarung atope ikolok sime deena mooloplo dope aido.

⁷Si idong atel si paab aman kepelang imem aman kepe akame: Sikesi ipakna mirike ekurangpe iyé.

⁸Ipaklíknam taro sokke ayoem ipakna miride bompe aido.

⁹Ali-ayé aman lokke pampomlo pamnam demangkom damalo keenamem demangkom towalo inam atodem ipakna miride bompe aido.

¹⁰Delokke ali-ayé binam aman aralo tél soyél sunam dakkom demangkom ereena dokom, dekedem Aaronke miri oo kídíde akampe orpan bosupe aido.

¹¹“RUUTUM kelo amikone lengkan sudope sikesi ashéng amanke idonge:

¹²Amide ashéng yidgenampe biyémílo, yidgenana taro aman delo siiyé líkmanam remyakla goona, tél iyél sunam ettínglok delokke siiyélok motak sulík manam séruk ettíng besornalok, demte tél iyélsula, delokke tél iyél sunamem gaipe níngkunam apu-adenpe ina ettíng inam aman kídí emte bitak sulangka.

¹³Yidgela ashéng teyolo bíkke siiyélok moyél sunam remyakla goona, apu-adenpe ina ettíng lok amanpe bitak sulangka.

¹⁴Bí sikena angu-anguna ettíng lok RUUTUM kelo igulpe aman bipe aido. Sikesi ashéng aman ipagem ila iyyi kuujéngna, miri kepe iyé.

¹⁵Yidgela ashéng aman binam sokke taro adín dem, ipak longe pak delo doyinpe aido, bí rookon loope mesingpe aimang.

¹⁶“Idola ami delokke aman si pésubomnam legalok iyémílo demangkom agíke míínamsupe bisunamko iyémílo ipak ido longe delo dolangka delokke dongatko kayémílo longekon delo dolado.

¹⁷Longum nanalo dongong-tíngongko kayémílo dem rompak langka.

¹⁸Longum nanalo adín donamdem torík sumayé. De deeyimana atope irong kudem, bí amanpe ipak líkdo kukom deme bíkke ainamlo hanlíkmayé. Sékodí sikena atoem doyédí bí ankang suyé.

¹⁹Deemang amona atolo itet-iret monam adín dem domapeka; deme rompak langka. Delokke dekepe imana deena adínem dolangka.

²⁰Idola RUUTUM kepe ashéng aman binam adínem deemang amona amikone doyémílo bím agí ami lokke luyulo melangka.

²¹Sékodí tani deemanako demangkom taro deemanako demangkom belum runam atoko ukkípala, RUUTUM kepe ashéng aman binam adínem doyédí dem amidem agí amikonpe hanyimapeka.”

²²RUUTUM bí Mosime poto:

²³“Israel kídíem polangka, gooru demangkom mér demangkom sobén kídí lokke unem domapeka.

²⁴Taro simang lokke demangkom monkír rekkanam lokke unem agér abídlo inalado idola nolu domapeka.

²⁵Sékodí RUUTUM kelo emelok romnam aman lokke adínke unem doyéne, bím agí ami lokke luyulo melangka.

²⁶Nolu íngkona moolelo duudokom taro lokke demangkom pettang lokke iyyi em domapeka.

²⁷Séko amiedí iyyiem doyéne, deme agí amikonpe hanyimapeka.”

²⁸RUUTUM bí Mosime poto:

²⁹“Israel kídíem polangka, sékodí RUUTUM kelo ashéng aman bomayéne, bí RUUTUM kíng amanem bomalangka.

³⁰RUUTUM kíng emelok aman binamdem amide agí alag sulok bomape aido, bí unem lang angkeng adíndem lekope bomala angkeng adíndem RUUTUMke keralo leesak líkla leesak amanpe ilangka.

³¹Miride unem runggulo romyé, idola angkeng adínde Aaron kelang bík oo kídíke.

³²Nolu ashéng aman taro delokke lebík letík dem apekruna amanpe miri kídíem bilangka.

³³Aaronke miri oode, ashéng aman lokke unem lang iyyi em ipakpe ibokolok lebík letík dem bíkke tarope paasuyé.

³⁴Israel kídí lokke ashéng aman taro delokke leesak tonam angkeng adíndem lang amanpe binam lebík letíkdem Aaron melang bík miri oo kídíem Israel kídílok buluke paayar penam tarongpe ngo tolíkto.”

³⁵Simino RUUTUM ke miripe ibidope Aaron melang bík oo kídíem langusula ordén [1] ilíkdo longe delokke tarope tolíkname.

³⁶Bulume ordén ido longe delo, siirum-siirum loope, buluke agínpe paayar penam taronge emla Israel daadi tabungem RUUTUM bí políkto.

³⁷Depeila sike simoko romnam amanke, ali-ayé amanke, paab aman ke, imemnamke, ordén idoke aman, delokke ashéng amanke idong kídíe:

³⁸Yépol mooruk lokke Sinai díítelo, Mosike Israel maglíngem buluke aman bigangem podo longe delo RUUTUMke poyil-luyilname.