Read Alladian LEBITIKA 8 Bible Online

LEBITIKA 8 - Alladian bible

LEBITIKA 8

¹RUUTUM bí Mosime poto;

²“Aaron melang bík oo kídíem langaala, delokke buluke ege-galuk kídíem, pídé líknana tél, paab aman legape rubodem, mér sobén annyi dem delokke siiyé líkyél sumape monam, bésorla remyakpe goona ettíng demlang,

³ami kídí tabungem RUUTUM ke Tombu lamgé gíída delo tomyin aato.”

⁴RUUTUM ke políknampe Mosi bí ila, RUUTUM ke Tombu lamgé gíída delo milung takamem gogdum suto.

⁵Milung dem Mosi bí pokanto, “RUUTUM ke poyil-lulíkpe ngo supakke agér sim idung.”

⁶Depe empala Mosi bí Aaron melang bík oo kídí dem laalenla asilok bulum írbínto.

⁷Bí lukdor dem Aaron kíng píllíkla, gasor dem gin-go líkla, bodongna egem gemoto delokke Ephod [2] em bíkkíng ilíkto. Mosi bí Ephod deme kamporupe sumnam ugíng uug deloge ugílok ila amíl delo edíípe éélíkto.

⁸Delokrongem bí angkeng alop dem Aaronke angkelo ilíkla, Urim emla Thummim [3] dem alop delo ilíkto.

⁹Depe irodem Aaronke dumpolo dumeldem lublíkla delok kerang delo améngona uun ekungko deena iyodem atlíknam dem ilíkto. RUUTUMke pokam pakpe Mosi bí dekedem ito.

¹⁰Delokrodem Mosi bí pídénana tél dem laala RUUTUMke Tombu demlang delo aradelo duuna ekuserang takamem pídé déyinla kumlíkto.

¹¹Bí tél ayokon delok, runggu delo lemkíníd ko píkkatla, runggu demlang delokke ekuserang kídíem, delokke eku bottena emlang delokke dakkengem pídéla kumlíkto.

¹²Delokrongem bí tél ayokon delok Aaronke dumpo delo pídé líkla kumlíkla ordén ito.

¹³Delo bí Aaronke oo kídíem laalenla, bulum lukdor píllíkla, gasorlok bulum gin-go líkla gin-yin líkto delokke ege dumlubem lubyin líkto. RUUTUM ke pokam pakpe Mosi bí dekedem ito.

¹⁴Delok rongem bí paab amanke rubo dem laalenla delok tukku delo Aaron memlang bík oo kídíke alagem gagda sulík moyinto.

¹⁵Delo Mosi bí rubodem pakala, iyyi ayokonem laala bík lakkéng delok iyyiem runggu delok kéényung tuubu kídílo ijéng líkla runggu deme deemodope ito. Delokke abíd iyyi eme runggu delokke lerínglo purlíkto. Dekepe bí kumlíkla deemoto.

¹⁶Delokrodem Mosi bí taro delokke amíl arangke una kídíem, ayin lok gaiyalumnem, katpí annyi lokke unaem itaksula dem laala runggu delo romlíkto.

¹⁷Idola rubo delokke ayo emlang adínem delokke akii-asalem bomla notko luyulo rompakto. RUUTUM ke pokam pakpe Mosi bí dekedem ito.

¹⁸Delokrongem romnam amanpe Mosi bí mér dem laalenla, Aaron melang bík oo kídí alagem mér tukku delo gagda suyinmoto.

¹⁹Delo Mosi bí mér dem pakala delok iyyiem runggu lokke abe miyoolo kuujéng líkto.

²⁰Bí mér dem tarongpe tekla, dumpong demlang tarong kídí dem delokke unem romto.

²¹Bí delok rodem amíl arangke ato kídíem lang ale-alagem asi lok arbínla, mér tabudem romnam amanpe runggu delo romto. De eme lok romlíknam, RUUTUM ke airupe mííbomnam arí nampona amane. RUUTUM ke pokam pakpe Mosi bí dekedem ito.

²²Depe irodem bí ordén inana mérkon dem laalenla, Aaron melang bík oo kídí alagem mér tukku delo gagda suyin molíkto.

²³Delo Mosi bí mér dem pakala delok iyyi ayokonem laala Aaron ke nyorung ruubík ruuballo ilíkla, lakbík laknelo ilíkla delokke bíkke lebík lenelo ilíkto.

²⁴Aaron ke oo kídí demte Mosi bí keralo dagmotula, buluke ruubík ruuballo iyyiem ilíkla, lakbík laknelo delokke lebík lenelo ilíkyinto. Delo iyyiem runggu delokke kéényung rego miyoolo kuujéngto.

²⁵Delokrongem bí unemla, ngelna taméem, amíl arangke una tabungem, ayinem dunggo bomna una kídíem, katpí annyi emla delokke unem delokke lebík letígem laalento.

²⁶Sok teyolo, RUUTUM ke keralo duuna aapé lokke siiyé líkmanam ettíng delokke apu-adenna tél lok raanam ettíng emla bésorna séruk ettíngem laalenla, dekedem una kídí lolang lebík letík delo meyél sulíkto.

²⁷Depe irodem, tabudem Aaron kelang bík oo kídíke alag kídílo melík dola, RUUTUM ke keralo leesak líkla leesak amanpe ilíkto.

²⁸Depe ipala buluke alag kídílok deke deme Mosi bí laalang kula, romnam aman teyolo ordén inam amanpe romlíktoku. De eme lok romlíknam, RUUTUM ke airupe mííbomnam aríkana amane.

²⁹Delokrodem Mosi bí agíke tarongpe ina angkeng tarong demteng ordén inana mér delok laala RUUTUM ke keralo leesak líkla, leesak amanpe ito. RUUTUM ke pokam pakpe Mosi bí ito.

³⁰Delok rongem Mosi bí pídénana tél delok ayoko laala delokke runggu delok iyyi ayoko laala Aaron kílang bík ege galuklo delokke bíkke oo kídí lolang buluke ege galuklo píkjé líkto. Dekepe Mosi bí Aaron melang bík ege galugem delokke bíkke oo kídí emla buluke ege galugem kumlíkla deemoto.

³¹Depe iyin rodem Aaron melang bíkke oo kídíem Mosi bí poyilto. “RUUTUM ke Tombu lamgélo adínem keela, Aaronla bíkke oo kídíe dope aido emla ngokke podupe ordén idoke aman mekeng aapé delokke burla goona ettíngem doyél sula dope aido.

³²Doro dem abíd ettíng kídí emlang adín kídíem rompak langka.

³³Delokke noluke ordén agére iyindí longe píído loope, longe kínídko nolu RUUTUM ke Tombu lamgé delok gíkumapeka; kapeila nolum ordén inamde longe kíníd loope ilíkyé.

³⁴Nolum ipítnam legape RUUTUM ke poyil lulígnampe siloke agér si ikai.

³⁵Nolu RUUTUM ke Tombu lamgé delo longe yohpe longe kínídko duula, RUUTUM ke míínamem ipe aido. Depe imílo nolu simayé. Sikepe ngome lulígtung.”

³⁶RUUTUM ke Mosi kíng poyil lulíg pakpe Aaron lang bík oo kídíde deke dem ipíí píílíto.