Read Alladian LEBITIKA 9 Bible Online

LEBITIKA 9 - Alladian bible

LEBITIKA 9

¹Longe píínyina longe delo Mosi bí Aaron melang bík oo kídíem delokke Israel lokke miro kídíem gogdumsuto.

²Bí Aaron me poto, “No atí tarí-tape kamana rupangko, nokke paab aman pelang mérko nokke romnam amanpe laala RUUTUM ke keralo bomalangka.

³Depe irongem Israel kídíem polangka, ‘nolu bénboko paab aman legape lang atí tarí-tape kamana, dugríg píngkuna rubíl kolang méro ko romnam amanpe laala,

⁴delokke ashéng amanpe, rubo kolang mérko laala sokke kékon lote hoyél sunam ali-ayé aman lok bomla RUUTUM ke keralo ipak idope aalangka. Kapeila silo RUUTUM bí noluke keralo lengkan suyé.’ ”

⁵RUUTUM ke Tombu kerang delo Mosike políknam ato siro tabungem bomala Israel maglíng tabunge RUUTUM ke keralo dagaato.

⁶Delo Mosi pokanto, “Noluke keralo RUUTUM ke angun-abée lengkan sudope RUUTUM bí nolum sike sime idope emla políkto.”

⁷Delo bí Aaron me lulígto, “Runggu elo gíla paab aman emla romnam amanem nokke deemangem laabín dope delokke ami kídí emte dekepe idope ipak itola. Ami kídí sokke legape ipak ila RUUTUM ke polík nampe bulum ipít dope ilangka.”

⁸Delo Aaron bí runggu delo aala bíkke agí deemang legape rubíl dem sobope palíkto.

⁹Bík oo kídíe iyyiem bíkkíng bomala, bí agí lakkéng lok iyyi delok ayoko laala runggu delokke kéényung tuubu kídílo ilíkto; delokke abíddem bí runggu delokke leríng delo purlíkto.

¹⁰Runggu delo bí paab aman taro delokke unem, katpí annyiem lang ayinem ilum bomna una kídíem laala RUUTUM ke pokampe romyin líkto.

¹¹Adínem lang ayoem bí notko luyulo rompakto.

¹²Delok rongem bí agíkepe romnam aman legape bomanam taro dem sobope palíkto. Bíkke oo kídíe iyyiem bombila delok bí runggu delokke kéényung miyong regolo kuujéng jéyinto.

¹³Bulu dumpong dem itak sula rompenam dem tarong tarope bila, bí dem tabudem runggu delo romyin líkto.

¹⁴Bí amíl arang adín kídí demteng delokke ale-alagem arbínla romnam aman teyolo, runggu delo romtak suyin líkto.

¹⁵Depe irodem ami kídí legape paab amanpe bomnam sobén dem laala kerangke inam kísa sobope palíkla romto.

¹⁶Bí romnam aman demte bomala kerangke idong ségupe ito.

¹⁷Bí ali-ayé aman demteng lakpyo tetengko laala roh rokomem romnam aman romko aman teyolo runggu delo romtem líkto.

¹⁸Delokrodem bí rubo demlang mérdem ami kídí legape romnam aman legape sobope palíkto. Bík oo kídíde iyyiem bombila runggu delokke abe miyoolo iyyi delok kuujéng goto.

¹⁹Idola rubo delokke lang mér delokke unem, ngelna taméem, katpíem lang delokke unem, ayinem dunggo bomna una kídíem,

²⁰angkeng alop teklennam annyi taro delo megeyéla, deke dem bomla una kídíem runggu delo romlíkto.

²¹Depe ipala Mosi ke pokorpe bí angkeng annyi demlang lebík annyi dem RUUTUM ke keralo leesak líkla, leesak amanpe ito.

²²Delo Aaron bí agí alagem ami kídar danpe leedu sula, bulum utepooroem bilíkto. Delokke paab amanem, romnam amanem delokke ashéng amanem ipakpe iyin líkro dem bí oitoku.

²³Depe irodem Mosi lang Aaron bínyi RUUTUM ke Tombu delo aato. Edílo bínyi delokke lentokudí, bínyi ami kídílo utepooro kadope kumlíkto, delokke RUUTUM ke angun abée ami kídar takamlo lengkan sulento.

²⁴RUUTUM ke kerang lok eme lenla, runggu delok una kídíem guyinto. Deme edílo ami takame kaatodí, bulu ashéng lok ngomla migmoe among danpe gubala iyinto.