Read Alladian JEREMIAH 1 Bible Online

JEREMIAH 1 - Alladian bible

JEREMIAH 1

¹Si, Benjamin among lokke Anathoth doolung lokke miri akonpe ina Hilkiah ke oo Jeremiah ke legang kídíem atkumnam kitabe.

²Amonke oo Josiahke Judahlo toodí takying kolang tagumnape roja doduem RUUTUMke agome Jeremiah kíng pííto.

³Delokke Josiahke oo Jehoiakimke roja doduemte lekoda RUUTUMke agome Jeremiah kíng pííto. Deke delokke kékon lote Josiahke oo Jedekiahke dítak íying kolang atelkope roja dodoloope RUUTUMke agome Jeremiah kíng pííto. Jedekiahke dítak íying kolang atel lokke poolo pilngonape roja dodoem Jirusalem lokke ami kídíem mibo amolo umla bomyintoku.

⁴RUUTUMke agome ngokkíng sikepe pííto:

⁵“Nome ane akiilo ngokke pílenmang adape ngo nome ullensuto. Nome omang adapekai ngo nome, opín kídí aralo kaaluna miripe rungusulento.”

⁶Delo ngo, “E Ruutum Shédí! Ngo koo amédungada, agom-aang atí pokénmang,” emla poyansuto.

⁷Idola RUUTUM bí ngom poto, “Ngo koo amédungada emla manmapeka. Ngokke nome lulíkko ami kídílo no gíla, ngokke lulígnam agom tabungem pogoolangka.

⁸Bulum atí pesomapeka, kapeila ngo nokkíng yémín geyé, delokke nome mopítyé, emla RUUTUM podung.”

⁹Delo RUUTUMke alage ngokkíng ígala, ngokke nappangem uktetdola ngome poto, “Ngo supak nokke nappang delo ngokke agomem líkto.

¹⁰Kaatola, silo lokke ila no opín-buang takamem, among yéta takamem appír lok busandope, sérpansula nyokmodope, delokke ikumdope, morep dokupe, delokke díílík dokupe ngo nome ullíkto.”

¹¹“Jeremiah no ingkokoda kaadun?” emla RUUTUMke agome ngokkíng pííto. “Ngo Almond esing lokke aagko kaadung,” emla ngo poyansuto.

¹²Delo RUUTUM bí ngome, “No kaajing aloodo, kapeila ngok agome apíng líkdope ngo kaabomdung,” emla poto.

¹³RUUTUMke agome lekoda ngokkíng, “No ingkoko kaadun?” emla píítoku. Delo ngo “Línggídan telo ngo usana pekingko kaadung, delokke pekide sok bedangdanpe tappem idung,” emla poyansuto.

¹⁴Delo RUUTUMbí ngome, “So amoso duuna kídí tabunglo usana ankí-adírem línggíng danlok purtoklíkyé.

¹⁵Línggíng yéta takam telokke ami kídíem ngo tomlík dakbong. Buluke roja kídíe tokla Jirusalemke luyablo buluke roja paleng kídíem joolíkyé. Bulu Jirusalemke yabgo mipí emlang Judah among lokke doolung takamem mimakpe aabomyé.

¹⁶Ngo, ngokke ami kídíke teyolo kelíng-kebangem ilenbomyé. Kapeila bulu agí alaglok písunam mimang kídíem kumsula uyu kídílo arí namponem nyotlíkgoola ikai.

¹⁷No agísuete irung sutola! Ngokke lulígnam agomem pobidope, buluke keralo dagrepla polangka. Bulum pesomapeka demamílo bulukelo nokke yémín geyém nome ngo peso-ríanmoyé.

¹⁸Among sokke ami kídí keralo, miri kídí keralo, migom-mite kerang lolang roja kídí keralo no dakka suladope nome ngo arem gaangpe, pitol suppipe, delokke líísak etorpe silo imoyé.

¹⁹Bulu nom mimak imínsuyé, idola nome ikummayé; kapeila ngo nokkíng yémín gedung delokke nom ngo mopítyé,” emla poto.