Read Alladian JEREMIAH 11 Bible Online

JEREMIAH 11 - Alladian bible

JEREMIAH 11

¹Sikesi Jeremiah kelo RUUTUM ke agom píína kídíe:

²“Daapong ibosudo delokke ayon kídíeme aipe tatgap langka. Judah kelang Jirusalem amiem, RUUTUM Israel ke Shédíbí sikepe podung emla

³lubilangka: Daapong lokke ayonem igemana mipillo bééname ayé.

⁴Edílo eme medung kísa iko Ijipt amonglok buluke buku kídíem ngo laalen todí, delo ngokke bulum Daapong ibosuname. Delo ngo bulum, ‘Ngokke nolum lulígnam tabungem igela, ngok agomem tallangka; depe imílo ngo noluke Shédípe iyé,’ emla pogapto.

⁵Delok teyolo ngo bulum, siloke noluke yébom duunam, gakíre lang ngullange bingko amosim, noluke buku kídídem biyé emla ngokke togesunam agom dem ipíng líkyé, emto. “Delo ngo, ‘Dekepe idaklangka, RUUTUM,’ emla poyansuto.

⁶“RUUTUM bí ngom lulígto, ‘Judah lokke doolung kídí lolang Jirusalem ke bedang miyonglo gígoolangka. Daapong lokke ayon idong kídíem aipakpe igedope pogoolangka.

⁷Noluke buku kídíem Ijipt among lok laalen doku longe delokke ila silo loope “Ngom tallangka,” emla bulum moodí-moodíem lutor gotíto.

⁸Idola bulu aipe tatmang delokke aang kigemang, delok ayanpe buluk atímana aapí-aang toldupe bulu yétíkai. Daapongke ayonem bomgap langka emla lutílíklate bulu igemang. Depeila Daapong so atlíknam béénam kídí takamem ngo buluke teyolo meyinlíkto.’ ”

⁹Delo ngom RUUTUM bí poto, “Judah ami kídí kelang Jirusalem ami kídíke aralo atímana agomeke poru bosutung.

¹⁰Ngok agom-aang tatmana buku kídíke deemang agérlo bulu gílat sudungku. Bulu uyuem kumsu dungku. Judah ami kídíe lang Israel ami kídíe, buluke buku kídílo ngokke Daapong ayon ibosunamem betkai.

¹¹Dekepe ila RUUTUM ngo sikepe podung: Buluke dukpí suge lamanam adírko ngo buluke teyolo langaayé. Bulu ngom kapgu-rogu sudokom ngo tatmayé.

¹²Judah amie lang Jirusalem amie buluke kumbomnam uyulo kapgu-rogu suduakom, edílo adíre pííyédí, uyu kídíde edílokom bulum igul lamayé.

¹³E Judah, no edítko doolung kadudí deke kísanako uyue kadung. E Jirusalem no edítko bedu-bedange kadudí deddí kokai annying ruunam Baal uyume kumpom runggue kadung.”

¹⁴“Jeremiah no ami kídíke legape ngome rogula, ngokkíng kumbila imapeka. Buluke adír dílo, ngome bulu kapgu-roguduakom ngo tatbi mayé.

¹⁵“Ngokke mííbosunam kídíe, atímana budiiem rungkup-rulat sudung, Ngokke Kumkeng Ekumlo bulu depe ibaasunía? Nolum idír díku moodíem, kumlíknam adíne ipak bilayén? Noluke atímana agérlo nolu erap runeke.

¹⁶RUUTUM bí nolume, Kamporuna, yayina anne gena, ayé ééna olib esing emtuai. Idola supak doomír adudpe anne kídíem emepe rílíkla aag kídíem díryin yéku.

¹⁷“Nolum lelígna, Ralyayalumna RUUTUM bí noluke teyolo adírem langaayé emla lulenkai. Kapeila Judah erang delang Israel erade atírumana agérem RUUTUM ke kangkolo ila, Baal uyu kíng ipak ila kumsu-joosula RUUTUM me yagorupe aklímola marmokai.”

¹⁸Ngokke miru kídíe ngok teyolo ruubosunam legangem RUUTUM bí ngome lengkanla ngo kénkai.

¹⁹Mokakolo gíbonam mér kísape ngo ito. Bulu ngokke teyolo atímape ruubo sudung emla ngo kénmangai. Bulu sipe lubo sudo: “Kaju esing simla sokke ayé kídar sim papaklape; turna kídí lokke among so sékote bíme míípang suyimadope, bíme mokalape.”

²⁰Idola E Ralyayalumna RUUTUM. No deenampe kebang lune, delokke tanike aapí-aangem ikaane. Buluke teyolo nokke edo rabinamem ngome kaamoi, kapeila nokkíng ngokke legangem melíkto.

²¹Anathoth ami kídíde ngome mokape mííla, “No RUUTUM ke amínlok ngiitom sigtí gomapeka demamílo no ngoluke alaglo siyé,” emla ngome poto.

²²Depe emkolok Ralyayalumna RUUTUM bí sipe ludung: “Ngo bulume idíryé. Buluke yaamé kídíde mimaklo siyé. Buluke koo améne akii keno lok nyokyinyé.

²³Bulum itung-irédí dítak moodíe pííyém, Anathoth ami kídíke teyolo ngo sinam-nyoknamem bomala, turngo-tursong kote kamomape séyitpe nyokyinmoyé.”