Read Alladian JEREMIAH 14 Bible Online

JEREMIAH 14 - Alladian bible

JEREMIAH 14

¹Dírí-keno legape Jeremiah kelo RUUTUM ke lukan binam agome:

²“Judah bí ankí aloodung, bík doolung kídíe ankang aloosulangala nyokyindak. Jirusalem ke pengé miri adude yagorupe muusangkai.

³Migom-mite kídíe asi joodope béérang kídíem lulígla, bulu asi déérunglo gíla asi kaape gíyém asi kayimape rukyin duupe kangkai. Depeila míídírla araape aalat suyinkaku.

⁴Pedong oyimala amonge barkai, depeila arík ina kídíe migmue bektokla míídír alongkai.

⁵Moonam lokke dumsung kídíete, agí osunam koo kídíem mepakla ikai kapeila nesi-neyang takame rukyinkai.

⁶Moonam gado kídíe míllona díítum teyolo dagdola ménsurung nganam kísa ngakai; kapeila donam kayimala bulu mikmolkai.”

⁷E RUUTUM ngoluke paab kídíe ngolume atímang sanket sudagakom, nokke deena amínsu legape, ngolum igultokui. Ngolu nokke lok gílat sulangkula, nokke mirolpe botterupe paab ito.

⁸E Israelke míída subomnam, ankí-keno moodílo ipítna no, yoh atelpe doona mibo kísa, kapei no ikane?

⁹Mamam sudupe aalom bomnam ami kísa delokke pauar kamana, ipít lamana miram kísape kapei no ikane? E RUUTUM, no ngoluke pénsam lomin kadune, delokke ngolu nokke amínem yégene depeila ngolum no mepak sumayika.

¹⁰Ami kídí legape RUUTUM ke ponam agome: “Ami kídarsi, buluke ale kídíeme tekíng anyong koteng kamomape duggongnamem yagorupe erap runeke, depeila RUUTUM bí bulum torík suyimang. Delok ayanpe buluke atímana agérem míípasula buluke paab legape, bulum bí itung-iréyé.”

¹¹Delo RUUTUM bí ngome poto, “Sok ami kídí sokke ainam legape no kumbimapeka.

¹²Bulu doma-tíímape nyoduakom ngo buluke roguem tatmayé. Bulu romnam amanem, ali-ayé amanem romla ipak iduakom ngo toríksumayé. Delok ayanpe ngo bulum, yoksalok, dírí-kenolok delokke kilii-ramlilok nyokyin moyé.”

¹³Delo ngo poyansuto, “E Ralyayalumna RUUTUM, kaalu miri kídíe, ‘RUUTUM bí amoso aapí eetet em ruulík biyé, iname nolu midu-mimak, demangkom dírí-keno atí-siríem kaapamayé,’ emla bulu kaalu-kangor agomem lubidung.”

¹⁴Delo RUUTUM bí ngome poto, “Ngok amín lok kaaluna kídíe menam agom podung. Ngo bulum melíkmang, demangkom ullíkmang, demangkom kaalu dopete políkmang. Bulu noluke keralo yatna immang agom lok agér kamana líímé-tagillok, uyu kídíke menamlok delokke buluke yaana aapí-aang lok megoo-yatgoo dung.

¹⁵Depeila ngok amínem mín-gela menam agom lok pogona kaaluna miri kídí teyolo RUUTUM bí sipe podung: Ngo bulum lulígmang, idola bulu, ‘Among sime midu-mimak demangkom dírí-keno atíe aabommayé,’ emdung. Dekepakpe luna kaaluna kídíde mimaklo demangkom dírí-kenolo siyinyé.

¹⁶Buluke dekena kaalu agom pokeng sulíkko ami kídí demte dírí-kenoe lang midu-mimage aabomla Jirusalem ke bedu-bedang takamlo dooyin moyé. Buluke simang kídí emlang buluke mime, ome-oo kídí takamke simang kídíem yusina ami kamayé. Buluke adír paapenam dem ngo buluk teyolo ruulíkyé.”

¹⁷RUUTUM bí ngokke ankínam agom sim ami kídíem polangka emla políkto: “Longe-yoh orek kamape ngok amige miksi lentílangka, kapeila ngokke ami kídíe yagorupe eerína taríem moket kosula ankí aloolenkai.

¹⁸Ngo moonamlo magoodokom, mimaklo sina simang mílípe kaatígongkai. Ngo doolulo gígodokom, dírí-kenolo sina nyoknem kaarík suyinkai. Kaalune lang miri kídíe buluke kénkímanam amolo gínyok nyokyinkai.”

¹⁹RUUTUM no Judahem mepak kanía? Jayon ke ami kídíem míípak kanía? Ngolu ipísula yimadope kape no ngolum tarí moketkane? Ngolu aapí eetet em matato, idola aina atí aamato. Ngolu ipínamem kaatato, idola yiirí pedípe míínam atoem kaarík sutíkai.

²⁰E RUUTUM, ngoluke atímangem ngolu togesudung, delokke ngoluke abu kídíe arope yémemto. Nokke mirupe arope ngolu paab ito.

²¹Nokke amínsu legape ngolum míípakmapeka. Nokke angunna paleng dem yorang atak kamomadakyika. Nokke ngoluke teyolo Daapong ibosunamem no míípasula deme betkumapeka.

²²Abíd opín kídíke mimang kídíde pedongem omo ladun? Taleng tesi agísue tangar lenmosula amoso otok sumodun? Deke takamde atí ilasumang. E ngoluke RUUTUM, no petommin ine. Depeila nokkíng ngolu takam míídasudung, kapeila sikena takam sim nomin ine.