Read Alladian JEREMIAH 15 Bible Online

JEREMIAH 15 - Alladian bible

JEREMIAH 15

¹Delo RUUTUM bí ngom poto, “Ami kídí sok legape Mosi lang Samuel bínyi dagabiduakom ngok aapíe bulume ayang kumayé. Ngok keralok bulume lugélangka. Bulume gígéé molangka.

²‘Íngkolo ngolu gíyén,’ emla bulu íngkínamko kayémílo, ngokke sim agom sim bulume lubilangka: “Sidorupe ruulík rodem sikolo, midu-mimaklo ruulík rodem midu-mimaklo; dírí-kenolo ruulík rodem dírí-kenolo, abílpe yédope ruulík rodem abílpe yéku pekolo.

³“Ngo buluke nyokpeko bedang appiko ruubitung. Mimaklo bulu siyé. Simangem ekiie hobomyé, delo pettange domín geyé, delokke dongo-dosongem monkír kídíe dokutyé.

⁴Bulum kaala tani among sokke ami takame reyubrupe mínggeyé. Kapeila Hejekiahke oo Manassehke Judahlo roja idoem Jirusalemlo bíkke atírumanam agér inam legape dekedem iyé.

⁵“E Jirusalem lok ami kídía, nolum sékoda ingkí-bengkíla, noluk legape ankíla, nolum pengé miri lubiyén?

⁶Nolu loorímana bedalo yélat sulangkula, ngome mepaksuto. Depeila noluk teyolo ngok alage tebegla, nolum ngo asampe ayangem lengkan yimayé, delokke nolum ngo nyokmoyé.

⁷“Amo sokke doolung kídíke luuyab kídílo, ngo jaréem bomla nolum réyinyé. Noluke yékor-dagorem angupe imo sukumanam legape, ngo noluke teyolo kapnam-ríínam emlang sipe-nyokpenamem langaayé.

⁸Siyéng robeng lokke sulliem pemílo, noluk aralo mime meyéngem bojéyamoyé. Yaamé uttík moodílo ngo bulum mokala, buluke ane kídíem yagorupe ankímoyé. Menang asak ngo buluke teyolo aklí-buulíng emla peso-ríanem langaayé.

⁹Ome-oo kíníd ona ane ankílok ngala yimape iyé. Longe kadung adape bíkke doonyie uayé. Bí yagorupe annying paala aapíe kinampe kiyé. Ami singona kídíem miru alaglo petyinmoyé. Sikepe RUUTUM ngo polendung.”

¹⁰Ah, ngo adírruna amiko! Kapei ane ngome olentone? Amo sokke ami tabungem ngo akmín-lumín sutígongkai. Ngo séko memkom abal narko sukímang, delokke séko kíngkom narkímang, idola mipil-miyongpe ngome bééyindung.

¹¹RUUTUM bí ngiila poto, “Ainam legape ngo nome mopítyé; ankí-keno moodílo, adír moodílo miru kídíe nome kumala rogudope ngo nom imoyé.

¹²Séko amiekom aremem dírlamang. Línggíng telokke arem emlang pitol soyél sunam demrange atí ilamang.

¹³Amoso ami kídíke paab agér itínam legape, ami kídar sokke lunggu tadok, abal delokke ekurang takamem miru kídíe giiyin bidope ngo miruem melíkla amo sim itung-iréyé.

¹⁴Ami kídíke kénkímangko amolo, miru kídíke ale rumkílo yédope bulum abílpe kolíkyé. Ngokke marnam si emepe ilenla bulum gubomyé.”

¹⁵Delo ngo poto, “RUUTUM no kénne. Ngome míípasula igultoi. Ngome ipusilééna kídí teyolo edoem rabikui. Ipu-silééla itíla, ngome ikala buluke idolopekai aapí bodola ibimayika. Kapeila nok legapemin ngo sikena ipusilééem paadune.

¹⁶Edílo nokke agome píítodí, dekedeme ngo airupe mínggapgeto, kapeila agom kídíde ngokke aapí-aangke erbomname delokke ashébomname. E Deena RUUTUM, ngo nokke amínem gene.

¹⁷Ngo edílokom lupu-luléna amilo lekope duubo sukímang, delokke bulukíng ashébosula ibosukímang. Nokke alage ngok teyolo kalík kolo ngo agí atelemin duusudune, kapeila ngok aapí-aangem no aklíng-buulínglok bíímoto.

¹⁸Ngokke kinamsi kapei kiyin yiman, delokke ngokke tarí kídarsi bottepe ila géyiman? No ngokke keralo, díyu-lobo lote menape oojinkuna, yatna roojik kísapía idune?”

¹⁹RUUTUM bí poyansuto, “Ngome agér ibidope, no aapí míílat suyékumílo, ngo nome ai-kampope yémoyéku. No bíírík-hamgomana agom lugomape, aina agom-aangem pogo biyémílo, ngokke agomem pobina amipe ngo nom imoyé. Ami kídí si nokkíng aalat sukupe aido, idola ami kídílo no yélat mínkunape ipe aimang.

²⁰Ngo nome ami kídíke legape, pitol líísak lok pínam etorpe imoyé. Bulu nome momín-díímín suyé, idola nome edílote ikummayé. Kapeila nome ipítla mopítdope, ngo nokkíng yémín gedung.

²¹Ngo nome atímana ami kídíke, alag aralok mopítyé, delokke bíírík hamgomana migu-miyak ami aralok, ngo nom ipítyé. Sikepe Maglíng ke RUUTUM ngo polendung.”