Read Alladian JEREMIAH 16 Bible Online

JEREMIAH 16 - Alladian bible

JEREMIAH 16

¹RUUTUMbí ngom lekoda lupotoku,

²“Sikena amoso no mime bomla ome-oo ola imapeka.

³Kapeila so amoso olennam ome-oo kídílolang bulum ona ane-abu kídílo RUUTUM ngo sipe podung:

⁴Bulu takam atírumana kilii-ramlilok siyinyé. Bulum pengé lubina kote kamayé, aipe yusina kote kamayé, delok ayanpe buluke simange doojé-dooyéla iyé. Bulu midu-mimak loklang dírí kenolok nyokyinyé. Buluke simang kídíde monkír kídí kelang kebu-pettangke dotképe iyé.

⁵“Kapeila RUUTUM bí sikepe podung: Dotga petkolo dola-tííla imín gemapeka. Kapla-rííla ikolo ayang ankí atí igobimapeka. Kapeila ngokke utepooroem laabíntoku, ngokke ayangem, delokke emmumpe yaman sunamem ami kídí teyosok laanyok toku.

⁶So amoso mite-migome lang aatí-opane siyinyé. Bulum yuna kamayé, delokke kabbomna koteng kamayé. Buluke legape ankílok sékote amíl-amoem tarí iketsula, delokke dumíd ngísula ina kamayé.

⁷Sina kídíke ali-atod em ankí ayangem lengkansula, dola-tííla ina kamayé. Ane-abue sinyoknamko kadagakom sékote ayala sinyonam eradem donam-tíínam bisula ngiina kamayé.

⁸“Doman-tíímanko ekumlo aala duumín gela imapeka.

⁹Kapeila sikepe Maglíngke RUUTUM Israelke Shédíbí podung: So amoso noluke amig keralo, noluke ashéng-angampe inam miri tapung muudud, delokke makbo-nyameng kídíke adud-ayud kídíem kamoyimayé.

¹⁰“Sim legasim edílo no ami kídíem lubila, delo edílo ami kídíe nome, ‘Kapeila RUUTUM bí sikena ankí kenoem ngolukíng ruulík kane? Ngolu ingkona imem kodí itone? RUUTUM ngoluke Shédíke mirolpe ingkona paab kodí ngolu itone?’ emla íngkíyém,

¹¹bulum sipe lubi langka, ‘RUUTUM bí sipe ludung, noluke abu kídíe ngome mepakto. Bulu angukon bedalo gíla uyuem kumsu-joosula ito. Bulu ngokke ayonem igemape ngome mepakto.

¹²Bulum pemílo nolu pakyape atíyamape ikai, nolu mipile agí-agí aapí toldulok yéla, ngok agom-aangem tatyimape ikai.

¹³Depeila nolu lang noluke abu kídíke kénkímanam amolo ngo nolum elpakyé. Deke delo nolu longe-yohpe uyuem kumtísula yéyé, delokke ngo nolum ayangem lengkan suyimayé.’ ”

¹⁴“RUUTUM bí sikepekom podung: ‘Ijipt amolok laasangkuna RUUTUMke turdung tetedem,’ emla poyém manbo suyimadí longe píídak.

¹⁵Delok ayanpe, ‘Línggíng amo telokla ngolume monnyok líkko tani among tabungke kéényung regolok Israel amiem laalen kuna RUUTUMke turdung tetedem,’ emla mandíe píídakku. Kapeila buluke ami kídíem ngokke binam amodem ngo lekoda mopít biyéku.”

¹⁶RUUTUM bí podung, “Ngo deddína esap kuunem, ami kídar sim umdope melíkdak. Delok kékonlo deddína apta-pata inem, bulum apdope melíkdak. Bulu díítum-díírum, kobung-korung delokke lííbung-língang arung kídí takamlo ami kídíem mabomyé.

¹⁷Buluke yéko-dakko takam delo ngok amige kaayé. Ngok amig keralo bulu runyok sulamang, delokke buluke paab kídíemte rumnyok lamang.

¹⁸Buluke paab legapelang delokke buluke mito-huarpe yéreem adu annyikope ngo ajéng lubomyéku. Kapeila bulu ngokke deena amongem, atí turnam kamana, simang kísape ina mimang kídí loklang buluke uyu kídíem bííbom mola belum runam deemangpe imokai.”

¹⁹E RUUTUM, ngokke ralkenge, delokke líísak ekume, ankí-kenodílo nomin ngokke yépísukoe. Tani among sokke kéényung takamlok ami kídíe dumsula nome pokansuyé, “Ngoluke abu kídíe abídyang kamang, yatna uyu petome min. Dekede atí aina agér bimana mimang eke mino.

²⁰Ami kídíe agí-agí uyuem písudunía? Aroe písuduakom de aro Shédímang.”

²¹RUUTUM bí podung, “Ngokke pauar emla ralnamem letel paklok ami takame kényindupe ngo poyilyé. Delo bulu ngok amíne RUUTUM emla kényinyé.”